O le Tusi Paia ua tusia ai feʻau a le Atua mo i tatou uma. E tatau ona tatou suʻesuʻe i ai ina ia iloa ai lona Tusitala. (Ioane 17:3; 2 Timoteo 3:16) Ua faailoa mai ai e Ieova le Atua lona finagalo mo tagata ma le lalolagi o loo nonofo ai.​—Kenese 3:15; Faaaliga 21:3, 4.

E leai se isi tusi e telē atu lona aafiaga i olaga o tagata nai lo o le Tusi Paia. Ua uunaʻia e le Tusi Paia i tatou e faaatagia atu uiga o Ieova o le alofa, alofa mutimutivale, ma le tigā alofa. O loo aumaia ai le faamoemoe lea e fesoasoani i tagata e onosaʻi ai e oo lava i mafatiaga ogaoga. Ua faaauau foʻi ona faaalialia ai mea o lenei lalolagi ia e feteenaʻi ma le finagalo lelei atoatoa o le Atua.​—Salamo 119:105; Eperu 4:12; 1 Ioane 2:15-17.

Na muaʻi tusia le Tusi Paia i le gagana Eperu, Arama ma le Eleni, ma ua faaliliuina le tusi atoa po o se vaega i le silia i le 3,000 gagana. O le tusi lenei e pito i tele gagana ua faaliliu ai ma kopi ua tufatufaina. E lē faateʻia ai i tatou, auā ua valoia i le Tusi Paia: “O le a talaʻiina atu foʻi lenei tala lelei o le Malo [le feʻau autū o loo i le Tusi Paia] i le lalolagi atoa e fai ma molimau i atunuu uma, ona oo mai ai lea o le iʻuga.”​—Mataio 24:14.

O le amanaʻia o le tāua o le feʻau o le Tusi Paia, ua matou faia ai ma le matuā faaaloalo lenei teuteuga o le Tusi Paia. E matuā tāua iā i matou lo matou tiute tauave o le faaliliuina ma le saʻo o le feʻau o loo iai. O lo matou sini o le faia o se faaliliuga e lē gata e tausisi i uluaʻi tusitusiga o le Tusi Paia ae ia manino ma malamalamagofie. O nisi nei o mataupu o loo i Faaopoopoga, “Taʻiala i le Faaliliuina o le Tusi Paia,” “Vala o Lenei Faaliliuga ua Toe Teuteuina,” ma “Na Faapefea Ona Tatou Maua le Tusi Paia?” Ua faamatalaina ai nisi o taʻiala mo faaliliuga na mulimulitaʻia, faapea le faamatalaina o nisi vaega o lenei lomiga.

O ē e alolofa iā Ieova le Atua ma tapuaʻi iā te ia, e latou te naunau i se faaliliuga o le Afioga a le Atua e saʻo lelei ma malamalamagofie. (1 Timoteo 2:4) O lea, ua matou saunia ai lenei toe teuteuga i le gagana Samoa, e tusa ai ma lo matou faanaunauga ina ia faaliliu i le tele o isi gagana. E matou te tatalo ma faamoemoe o le a aogā lenei Tusi Paia iā te oe le tagata faitau peleina, a o e taumafai e “saʻili i le Atua . . . ma maua o ia.”​—Galuega 17:27.