E pe ā ma le 290 tagata faaliliu o loo nonofo i atunuu e ono i totonu o Mekisikō ma Amerika Tutotonu, ma o loo latou faaliliuina lomiga faale-Tusi Paia i gagana e silia ma le 60. Ua faia nei taumafaiga uma, auā pe afai e faitau tagata i lomiga faale-Tusi Paia i se gagana e faigofie ona malamalama i ai, e mafai ona pā‘ia ai o latou loto.​—1 Korinito 14:9.

Ina ia faaleleia atili le galuega faaliliu, ua siitia atu nisi o tagata faaliliu sa galulue i le ofisa o le lālā a Molimau a Ieova i le aai o Mekisikō, ma galulue i ofisa i vaipanoa o loo faaaogā ai le gagana o loo latou faaliliuina. O le ā le aogā o le faia faapea? Ua mafai ai e tagata faaliliu ona faaalu le tele o le taimi e talanoa ai ma tagatānuu o loo tautatala i le gagana o loo latou faaliliuina, ma faigofie ai ona latou saunia ni lomiga e faigofie ona malamalama i ai.

E faape‘ī manatu o tagata faaliliu i lenei suiga? Ua ta‘ua e Federico, o se tagata faaliliu i le gagana Guerrero Nahuatl: “I le toetoe sefulu tausaga sa ou iai i le aai o Mekisikō, e na o le tasi lava le aiga na ou maua e tautatala i la‘u gagana. Ae o le taimi lenei, e toetoe o tagata uma i taulaga e lata mai i le ofisa faaliliu, e tautatala i la‘u gagana!”

Ua faapea mai Karin, o sē e faaliliu i le gagana Low German i le ofisa faaliliu i Chihuahua, i Mekisikō: “O le nonofo i le vaipanoa e to‘atele ai tagata lotu Mennonite, ua ou malamalama ai i le gagana o loo masani ona latou faaaogā. E matou te nonofo ma faigaluega i se tama‘i taulaga, ma e masani ona ou vaaia ai i latou o le a maua aogā mai i la matou galuega faaliliu.”

Ua ta‘ua e Neyfi, o sē o loo galue i le ofisa faaliliu i Mérida i Mekisikō: “Pe a matou faia su‘esu‘ega faale-Tusi Paia i le gagana Maya, e matou te mātauina ai ni faaupuga o loo faigatā ona malamalama i ai tagata Maya. O lea e matou te sa‘ili ai se isi auala masani e mafai ona toe faaupu ai lenā faaupuga.”

O ā aogā ua maua e i latou o loo faitau i nei lomiga ua faaliliuina? Mātau se tasi o faaa‘oa‘oga: E toetoe 40 tausaga o auai e lē aunoa Elena, o sē e tautala i le gagana Tlapanec, i sauniga a Molimau a Ieova. E ui e le‘i malamalama o ia i sauniga ona sa faia i le gagana Sipaniolo, ae na ia faapea mai: “Na ou iloa e tāua ona ou alu i sauniga.” Peita‘i, ina ua faia se su‘esu‘ega faale-Tusi Paia a Elena e faaaogā ai polosiua i le gagana Tlapanec, sa tuputupu a‘e loa lona alofa mo le Atua, ma i‘u ina tuuina atu lona ola i le Atua ma papatiso i le 2013. Na faapea mai Elena: “Ou te faafetai iā Ieova ona o lona fesoasoani iā te a‘u ia malamalama i le Tusi Paia.”