Galuega a le ʻAuaposetolo 23:1-35
23 Ua pulatoʻa atu Paulo i alii o le Faamasinoga Sili ma faapea atu: “Alii e, le ʻauuso e, ua ou gaoioi ma se lotofuatiaifo matuā lelei i luma o le Atua,+ e oo mai lava i le aso nei.”
2 O le mea lea ua faatonuina ai e le ositaulaga sili o Anania ē o loo tutū latalata ane iā Paulo, ina ia pō lona gutu.
3 Ona fai atu lea o Paulo iā te ia: “O oe na le pā ua faapaʻepaʻeina, o le a pō atu le Atua iā te oe. Pe e te nofo ea e faamasino mai iā te aʻu e tusa ai ma le Tulafono, a o lenā e te solia le Tulafono i lou fai mai e pō aʻu?”
4 Ona faapea mai lea o i latou ua tutū ai: “Pe e te tautala lē mafaufau ea i le ositaulaga sili a le Atua?”
5 Ae ua fai atu Paulo: “Le ʻauuso e, ou te leʻi iloa o ia o le ositaulaga sili. Auā ua tusia, ‘Aua e te faia ni tala leaga i se taʻitaʻi o lou nuu.’”+
6 Ina ua mātauina e Paulo, o le tasi vaega, o le ʻau Satukaio, a o isi, o le ʻau Faresaio, ona alaga atu lea o ia i alii o le Faamasinoga Sili e faapea: “Alii e, ma uso e, o aʻu o le Faresaio,+ o le atalii o le ʻau Faresaio. Ua faamasinoina aʻu i le faamoemoe o le toetū o ē ua oti.”
7 O lona fai atu o lenei mea, ua mapuna aʻe ai se fefinauaʻiga i le vā o le ʻau Faresaio ma le ʻau Satukaio, ma ua vaeluaina ai foʻi le motu o tagata.
8 Auā ua fai mai le ʻau Satukaio e leai se toetū, e leai foʻi ni agelu, po o agaga, ae ua talitonu le ʻau Faresaio i* na mea uma.+
9 Ona matuā vāvāō ai lea o tagata, ma ua matuā finau atu nisi o le ʻautusiupu o le vaega a le ʻau Faresaio e faapea: “E matou te leʻi maua se mea sesē ua faia e lenei tagata, ae afai ua tautala mai se agaga, po o se agelu iā te ia+—.”
10 Ua oo ina faateteleina le fefinauaʻiga, ona fefe ai lea o le alii e pule i ʻau ina neʻi latou fasiotia Paulo, ona ia poloaʻi lea i fitafita ina ia ō ifo ma toso ese o ia mai i tagata, ma avatu o ia i nofoaga o fitafita.
11 I lenā pō, ua tū mai ai le Alii iā te ia ma fetalai mai: “Ia e lototele!+ Auā e pei ona e molimau māeʻaeʻa atu e uiga iā te aʻu i Ierusalema, e ao foʻi la ona e molimau atu i Roma.”+
12 Ua oo i le aso e sosoo ai, ona taupulepule lea o tagata Iutaia ma fai la latou tautoga,* e lē toe aai ma feinu seʻia o latou fasiotia Paulo.
13 E sili atu i le toʻa 40 tamāloloa na faia lenei tautoga.
14 Ua latou ō atu i le ʻaufaitaulaga sili ma toeaina ma faapea atu: “Ua matou matuā tautō* e lē toe aai seʻiloga ua matou fasiotia Paulo.
15 O le mea lea, e tatau ona outou fai atu ma alii o le Faamasinoga Sili i le alii e pule i ʻau, ina ia aumai o ia iā te outou, e peiseaʻī o loo outou mananaʻo e iloilo atili lana mataupu. Ae o le a matou nofosauni e fasioti o ia a o leʻi latalata mai.”
16 Ae ina ua iloa e le tama a le tuafafine o Paulo o loo latou taupulepule e puʻe o ia, ona alu atu lea i le nofoaga o fitafita, ma faamatala atu iā Paulo.
17 Ona valaau atu lea o Paulo i se taʻitaʻiʻau ma faapea atu iā te ia: “Ia ave lenei tauleʻaleʻa i le alii e pule i ʻau, auā o loo iai se mea o loo ia fia taʻuina atu iā te ia.”
18 Ona ave ai lea e lenei tagata o ia i le alii e pule i ʻau ma faapea atu: “Na valaau mai le pagota o Paulo iā te aʻu ma talosaga mai, e aumai lenei tauleʻaleʻa, ona e iai se mea o loo ia fia taʻuina atu iā te oe.”
19 Ona tago lea o le alii e pule i ʻau i lona lima ma taʻitaʻi ese o ia, ua na o i laʻua, ona ia fesili atu lea: “O le ā le mea o e fia taʻu mai iā te aʻu?”
20 Ua ia faapea mai: “Ua lotogatasi tagata Iutaia e talosaga atu iā te oe, ia aumai Paulo i luma o le Faamasinoga Sili a taeao, e peiseaʻī o loo latou fia iloa atili e faatatau i lana mataupu.+
21 Ae aua lava neʻi e talitonu iā i latou, auā e sili atu i le toʻa 40 o latou tagata o loo lamalama iā te ia, ma ua faia la latou tautoga* e lē toe aai ma feinu seʻia o latou fasiotia o ia.+ O loo latou nofosauni nei ma faatalitali mo se faatagaga mai iā te oe.”
22 Ona tuu atu lea e le alii e pule i ʻau o le tauleʻaleʻa e alu, ma faatonuina o ia: “Aua neʻi e taʻuina atu i se tasi o lea ua uma ona e faailoa mai nei mea iā te aʻu.”
23 Ua ia aami ni taʻitaʻiʻau se toʻalua ma faapea atu: “Ia sauni ni fitafita se toʻa 200 e savavali atu i Kaisareia, ma ni tagata tiʻetiʻe solofanua se toʻa 70, ma ni tagata e tau i tao se toʻa 200, i le itula e tolu* i le pō.
24 Ia sauni foʻi ni solofanua e faatiʻetiʻe ai Paulo, ina ia momoli saogalemu atu ai o ia i le kovana o Filiki.”
25 Ua ia tusia foʻi se tusi e faapea:
26 “O aʻu o Kalaotio Lusia, o loo ou tusi atu i lau afioga le Kovana o Filiki: Talofa lava!
27 O le tamāloa lenei na puʻeina e tagata Iutaia, ma na toetoe lava a latou fasiotia o ia. Ae na vave ona ou oo mai ma le ʻaufitafita ma laveaʻi o ia,+ auā ua ou iloa o ia o se tagata Roma.+
28 Na ou aveina o ia i la latou Faamasinoga Sili, ona o loʻu fia iloa o le māfuaaga tonu ua latou molia ai o ia.+
29 Ua ou iloa ua tuuaʻia o ia ona o finauga e tusa ma la latou Tulafono,+ ae e leai se mea e tasi ua molia mai ai, ua tatau ai ona oti pe e faafalepuipuiina o ia.
30 Ae ona ua faailoa mai iā te aʻu le faufauga ua faia i lenei tamāloa,+ ua ou auina vave atu ai o ia iā te oe, ma poloaʻi foʻi ē ua molia o ia, ina ia fai atu la latou molimau faasaga iā te ia i ou luma.”
31 Ona ave lea o Paulo+ e nei fitafita e tusa ai ma le faatonuga, ma aumaia o ia i Anipateri i le pō.
32 Ona latou tuu atu lea o tagata tiʻetiʻe solofanua e ō pea ma ia i le aso e sosoo ai, ae ua latou toe foʻi atu i le nofoaga o fitafita.
33 Ua taunuu atu tagata tiʻetiʻe solofanua i Kaisareia, ua momoli atu le tusi i le kovana, ma tuu atu foʻi Paulo iā te ia.
34 Ua faitau ai o ia, ma fesili atu po o fea le itumalo e sau ai, ona ia iloa ai lea e sau Paulo mai i Kilikia.+
35 Ua ia faapea mai: “Ou te matuā faalogologo lelei atu pe a taunuu mai ē ua molia oe.”+ Ona ia poloaʻi atu lea ina ia leoleoina o ia i le maota o Herota.
Faamatalaga Pito i Lalo
^ Po o le “faalauiloa atu i le lautele e le ʻau Faresaio.”
^ E faasino atu i se tautoga, lea e aofia ai se faasalaga o se fetuu pe afai e lē tausia le tautoga.
^ E faasino atu i se tautoga, lea e aofia ai se faasalaga o se fetuu pe afai e lē tausia le tautoga.
^ E faasino atu i se tautoga, lea e aofia ai se faasalaga o se fetuu pe afai e lē tausia le tautoga.
^ E faasino atu i le pe ā o le 9 i le pō.
