LESONA 4
Sa Ia Faafiafiaina Lona Tamā ma Ieova
O le ā le tautoga a Iefata na fai iā Ieova?
Na faataunuu e le afafine o Iefata le tautoga a lona tamā e ui lava ina faigatā
Po o e iloa atu le teine o loo i le ata?— O ia o le afafine o Iefata. E lē o taʻuina mai i le Tusi Paia lona igoa, ae pau le mea e tatou te iloa, sa ia faafiafiaina lona tamā ma Ieova. Seʻi o tatou iloilo nisi o faamatalaga e uiga iā te ia ma lona tamā.
O Iefata o se tamā lelei, ma na ia aʻoaʻoina pea lona afafine e uiga iā Ieova. O ia o se tagata malosi ma o se taʻitaʻi lelei. O lea na talosaga atu ai Isaraelu iā te ia, pe mafai ona ia taʻitaʻia i latou e tau faasaga i o latou fili.
Na tatalo Iefata iā Ieova e fesoasoani mai ina ia manumalo i le taua. Na tautō o ia afai e manumalo, o le tagata muamua e sau i fafo mai i lona fale e faafeiloaʻi o ia, o le a tuuina atu iā Ieova. O le a nofo ma auauna lenā tagata i lona olaga atoa i le faleʻie paia. O i inā sa ō atu i ai tagata e tapuaʻi iā Ieova. O le iʻuga, na manumalo Iefata. Ina ua toe foʻi la Iefata i lona aiga, e te iloa o ai na muamua sau i fafo e faafeiloaʻi o ia?—
Ioe, o lona afafine! Sa faanoanoa tele Iefata ona o lea o le a alu ese atu lona afafine e toʻatasi, auā e leai foʻi sona atalii. Ae manatua, na faia e Iefata se tautoga iā Ieova. O lea na fai atu ai lona afafine iā te ia: ʻTamā, e tatau ona e faataunuu lau tautoga na fai iā Ieova.’
O tausaga taʻitasi e ō atu ai uō a le afafine o Iefata e asiasi iā te ia
Sa faanoanoa foʻi le afafine o Iefata. Na ia iloa o le a lē mafai ona faaipoipo pe fai sana fanau a o auauna i le faleʻie paia o Ieova. Peitaʻi, sa sili atu ona tāua iā te ia le faataunuu o le tautoga a lona tamā, ina ia faafiafia ai Ieova. O lea na ia tuua ai loa lona tamā, ae alu atu ma nofo i le faleʻie paia i lona olaga atoa.
Pe na faafiafiaina e lenei tamaʻitaʻi lona tamā ma Ieova?— Ioe! Pe afai e te usitaʻi ma alofa iā Ieova, o le a pei la oe o le afafine o Iefata. O le a e faafiafiaina Ieova ma ou mātua.
