PE E mafai ona tumau faamaoni pea se tagata i le Atua pe a feagai ma tofotofoga ogaoga, ma foliga mai e leai ni meafaitino e maua i le usiusitaʻi i le Atua? Na lāgā lenā fesili ma na taliina e le tagata e igoa iā Iopu.

A o nofo pologa Isaraelu i Aikupito, sa nofo ai i le atunuu ua taʻua nei o Arabia se tauaiga o Aperaamo e igoa iā Iopu. I lenā taimi, na faapotopoto ai agelu i luma o le Atua, ma na alu atu ai ma Satani le agelu fouvale. Na faamatala atu e Ieova i luma o lenā faapotopotoga lona maufaatuatuaina o lana auauna faamaoni o Iopu. O le mea moni, na fetalai Ieova e leai se tagata e pei lona faamaoni o Iopu. Ae na taʻu atu e Satani, e pau le māfuaaga e auauna ai Iopu i le Atua ona o loo ia faamanuia ma puipuia Iopu. Na ia faapea atu foʻi, pe a aveesea mea uma o loo iā Iopu o le a faifai o ia i le Atua.

Na faataga ai e le Atua Satani e aveese muamua le tamaoaiga o Iopu, o lana fanau, ma faaoo le maʻi iā te ia. E leʻi iloa e Iopu o Satani na māfua ai nei mea uma, ma e leʻi malamalama pe aiseā ua faataga ai e le Atua nei mafatiaga e oo iā te ia. E ui i lea, e leʻi faifai Iopu i le Atua.

Na ō atu iā Iopu ni ana uō taufaasesē e toʻatolu. O loo i le tusi a Iopu lauga e tele a nei tamāloloa, lea na latou taumafai ai e faatalitonu Iopu, ua faasala o ia e le Atua ona o agasala na ia faia ae o loo ia natiaina. Na latou faapea mai foʻi e leai se fiafia o le Atua i ana auauna, ma e na te lē talitonuina i latou. Na teena e Iopu o latou manatu sesē. Na taʻu atu ma le mautinoa e Iopu e tumau pea lona faamaoni i le Atua seʻia oo i le oti.

Ae na sesē Iopu i lona taumafai e soona taʻutonuina o ia. Na faalogologo se tama talavou e igoa iā Eliu i le finauga atoa a Iopu ma ana uō taufaasesē, ma na ia avatu ai se aʻoaʻiga. Na faasaʻo e Eliu Iopu ona e leʻi malamalama atoatoa i le matuā tāua o le faasilisilia o le pule silisili ese a Ieova le Atua, nai lo o le faasilisilia o se tagata. Na avatu foʻi e Eliu se aʻoaʻiga malosi i uō taufaasesē a Iopu.

Mulimuli ane, na faasaʻo ai e Ieova manatu o Iopu. Na faasino atu e Ieova iā Iopu e ala i ana foafoaga ofoofogia, le matuā faatauvaa o le tagata pe a faatusatusa i le silisili ese o le Atua. Na talia ma le lotomaulalo e Iopu le faasaʻoga mai i le Atua. Talu ai e “alofa faapelepele ma alofa mutimutivale” Ieova, o lea na ia toe faafoʻisia ai le soifua mālōlōina o Iopu, na ia faaluaina foʻi lona tamaoaiga, ma faamanuiaina o ia i se fanau e toʻasefulu. (Iakopo 5:11) O le luʻi a Satani, e leai se tagata e tumau faamaoni i le Atua pe a tofotofoina. Peitaʻi, na tumau faamaoni pea Iopu iā Ieova e ui i tofotofoga ogaoga, ma na ia taulau i le taliina o lenā luʻi.

​—Faavae mai i le tusi o Iopu.