E mai iā Iulai 23 i le 31, na papatisoina ai tagata talaʻi i Ukraine ma isi atunuu na latou sosola atu i ai ina ua amata le taua, i le tauaofiaga 2022 “Tausisi i le Filemu”! E oo ane iā Aokuso 2, ua papatisoina le 1,113 tagata mai i Ukraine. Na faapea mai se uso i Ukraine: “E lē mafai e le taua ona taofia le galuega o le faia o isi ma soo, auā e pei ona folafola mai e Iesu: ʻOu te faatasi ma outou i aso uma lava.’”—Mataio 28:20.

E matou te fiafia e faailoa atu nisi nei o mea na tutupu.

E 63 tausaga o Natalia mai i Kreminna, i vaipanoa o Luhansk. Na amata ona suʻesuʻeina e Natalia ma lana fanau teine e toʻalua le Tusi Paia ma Molimau a Ieova, i vaitausaga o le 1990. Na agaʻigaʻi i luma lana fanau teine ma papatiso, ae e na te leʻi faia faapea. Ina ua amata le taua, na sosola atu se aiga Molimau a Ieova i se nofoaga saogalemu, ma na latou ō ma ave Natalia. Na nofo Natalia i se Maota mo Sauniga i Ivano-Frankivsk.

Na faapea mai Natalia: “Talu mai lava vaaiga mataʻutia o le pāpā o pomu, ou te leʻi toe lagona le fiafia. Na faaalia mai e uso ma tuafāfine le alofa moni ma tausia aʻu, o se mea ou te leʻi faatalitalia. O le taimi lenā na toe faamanatu mai ai loʻu alofa mo Ieova. Na ou faitauina e lē aunoa le Tusi Paia, ma na amata e se tuafafine laʻu suʻesuʻega faale-Tusi Paia i le tusi Se Olaga Fiafia e Faavavau. O le mea moni, o ia o se meaalofa mai iā Ieova.” Ua faapea atili mai Natalia: “Ua ou matuā fiafia ona ua ou papatiso ma avea o se Molimau a Ieova. Ou te manaʻo ou te ola e ōgatusa ma le poloaʻiga silisili, o le ʻalofa iā Ieova loʻu Atua ma loʻu lotoatoa, ma loʻu ola atoa, ma loʻu mafaufau atoa.’”—Mataio 22:37.

E amata le taua o loo avea Olia mai i Cherkasy o se tagata talaʻi e leʻi papatiso. Iā Mati 6, na sosola atu ai i Polani ma lana tama teine ma le tama a lana tama teine. Na ia faapea mai: “Ina ua matou taunuu, e na o a matou ato lava mo faalavelave faafuaseʻi na iai, ae na tausia i matou e oʻu uso ma tuafāfine faaleagaga. O nei mea uma ua ou mautinoa ai e autasi le faalapotopotoga a Ieova ma o loo taʻitaʻia e lona agaga, ma na atili ai ona ou maumauaʻi e tuuina atu loʻu ola iā Ieova. Na fesoasoani mai o ia i taimi e sili ona faigatā, ma ua ou manaʻo e auauna ma faailoa atu loʻu lotofaafetai iā te ia.”

E 18 tausaga o Yulia mai i le vaipanoa o Donetsk. Na ola aʻe o ia i se aiga Molimau a Ieova ae e leʻi papatiso lava. Na ia taʻua se mea na tupu ina ua faatoʻā amata le taua. Na ia faapea mai: “A o oʻu taoto i lo matou fale, na ou iloa e mafai lava ona oo mai le oti i so o se taimi. Na faaleagaina uma le vaipanoa na matou nonofo ai, ae na matou sao mai lava. O lenā mea na tupu, faatasi ai ma le tatalo ma le manatunatu loloto i uiga o Ieova, na ou vavalalata atu ai iā te ia ma ou lē toe faatalatū ai e tuuina atu loʻu ola iā Ieova. O le tali mai o Ieova i aʻu tatalo na faailoa mai ai lona vavalalata mai iā te aʻu. I le taimi muamua, sa na o loʻu iloa lava o le Atua, ae o lenei ua ou atiaʻe le alofa mo ia.” Na papatiso Yulia iā Iulai 23.

Ina ua amata le taua, na sosola David o se talavou e 11 tausaga ma lo latou aiga i Siamani. Na avea o ia o se tagata talaʻi e leʻi papatiso ina ua iva ona tausaga. O loo ia galue nei ina ia ausia ona sini faaleagaga. Na ia faapea mai: “Na ou filifili e papatiso ona ou te alofa iā Ieova ma ou te manaʻo e avea ma ana uō. I le taimi o loʻu papatisoga, na oʻu tagi ona o loʻu fiafia i le avea ai ma vaega o le aiga o Ieova. Ou te fiafia e talanoa i tagata e faatatau iā Ieova ma lona finagalo mo tagata, ma o le isi la oʻu sini o le avea ma paeonia. Ou te manaʻo foʻi e auauna i oʻu uso ma tuafāfine i le faapotopotoga, ma e faamoemoe e iai se aso o le a avea ai aʻu ma auauna o le faiva. Ae o lou sini autū lava o le auauna i le Peteli. Na amata lava ona ou fia galue i le Peteli talu mai le taimi na ou asiasi ai i le ofisa o le lālā i Lviv i le 2018.”

Na avea Olena mai i Kyiv o se tagata talaʻi e leʻi papatiso i le 2011. E sefulu tausaga o avea o ia o se tagata e lē toe talaʻi. I le 2020, na asiasi atu toeaina ma avatu iā te ia le polosiua Ia Toe Foʻi iā Ieova. Na ia faapea mai: “Na amata loa ona toe fai laʻu suʻesuʻega faale-Tusi Paia ma ou toe auai i sauniga. E leʻi umi ae lē toe faia foʻi laʻu suʻesuʻega ma ou lē toe auai i sauniga. A o faagasolo le taua, na tali mai Ieova i aʻu tatalo ma na ou mātauina le auala na ia puipuia ai aʻu, faaalia mai lona alofa, ma aumaia le filemu o le mafaufau. Na ou sola atu i Romania ma feiloaʻi ai i isi Molimau a Ieova. O le alofa ma le manatu mamafa na faaalia mai e le ʻauuso, na pei o se palanikeke māfanafana o loo ufiufi ai aʻu e Ieova.” Na papatiso Olena iā Iulai 23. Na faaiʻu mai lana faamatalaga e faapea: “Ou te faafetai i le onosaʻi mai o Ieova ia te aʻu. O lenei ua ou iloa ai ʻo mea uma lava, ua ou maua le malosi mai i lē na foaʻi maia iā te aʻu le mana.’”—Filipi 4:13

O nisi nei o vaega na lipotia mai i Ukraine iā Aokuso 2, 2022. O nei fuainumera e fua i lipoti na maua mai i uso i Ukraine, ae atonu e maualuga atu le aofaʻiga saʻo ona e faigatā ona maua fesootaʻiga mai i vaega uma o le atunuu.

• 43 tagata talaʻi ua maliliu

• 97 tagata talaʻi ua faamanuʻalia

• 22,568 tagata talaʻi ua sosola ese mai i o latou fale

• 586 fale ua faaleagaina atoatoa

• 613 fale e tele mea ua faaleagaina

• 1,632 fale e itiiti mea ua faaleagaina

• 5 Maota mo Sauniga ua faaleagaina atoatoa

• 10 Maota mo Sauniga e tele mea ua faaleagaina

• 37 Maota mo Sauniga e itiiti mea ua faaleagaina

• 27 Komiti mo Fesoasoani Laveaʻi o loo iai i Ukraine

• 53,836 i latou na fesoasoani i ai Komiti mo Fesoasoani Laveaʻi e saʻili ni nofoaga saogalemu e nonofo ai

• 24,867 tagata talaʻi ua sosola atu i isi atunuu ma o loo fesoasoani i ai uso ma tuafāfine