Esekielu 22:1-31
22 Ua toe oo mai le afioga a Ieova iā te aʻu e faapea:
2 “A o oe le atalii e o le tagata, po ua e nofosauni ea e faailoa atu le sala faafaamasinoga* i le aai ua nofosala+ i le toto, ma faailoa atu i ai ana mea inosia uma?+
3 E ao ona e fai atu, ‘O le fetalaiga lenei a le Alii Pule Silisili Ese o Ieova: “Le aai e, o lē ua faamasaa le toto+ i lona lotolotoi, o lē ua oo mai le taimi o lona iʻuga,+ ma o lē ua faia tupua inosia* ina ia faaleagaina ai o ia lava,+
4 ua e nofosala i le toto ua e faamasaaina,+ ua e lē mamā foʻi ona o au tupua inosia.+ Ua e faavave mai le iʻuga o ou aso, ma ua oo mai le iʻuga o ou tausaga. O le mea lea ou te faia ai oe ma luma i nuu ma o se mea e tauemu i ai atunuu uma.+
5 O oe lē e lē mamā le igoa ma ua tumu i le fenuminumiaʻi, o le a tauemu mai iā te oe atunuu e latalata mai ma atunuu e mamao.+
6 Vaai! O taʻitaʻi taʻitoʻatasi o Isaraelu o loo iā te oe, ua latou faaaogā la latou pule e faamasaa ai le toto.+
7 Ua latou ʻinoʻino i tamā ma tinā ua iā te oe.+ Ua latou ave faagaoi mea a tagata ese e aumau, ma ua latou agaleaga i le tama e leai sona tamā* ma le fafine ua oti lana tane.”’”+
8 “‘Ua e ʻinoʻino i aʻu mea paia ma ua e solia oʻu sapati.+
9 Ua iai iā te oe o ē e taufaaleaga e mananaʻo e faamasaa le toto.+ Ua latou aai i taulaga i tupua i luga o ou mauga ma faia pea amioga matagā i ou lotolotoi.+
10 O ou lotolotoi, ua latou lē faamamaluina ai le moega o lo latou tamā,*+ ma ua latou momoe ai foʻi ma se fafine e lē o mamā ona o lona maʻi masina.+
11 O ou lotolotoi, ua faia ai e se tamāloa mea inosia ma le avā a lona tuaoi,+ ua faaleagaina ai foʻi e se tamāloa le avā a lona atalii i le faia o amioga matagā ma ia,+ ma ua faaleagaina ai e se tamāloa lona tuafafine, o le afafine o lona lava tamā.+
12 O ou lotolotoi, ua latou taliaina ai se foaʻi i faiga faaalatua ina ia faamasaa ai le toto.+ Ua e talia pasene+ ma polofiti mai i nonogatupe, ma ua e ave faamalosi tupe mai i ou tuaoi.+ Ioe, ua e matuā faagaloina aʻu,’ ua fetalai mai ai le Alii Pule Silisili Ese o Ieova.
13 “‘Faauta! ua pati oʻu lima ma le ʻinoʻino i au tupe ua maua i auala lē tonu, ma gaoioiga o le faamasaatoto ua faia i ou lotolotoi.
14 Po o le a tumau ea lou lototele* ma malolosi pea ou lima i aso ou te gaoioi ai faasaga iā te oe?+ O aʻu lava o Ieova, ua ou fai atu ai ma ou te faia lava.
15 O le a ou faataapeapeina oe i nuu ma faasalalauina oe i atunuu,+ ou te faamutaina foʻi lou tulaga lē mamā.+
16 O le a faalumaina foʻi oe i luma o nuu, ma o le a e iloa ai o aʻu lava o Ieova.’”+
17 Ua oo mai foʻi le afioga a Ieova iā te aʻu e faapea:
18 “Le atalii e o le tagata, ua avea le aiga o Isaraelu ma otaota o siliva iā te aʻu. O i latou uma o ʻapamemea, o ʻapa, o uʻamea, ma pulu* i totonu o se ogaumu. Ua avea i latou ma otaota o siliva.+
19 “O lea, o le fetalaiga lenei a le Alii Pule Silisili Ese o Ieova: ‘Talu ai ua avea outou uma ma otaota o siliva,+ o le mea lea ou te aoaoina ai outou i totonu o Ierusalema.
20 E pei ona aoaoina o le siliva, ʻapamemea, uʻamea, pulu, ma ʻapa i totonu o le ogaumu ina ia feula atu i ai le afi ma liusuāvai ai ia mea, e faapea foʻi ona ou aoaoina outou i loʻu ita ma loʻu ita tele, ma o le a ou feula atu iā te outou ma faaliusuāvai ai outou.+
21 O le a ou faapotopoto faatasi outou ma feula atu iā te outou le afi o loʻu ita tele,+ ma o le a liusuāvai ai outou i totonu o lo outou aai.+
22 E pei o le faaliusuāvaiina o le siliva i totonu o le ogaumu, e faapea foʻi ona faaliusuāvaiina outou i totonu o lo outou aai; ma o le a outou iloa ai o aʻu lava o Ieova, ua ou sasaa ifo loʻu ita tele iā te outou.’”
23 Ua oo mai foʻi le afioga a Ieova iā te aʻu e faapea:
24 “Le atalii e o le tagata, ia e fai atu iā te ia, ‘O oe o le laueleele e lē faamamāina pe totō ifo foʻi i ai le timu i le aso o le toʻasā.
25 Ua iai le taupulepulega leaga a ou perofeta ua iā te oe,+ e pei o se leona ua tagi leotele ma saeia lana manu ua maua.+ Ua latou faatamaʻia tagata. Ua latou aveina oloa ma mea tāua. Ua latou faatoʻateleina foʻi fafine ua oti a latou tane i lou lotolotoi.
26 Ua solia e ou ositaulaga aʻu tulafono,+ ma latou faaleagaina pea aʻu mea paia.+ Ua latou lē faaeseeseina le mea paia ma le mea faatauvaa,+ ma ua latou lē faailoa atu foʻi le eseesega o le mea lē mamā ma le mea mamā,+ ua latou teena le tausia o oʻu sapati, ma ua taʻuleagaina aʻu i lo latou lotolotoi.
27 O perenise ua iā te oe, ua pei o ni luko ua saeia ni manu ua maua; ua latou faamasaa le toto ma fasiotia tagata ina ia maua ai tupe i auala lē tonu.+
28 Ua valiina e au perofeta a latou amioga leaga i le vali paʻepaʻe. Ua latou vaaia faaaliga lē moni ma faia valovaloga pepelo,+ ma latou faapea mai: “O le mea lenei ua fetalai mai ai le Alii Pule Silisili Ese o Ieova,” ae e leʻi fetalai mai ai lava Ieova.
29 Ua faia foʻi e tagata o le atunuu faiga faagaoi ma faoa faamalosi mea,+ ua latou agaleaga i lē ua puapuagatia ma lē ua mativa, ma ua latou ave faagaoi mea a le tagata ese e aumau, ma lē faia le faamasinogatonu mo ia.’
30 “‘Na ou saʻili mai iā i latou se tagata e toe atiina le pā maa, pe tū i oʻu luma i le vaega ua lepetia o le pā e fai ma sui o le nuu, ina ia lē faaumatiaina ai,+ ae ou te leʻi mauaina se tasi.
31 O le mea lea ou te sasaa ifo ai iā i latou loʻu toʻasā ma faaumatia i latou i le afi o loʻu ita tele. Ou te taui atu iā i latou e tusa ma o latou ala,’ ua fetalai mai ai le Alii Pule Silisili Ese o Ieova.”
Faamatalaga Pito i Lalo
^ Epe., “pe e te faamasino, pe e te faamasino.”
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ Po o le “ua mātuaoti.”
^ Epe., “faaalialia ai le telenoa o lo latou tamā.”
^ Epe., “loto.”
^ O se uʻamea e vaivai toe faaʻefuʻefu lanu moana, e liusuāvaigofie.
