Ina ua mavae aso e sefulu talu ona afio aʻe Iesu i le lagi, ona liligiina ifo lea o le agaga paia i le aso o le Penetekoso. Ua faamaonia mai ai, ua iai nei Iesu i le lagi. Ae e lē o toe umi ona maua foʻi lea o se isi faamaoniga o lea vala. A o leʻi fetogia le soo o Setefano ona o lona molimau atu ma le faamaoni, na faapea atu o ia: “Faauta! ua ou iloa atu ua avanoa le lagi ma le Atalii o le tagata o loo tū i le itu taumatau o le Atua.”—Galuega 7:56.

A o faatasi Iesu i le lagi ma lona Tamā, e faatali o ia i se poloaʻiga maʻoti na valoia mai i le Afioga a le Atua. Na faagaeeina Tavita ina ia tusi: “Ua fetalai mai Ieova i loʻu Alii [Iesu]: ʻIa e nofo i loʻu itu taumatau seʻia ou faia ou fili ma mea e tū ai ou vae.’” Pe a māeʻa le vaitaimi lea e faatalitali ai Iesu, ona ʻalu ai lea o ia ma pule i totonu o ona fili.’ (Salamo 110:1, 2) Ae o le ā o le a faia e Iesu mai i le lagi, a o faatalitali i le taimi e faalaa mai ai ma faaumatia ona fili?

Na faavaeina le faapotopotoga Kerisiano i le Penetekoso 33 T.A. Na amata ona pule mai ai Iesu mai i le lagi i ona soo ua faauuina i le agaga paia. (Kolose 1:13) Na ia taʻitaʻia i latou i le talaʻiga, ma sauniunia i latou mo la latou matafaioi i le lumanaʻi. O le ā lenā matafaioi? O i latou e faamaoni pea seʻia oo i le oti, o le a toe faatutūina aʻe i le lagi ma auauna o ni tupu faatasi ma Iesu i le Malo.

O se faaaʻoaʻoga mataʻina o se tasi o le a avea ma tupu i le lumanaʻi, o Saulo, lea na iloa e le toʻatele i lona igoa Roma o Paulo. O ia o se tagata Iutaia, ma na umi se taimi o maelega i le Tulafono a le Atua. Ae na matuā taʻitaʻisesēina o ia e taʻitaʻi lotu Iutaia, ma iʻu ai lava ina ia faatagaina le fetogia o Setefano i maa. “Ua faamataʻu atu pea Saulo i soo o le Alii,” ona agaʻi atu lea i Tamaseko. Na ia maua le faatagaga mai i le ositaulaga sili o Kaiafa e puʻe ai soo o Iesu, ma toe ave i latou i Ierusalema. (Galuega 7:58; 9:1) Peitaʻi, a o iai o ia i le ala agaʻi i Tamaseko, na suluia faataaliʻoliʻo o ia i se malamalama tele ma paʻū ai i le eleele.

Na faapea mai se leo mai i le lagi: “Saulo, Saulo e, aiseā ua e faasauā mai ai iā te aʻu?” Na fesili atu Saulo: “O ai ea oe le Alii e?” Na faapea mai lenei leo: “O aʻu o Iesu o lē ua e faasauā i ai.”—Galuega 9:4, 5.

Na fetalai atu Iesu iā Saulo ina ia alu atu i Tamaseko ma faatali ai mo nisi faatonuga. Peitaʻi, sa tatau ona taʻitaʻiina atu o ia i le aai, ona ua faatauasoina o ia i le malamalama lea na faavavega ona susulu mai. I se isi faaaliga, na faaali atu ai Iesu iā Anania, o se tasi o ona soo e nofo i Tamaseko. Na taʻu patino atu e Iesu iā te ia le auala e alu i ai ina ia saʻili Saulo. Na popole Anania, ae na faamautinoa atu e Iesu iā te ia: “O lenei tagata o le ipu ia ua filifilia mo aʻu, e talaʻi atu loʻu igoa i nuu ese faapea foʻi ma tupu, ma le fanauga a Isaraelu.” Ina ua toe lelei le vaai a Saulo, “ona amata loa lea ona ia talaʻia Iesu” i Tamaseko “e faapea, o Ia lenei o le Alo o le Atua.”—Galuega 9:15, 20.

O le lagolagosua a Iesu, na faaauau ai pea ona faia e Paulo ma isi faievagelia le galuega talaʻi lea sa ia amataina. Na matuā faamanuiaina i latou e le Atua. Pe tusa ma le 25 tausaga talu ona faaali atu Iesu iā Paulo i le ala i Tamaseko, na ia tusi ai e faapea ua talaʻiina atu le tala lelei “i foafoaga uma i lalo o le lagi.”—Kolose 1:23.

I tausaga na mulimuli ane ai, na faaali atu ai e Iesu i le aposetolo ua ia alofagia o Ioane, se faasologa o vaaiga lea e maua i le tusi o Faaaliga. O nei vaaiga, ua peiseaʻī ai na soifua pea Ioane e vaai iā Iesu, a o afio mai o ia i le mana o le Malo. (Ioane 21:22) ʻOna ua faatumuina Ioane i le agaga, ua oo ai o ia i le aso o le Alii.’ (Faaaliga 1:10) O afea o le a amata ai le aso o le Alii?

O le suʻesuʻeina ma le māeʻaeʻa o valoaga o le Tusi Paia, ua faamaonia ai na amata “le aso o le Alii” i le 1914. I lenā tausaga, na amata ai le Taua Muamua a le Lalolagi. Talu mai lenā tausaga, ua matuā faateteleina ai taua, faamaʻi, oge, mafuiʻe ma isi faamaoniga o le faataunuuga sili o “le faailoga,” lea na taʻu atu e Iesu i ona aposetolo e faatatau i lona “faatasi mai” ma “le iʻuga.” (Mataio 24:3, 7, 8, 14) O loo talaʻia le tala lelei o le Malo i le lalolagi atoa, ae e lē na o vaipanoa na pulea e le emepaea o Roma.

Na faagaeeina Ioane e faamatala le uiga o na mea e faapea: “Ua iai nei le faaolataga, ma le mana, ma le malo o lo tatou Atua, ma le pule a lona Keriso.” (Faaaliga 12:10) Ioe, e moni le Malo o le Atua i le lagi lea na talaʻia e Iesu.

O se tala lelei lenā mo soo faamaoni uma o Iesu. E mautinoa le faalaeiauina o i latou i upu nei a Ioane: “O le mea lea ia olioli ai le lagi ma outou o loo nonofo ai! Oi talofa i le laueleele ma le sami, auā ua alu ifo iā te outou le Tiapolo ua lotoa tele, auā ua na iloa ua puupuu lona taimi.”—Faaaliga 12:12.

Ua manino mai e lē o toe nofo Iesu i le itu taumatau o lona Tamā ma faatalitali ai. Ua pule nei o ia o se Tupu, ma e lē o toe umi ona ia tafiesea loa lea o ona fili uma. (Eperu 10:12, 13) O ā mea mataʻina o le a tutupu e tatou te tulimataʻia?