Faai‘uga
“Ia faaaʻoaʻo iā i latou o ē ua maua le folafolaga ona o lo latou faatuatua ma le onosaʻi.”—EPERU 6:12.
1, 2. Aiseā e tāua ai ona atiaʻe lo tatou faatuatua i le taimi nei? Aumai se faataʻitaʻiga.
FAATUATUA. O se upu o loo faamatala mai ai se uiga matagofie. Peitaʻi, pe a tatou vāai pe faalogo i lenei upu, e tatau ona tatou mafaufau ai i se isi upu, o le “faanatinati.” Auā a leai se faatuatua, e manaʻomia ona tatou gaoioi ma le faanatinati ina ia maua, ae a tatou maua le faatuatua, e tatau ona tatou faanatinati e puipuia ma atiaʻe. Aiseā?
2 Seʻi faapea o loo e savalia se toafa telē, ma ua e galala i le fia inu. Pe a e tau atu i se nofoaga o loo maua ai le suāvai, e faia au taumafaiga uma ina ia aua neʻi mitiia e le lā. E manaʻomia ona toe utu mai ni vai ina ia lava ai lou malosi e faaauau ai lau malaga. O loo tatou ola ma soifua i se lalolagi e leai se naunau e tapuaʻi iā Ieova, ma ua amata ona mou atu le faatuatua. E pei lava o le vai na taʻua i le faataʻitaʻiga, e manaʻomia foʻi ona tatou gaoioi ma le faanatinati e puipui ma toe faamalosia lo tatou faatuatua. E lē mafai ona tatou ola e aunoa ma le vai, e faapena foʻi ona tatou vaivai faaleagaga pe a leai se faatuatua.—Roma 1:17.
3. O le ā ua saunia e Ieova e faamalosia ai lo tatou faatuatua, ma o ā manatu e lua e tatau ona tatou manatua?
3 E silafia e Ieova le faanatinati e tatou te manaʻomia ai le faatuatua, ma e na te silafia foʻi le faigatā o le atiaʻe ma faatumauina o lenā faatuatua i aso nei. O le māfuaaga lea ua ia aumaia ai faaaʻoaʻoga o i latou na faaalia le faatuatua, e tatou te faaaʻoaʻo i ai. Na faagaeeina e Ieova Paulo ina ia tusi: “Ia faaaʻoaʻo iā i latou o ē ua maua le folafolaga ona o lo latou faatuatua ma le onosaʻi.” (Epe. 6:12) Ua faalaeiauina i tatou e le faalapotopotoga a Ieova, e taumafai malosi e faaaʻoaʻo i tane ma fafine faamaoni, e pei o i latou sa suʻesuʻeina i lenei tusi. O le ā la e tatau ona tatou faia? Ia manatua manatu nei e lua: (1) Ia faamalosia pea lo tatou faatuatua; (2) ia tāmau pea i o tatou mafaufau lo tatou faamoemoe.
4. Ua faapefea ona faamaonia o Satani le fili o le faatuatua, ae aiseā e lē tatau ai ona tatou faavaivai?
4 Ia faamalosia pea lou faatuatua. O loo iai le fili sili o le faatuatua—o Satani. Ua ia suia lenei faiga o mea i se lalolagi e aunoa ma le faatuatua. E sili atu lona malosi i lo o i tatou. Pe e tatau ai la ona tatou faavaivai ma manatu e lē mafai lava ona toe atiaʻe ma faamalosia lo tatou faatuatua? E leai. O Ieova o le Uō sili mo i latou o loo saʻili atu mo le faatuatua moni. Ua faamautinoa mai e Ieova, e mafai ona tatou tetee atu i le Tiapolo ona o loo ia ʻau ma i tatou. (Iako. 4:7) E tatou te tetee atu i le Tiapolo i aso taʻitasi, e ala i le faamalosia ma atiaʻe lo tatou faatuatua. E faapefea?
5. Na faapefea ona atiaʻe e auauna faamaoni i taimi ua mavae le faatuatua? Faamatala.
5 E pei ona tatou aʻoaʻoina, sa tatau i auauna faamaoni a Ieova i taimi o le Tusi Paia ona atiaʻe le uiga o le faatuatua. Na faamaonia i le auala na latou ola ai, o le faatuatua o se vala o le fua o le agaga o Ieova. (Kala. 5:22, 23) Sa latou tatalo mo le fesoasoani, ma sa faaauau pea ona faamalosia e Ieova lo latou faatuatua. Seʻi o tatou faaaʻoaʻo iā i latou, ma tāmau i mafaufau e foaʻi mai e Ieova lona agaga paia i ē talosaga atu, ma gaoioi e ōgatusa ma a latou tatalo. (Luka 11:13) O ā nisi gaoioiga e tatau ona fai?
6. E faapefea ona tatou maua aogā mai i le suʻesuʻeina o tala i le Tusi Paia?
6 O loo tele pea isi faaaʻoaʻoga mataʻina o le faatuatua o loo iai i le Tusi Paia, e ese mai i faaaʻoaʻoga sa suʻesuʻeina i lenei tusi. (Faitau le Eperu 11:32.) E lē mafai ona faamalosia lo tatou faatuatua, pe a faatopelau le faitauina o nei tala mai le Tusi Paia. Pe a faaalu se taimi e faia ai suʻesuʻega loloto i nei faaaʻoaʻoga taʻitasi ma manatunatu loloto i ai, e tele ni manatu aogā e maua mai ai. E matuā pāʻia o tatou loto, pe a tatou manatua e lē lelei atoatoa foʻi na tane ma fafine “e pei o i tatou.” (Iako. 5:17) E tatou te malamalama foʻi la i o latou faalogona ina ua latou feagai ma luʻi ma faigatā e pei ona tatou fesagaʻia.
7-9. (a) Faamata o ā ni faalogona e ono iai i tane ma fafine faatuatua i taimi ua mavae i le auala o loo tatou tapuaʻi ai iā Ieova i aso nei? (e) Aiseā e tāua ai le faamalosia pea o lo tatou faatuatua?
7 E faamalosia foʻi lo tatou faatuatua i filifiliga ma gaoioiga e tatou te faia. Ua faapea mai le Iakopo 2:26, ʻe mate le faatuatua pe a leai ni galuega.’ Seʻi faaāta le olioli o tane ma fafine na tatou talanoaina, pe ana tofia i latou e faia le galuega ua tuu mai e Ieova iā i tatou i aso nei.
8 O se faaaʻoaʻoga, o ā ni faalogona o Aperaamo pe ana faatonuina o ia e tapuaʻi atu iā Ieova i Maota o Sauniga ma tauaofiaga tetele, lea e faamatalaina auʻiliʻili ai folafolaga na ia iloa “mamao atu,” nai lo o le ofoina atu o ni taulaga i se fata faitaulaga i le toafa? (Faitau le Eperu 11:13.) Ae faamata o ā ni faalogona o Elia pe ana faatonuina o ia e asiasi atu i tagata ma faaoo atu i ai se feʻau faamāfanafanaloto, nai lo o le faasalaina o perofeta pepelo a Paala a o ia auauna iā Ieova i lalo o le pulega a se tupu amioleaga? E mautinoa lava e talia ma le fiafia e nei tane ma fafine faatuatua nei tofiga, e auauna ai iā Ieova e pei ona tatou faia i aso nei.
9 O lea, ia faaauau pea ona faamalosia lo tatou faatuatua, i filifiliga ma gaoioiga e tatou te faia. O le faia faapea, ua tatou faaaʻoaʻo ai iā i latou o loo taʻua i le Afioga faagaeeina a le Atua na faaalia le faatuatua. E pei ona taʻua i le Faatomuaga, o le a pei ai i latou o ni a tatou uō mamae. Peitaʻi, a o faagasolo taimi o le a avea moni i latou ma a tatou uō mamae.
10. O le ā se mea mataʻina o le a tatou olioli ai i le Parataiso?
10 Ia tāmau pea i o tatou mafaufau lo tatou faamoemoe. Sa mafai ona faamalosia le faatuatua o auauna faamaoni i taimi ua mavae, ona o le taulaʻi atu pea i lo latou faamoemoe. Ae faapefea oe? Seʻi faaāta le olioli pe a faafeiloaʻia auauna faamaoni a le Atua, i le taimi e latou te ʻtoetutū mai ai o ni tagata amiotonu.’ (Faitau le Galuega 24:15.) O ā ni mea e te fia fesili atu ai iā i latou?
11, 12. I le lalolagi fou, o ā fesili e te ono fesili ai i nisi o auauna faamaoni o loo taʻua i le palakalafa?
11 Pe a e feiloaʻi iā Apelu, pe e te naunau e fesili i ai pe na faapeʻī uiga o ona mātua? Atonu foʻi e te fesili: “Pe na e talanoa i kerupi sa leoleoina le ala i le faatoʻaga i Etena? Pe na la tali mai?” Ae faapefea Noa? E te ono fesili atu: “Pe na e lagona le fefe i le ʻau Nefilimi? Na faapefea ona e vaavaaia meaola uma sa iai i le vaa?” Pe a e feiloaʻi iā Aperaamo, e te ono fesili atu: “Pe na iai se lua fesootaʻiga ma Semu? O ai na aʻoaʻoina oe e faatatau iā Ieova? Pe sa faigatā mo oe ona tuua Uro?”
12 Iloilo foʻi nisi o fesili atonu e te fia fesili ai i fafine faamaoni o le a toetutū mai. “Ruta, o le ā na uunaʻia oe e avea ai o se tagata tapuaʻi o Ieova?” “Apikaila, pe na e fefe e faailoa iā Napalu sa e fesoasoani iā Tavita?” “Eseta, o le ā na tupu iā oulua ma Moretekai e ese mai faamatalaga o loo i le Tusi Paia?”
13. (a) Faamata o ā ni fesili e ono fesiligia ai oe e i latou e toetutū mai? (e) O ā ni ou faalogona pe a e toe feiloaʻi ma tane ma fafine faamaoni i taimi ua mavae?
13 E mautinoa e tele foʻi ni fesili e fia fesili mai ai na auauna faamaoni iā te oe. E tatou te fiafia e faailoa atu iā i latou e faatatau i le iʻuga o nei aso e gata ai, ma le auala ua faamanuiaina ai e Ieova ona tagata i nei taimi faigatā. O le a uunaʻia ai i latou e aʻoaʻoina le auala na faataunuuina ai e Ieova ana folafolaga uma. I le lalolagi fou, o le a tatou faatasi ai ma auauna faamaoni a Ieova o loo taʻua i le Tusi Paia. O lea, ia faaauau pea ona faaaʻoaʻo i lo latou faatuatua, ma avea i latou o ni au uō mamae a o outou auauna faatasi iā Ieova.
