O le Tusi Lona Lua i le Faapotopotoga i Korinito 12:1-21
12 E ao ona ou mitamita. E lē aogā lea, ae o le a ou faamatala atu vaaiga ofoofogia+ ma faaaliga mai i le Alii.+
2 Ua ou iloa le tagata, o le soo o Keriso, ua 14 tausaga talu ona ave faafuaseʻi i le lagi lona tolu, ou te lē o mautinoa pe na iai i le tino pe e leʻi iai i le tino, ae e na o le Atua e na te silafia.
3 Ioe, ua ou iloa lenā tagata, ou te lē mautinoa pe na iai i le tino pe e leʻi iai i le tino, ae ua silafia e le Atua
4 na ave faafuaseʻi o ia i le parataiso, ma faalogo ai i upu e lē tatau ona taʻua, e sā foʻi ona tautala i ai se tagata.
5 Ou te mitamita ona o lenā tagata, ae ou te lē mitamita iā te aʻu lava seʻi vaganā ai mea ou te vaivai ai.
6 Auā e tusa po ou te fia mitamita, ou te lē valea ai, auā ou te tautala atu i le mea moni. Ae ou te lē faia faapea, ina neʻi viiviia aʻu e se tagata e sili atu nai lo o mea ua ia vaai ma faalogo ai iā te aʻu,
7 ona o le mauaina o na faaaliga mataʻina.
Ina neʻi oʻu soona faamaualuga, ua tuuina mai ai iā te aʻu le mea matuitui i le tino,+ o le agelu lea a Satani, ua pō* mai pea iā te aʻu ina neʻi oʻu faamaualuga naʻuā.
8 Na ou ʻaiʻoi faatolu i le Alii ina ia aveese lenei mea mai iā te aʻu.
9 Ae na faapea mai o ia iā te aʻu: “Ua lava le agalelei faifua ua ou faaali atu iā te oe, auā ua faaatoaina loʻu mana i le mea e vaivai ai.”+ E sili ai loʻu mitamita i mea ua ou vaivai ai, ina ia tumau ai le mana o le Keriso i luga iā te aʻu e pei o se faleʻie.
10 O lea, ua ou fiafia ai i mea ua ou vaivai ai, i le upuleagaina, i le mativa, i sauāga ma mea faigatā ona o Keriso. Auā pe a ou vaivai, ona ou malosi ai lea.+
11 Sa ou lē fetuutuunaʻi. Sa outou faamalosia aʻu e faia faapea, auā sa tatau ona outou taʻuleleia aʻu. Auā e ui lava ina ou faatauvaa, ae e leai lava se mea ou te itiiti ai i o outou aposetolo silisili.+
12 O le mea moni, na outou vaaia faamaoniga o le avea o aʻu ma aposetolo i loʻu matuā tumau,+ ma e ala foʻi i faailoga, o mea ofoofogia* ma galuega mamana.+
13 E pau le mea e lē tutusa ai outou ma isi faapotopotoga, ona e leʻi avea aʻu ma avega mamafa iā te outou. Pe na ou sesē?+ Afai o lea, ia faamagalo mai loʻu sesē.
14 Faauta! O le faatolu ai lea ona ou sauni ou te alu atu iā te outou, ma o le a lē avea aʻu ma avega mamafa iā te outou. Auā ua ou lē saʻilia a outou meatotino,+ a o outou; auā e lē faatalitalia e faaputu e le fanau+ ʻoa mo o latou mātua, ae ia faaputu e mātua ʻoa mo a latou fanau.
15 Ou te matuā fiafia e faaaogā mea uma ua iā te aʻu ma loʻu malosi atoa mo outou.+ Afai ua tele loʻu alofa iā te outou, pe e lē tatau foʻi la ona outou alolofa mai faapena iā te aʻu?
16 Ae e ui i lea, e leʻi avea aʻu ma avega mamafa iā te outou.+ Ae ua outou fai mai ua ou “faaʻoleʻole,” ma na ou maua outou i aʻu “togafiti.”
17 Pe na ou saʻili ea ni mea mai iā te outou e ala i so o se tasi o i latou na ou aauina atu?
18 Na ou ʻaiʻoi iā Tito ina ia alu atu, ma na ou auina atu le uso faatasi ma ia. Pe na saʻili ea e Tito ni mea mai iā te outou?+ Pe e matou te leʻi savavali ea i le loto e tasi? Pe e matou te leʻi savavali foʻi i le ala e tasi?
19 Po ua outou manatu ea, ua matou tali atu iā te outou e tusa ai ma nei tuuaʻiga? Ua matou tautatala atu o ni soo o Keriso i luma o le Atua. O lenei le ʻaupele e, ua matou faia nei mea uma e atiaʻe ai outou.
20 Ou te popole neʻi oʻu taunuu atu, ma maua outou e lē o faia e pei o le mea o oʻu manatu i ai, ma ou te lē o faia foʻi e tusa ma le mea ua outou manatu i ai, nai lo o lea, ua iai le femisaaʻi, o le lotoleaga, o le faapasae o le ita, o le finauvale, o le taumuimui, o le faitala, o le faafefeteina i le faamaualuga, ma fevesiaʻiga.
21 Pe a ou toe alu atu, atonu e faamā aʻu e loʻu Atua pe a tatou faatasi, ma atonu foʻi ou te matuā faanoanoa ona o le toʻatele o ē na agasala ae e leʻi salamō mai i a latou faiga lē mamā, ma amioga lē mamā taufeusuaʻiga,* ma amioga faauamaaa* na latou faia pea.
Faamatalaga Pito i Lalo
^ Po o le “sasa.”
^ Po o “vavega.”
^ O le upu Eleni, o le por·nei′a. Tagaʻi i le Uiga o Upu.
^ Po o “amioga leaga e aunoa ma le māsiasi.” O le upu Eleni, o le a·selʹgei·a. Tagaʻi i le Uiga o Upu.
