Pe e Mafai Ona Filifili se Tasi e Lē Toe Avea o se Molimau a Ieova?

PLAY

Ioe. E mafai ona filifili se tasi e lē toe avea o se sui o la matou faalapotopotoga i auala nei e lua:

E ala i se talosaga aloaʻia. E mafai e se tasi ona faailoa mai lana filifiliga e lē toe manaʻo e avea o se Molimau a Ieova, a lē taʻu saʻo mai pe tusia se tusi.
E ala i gaoioiga. E mafai e se tasi ona faia se gaoioiga e faaalia ai e lē o toe manaʻo e avea o se Molimau a Ieova. (1 Peteru 5:9) O se faataʻitaʻiga atonu e auai atu o ia i se isi lotu, ma faailoa mai lona faanaunauga ina ia tumau pea ona avea o se vaega o lenā lotu.—1 Ioane 2:19.

Ae faapefea pe afai e lē o toe talaʻi se tasi pe e lē toe auai foʻi i a outou sauniga? Pe tou te vaai i lenā tagata o se tasi ua filifili e lē toe avea o se Molimau a Ieova?

E leai. O le filifili o se tasi e lē toe avea o se Molimau a Ieova pe vavae ese, e ese mai i le vaivai i le faatuatua. E masani o i latou e faavaivai pe e lē toe auai i la latou tapuaʻiga mo sina taimi, o loo mafatia i le lotovaivai ae e lē faapea ua latou lafoaʻia lo latou faatuatuaga. Nai lo o le ʻalofia o i latou, ae e matou te taumafai e avatu le faamāfanafanaga ma le lagolagosua iā i latou. (1 Tesalonia 5:14; Iuta 22) Pe a manaʻo le tagata i se fesoasoani, e taulamua toeaina o le faapotopotoga e avatu le fesoasoani faaleagaga.—Kalatia 6:1; 1 Peteru 5:1-3.

Peitaʻi, e lē o iai i toeaina le pule e faamalosia ai se tasi ina ia avea pea o se Molimau a Ieova. E fai e le tagata lana lava filifiliga e faatatau i lotu. (Iosua 24:15) E matou te talitonu o ē tapuaʻi i le Atua, e tatau ona faia ma le lotoatoa.—Salamo 110:3; Mataio 22:37.