Na ini den 30 yari di psa, furu sma ben feni taki sani ben e waka bun na mindri difrenti kondre na grontapu. Ma den sani di e psa nownow, e meki taki furu sma no e denki so moro.

•   „Sma e broko den ede taki a feti na Gaza o abra go na den tra kondre na ini a birti, vooral fa Israel nanga Hezbollah e bigin feti krosbei fu a grens fu Libanon.”​—Reuters, 6 yanuari 2024.

•   „Grupu sma di de ondro a makti fu Iran bigin feti na difrenti presi èn Iran bigin meki ala sortu fetsani baka di kan kiri bun furu sma. Boiti dati, Rosiakondre nanga China e wroko makandra nanga Iran now. Amerkankondre nanga son kondre na ini Europa e si ala den sani disi leki wan sani di kan tyari bigi probleem.”​—The New York Times, 7 yanuari 2024.

•   „Te now ete a feti di Rosiakondre e feti nanga Ukraini e broko a kondre dati.”​—UN News, 11 yanuari 2024.

•   „Na ekonomia nanga a srudati makti fu China e kon moro tranga, a nationalisme na ini Taiwan, èn a fasi fa China nanga Amerkankondre no man feni en nanga densrefi e meki taki makelek den kan kisi wan bigi trobi.”​—The Japan Times, 9 yanuari 2024.

 Bijbel e taki wan sani fu dyugudyugu di de na grontapu now? Den sani disi o meki taki wan grontapufeti psa baka?

 Bijbel no e taki fu wan spesrutu feti di wi e si na ini a ten disi. Ma a e taki krin dati ’feti ben o psa’ na ini a ten fu wi, di ben o meki taki freide no de moro na grontapu.​—Openbaring 6:4.

 A Bijbel buku Danièl ben taki na fesi dati „na ini a ten fu a kaba”, wan ’strei ben o de doronomo’ na mindri den grontapumakti di ben o feti nanga densrefi fu kisi a makti. Na ini a strei disi den ben o kon nanga kfalek srudati makti nanga fetsani èn den ben o poti furu moni fu horbaka gi den sani dati.​—Danièl 11:40, 42, 43.

 Bijbel e sori taki a situwâsi na grontapu o kon moro ogri fosi a kon bun baka. Yesus ben taki na fesi dati „wan bigi banawtu [ben] o de. Noiti ete so wan ten ben de sensi a bigin fu grontapu” (Mateyus 24:21). A „bigi banawtu” dati o kon na wan kba na ini a feti di nen Armagedon. Bijbel e taki dati a feti disi o „feti na a bigi dei fu Gado na Almaktiwan”.​—Openbaring 16:14, 16.

 Ma Armagedon na fu kibri libisma, a no fu pori den alamala. Nanga a feti disi, Gado o tyari wan kba kon na a tiri fu libisma di tyari so furu ogri feti kon. Efu yu wani kon sabi fa Armagedon o tyari freide kon fu ala ten, dan leisi den artikel disi:

•   „San na a feti fu Armagedon?”

•   „Yu no abi fu frede Armagedon!”