O le Tusi i Faapotopotoga i Kalatia 4:1-31
4 Ou te fai atu foʻi e faapea, a o laʻitiiti le suli, e leai se mea e ese ai o ia ma le pologa, e ui lava o ia o le alii o mea uma lava,
2 ae ua vaavaaia o ia e ē tausia o ia ma auauna pule seʻia oo i le aso na muaʻi tofia e lona tamā.
3 Na faapena foʻi i tatou a o tatou lāiti, na faapologaina i tatou i mataupu faavae a le lalolagi.+
4 Ae ina ua atoa le taimi na atofaina, ona auina mai ai lea e le Atua o lona Alo, o lē na fanau mai i se fafine+ ma sa nofo i le tulafono,+
5 ina ia faasaʻolotoina e ia i latou o nonofo i le tulafono+ e ala i le faatauina o i latou, ina ia avea ai i tatou ma ataliifai.+
6 Ona o outou o atalii, ua auina mai ai e le Atua i totonu o o tatou loto le agaga paia+ lea na tuuina atu i lona Alo, ma ua alaga mai e faapea: “Ava,* le Tamā e!”+
7 O lea, ua lē toe avea ai oe ma pologa, a o le atalii; afai o oe o le atalii, o oe foʻi o le suli ona o le Atua.+
8 Peitaʻi, a o outou lē iloa le Atua, na outou nofo pologa ai i mea e lē o ni atua.
9 A o lenei ua outou iloa le Atua, ae o le mea tāua, ua iloa outou e le Atua, e faapefea la ona outou toe liliu atu i mea muamua e faatauvaa+ ma lē aogā, ma mananaʻo e toe fai outou ma pologa i na mea?+
10 Ua outou matuā naunau e faamanatu aso, ma masina,+ ma tau,* ma tausaga.
11 Ou te popole iā te outou, ina neʻi iʻu ina lē aogā aʻu taumafaiga na faia iā te outou.
12 Uso e, ou te ʻaiʻoi atu iā te outou, ia outou pei o aʻu, auā na ou pei foʻi o outou.+ E leai se mea sesē na outou faia iā te aʻu.
13 Ae ua outou iloa, o loʻu maʻi na ala ai ona ou muaʻi folafola atu le tala lelei iā te outou.
14 E ui lava o se tofotofoga iā te outou loʻu maʻi, ae e tou te leʻi agaleaga pe ʻinoʻino* mai iā te aʻu; ae ua outou talia aʻu faapei o se agelu a le Atua, e pei foʻi o Keriso Iesu.
15 O fea ea lo outou fiafia na iai muamua? Auā ua ou mautinoa, pe ana outou mafaia, semanū ua outou sali ese o outou mata ma aumai iā te aʻu.+
16 O lea la, po ua avea ea aʻu ma o outou fili auā ua ou taʻu atu le upu moni iā te outou?
17 E lē lelei le māfuaaga ua latou naunau atu ai ina ia outou ʻau ma i latou; ua latou mananaʻo e vavaeese outou mai iā te aʻu, ina ia outou naunau e mulimuli atu iā i latou.
18 Ae e lelei pe a naunau atu isi iā te outou i taimi uma lava ona o se māfuaaga lelei, ae e lē na o le taimi lea ou te iai iā te outou,
19 si aʻu fanau e,+ ua ou toe tigā ona o outou, e pei o le tigā o se fafine o le a fanau, seʻia tino mai* Keriso i totonu iā te outou.
20 Ae maʻimau pe ana tatou faatasi i le taimi nei, ma ou tautala atu iā te outou i se leo mālū, auā ua ou lē iloa le mea a fai iā te outou.
21 Ia taʻu mai iā te aʻu, o outou na o ē e fia nonofo i le tulafono, Pe e tou te lē o faalogo atu ea i le Tulafono?
22 O se faaaʻoaʻoga, ua tusia na maua e Aperaamo ni atalii se toʻalua, o le tasi e mai i le auauna teine+ a o le isi e mai i le fafine saʻoloto;+
23 a o le tama a le auauna teine na fanau mai i le auala masani,*+ a o le tama a le fafine saʻoloto na ala mai i se folafolaga.+
24 O nei mea o se tala faafaatusa; auā e faasino atu nei fafine i ni feagaiga se lua, o le tasi na faia i le mauga o Sinai,+ lea na aumaia ai ni fanau e fai ma pologa, o Akara lea.
25 Ua faasino atu Akara iā Sinai,+ o se mauga i Arapi, ma ua tutusa o ia ma Ierusalema i aso nei, auā o loo nofo pologa o ia ma lana fanau.
26 A o Ierusalema i lugā e saʻoloto o ia, ma o ia o lo tatou tinā.
27 Auā ua tusia: “Ia fiafia oe le fafine pā e lē fanau; inā alaga ia ma le olioli oe le fafine e leʻi tigā i le tigā a fanau; auā e toʻatele atu le fanau a le fafine ua tuulafoaʻiina, nai lo o le fafine ua iai lana tane.”+
28 O lenei uso e, o outou o le fanau o le folafolaga e pei foʻi o Isaako.+
29 Ae i na aso, e pei ona sauā o lē na fanau mai i le auala masani* i lē na fanau mai e ala i le agaga,+ e faapena foʻi aso nei.+
30 Peitaʻi, o le ā le mea ua fai mai ai tusitusiga paia? “Inā tuliese ia le auauna teine ma lana tama, auā e lē mafai ona avea uma ma suli le tama a le auauna teine faatasi ma le tama a le fafine saʻoloto.”+
31 O le mea lea le ʻauuso e, o i tatou o fanau a le fafine saʻoloto, ae e lē o le auauna teine.
Faamatalaga Pito i Lalo
^ O se upu Eperu po o se upu Arama o lona uiga “Le Tamā e!”
^ E faasino atu i aso ua atofaina mo se fuafuaga faapitoa.
^ Po o le “tuufeanu.”
^ Po o le “afuafua.”
^ Ele., “fanau mai i la le tino.”
^ Ele., “fanau mai i la le tino.”
