A fosi brifi gi den Korentesma 10:1-33
10 Brada, mi wani fu unu sabi taki ala den afo fu wi ben de na ondro a wolku èn alamala ben pasa na ini a se.
2 Nanga a wolku èn nanga a se den alamala ben dopu leki bakaman fu Moses.
3 Den alamala ben nyan a srefi nyanyan fu Gado
4 èn den alamala ben dringi a srefi watra fu Gado. Bika den ben e dringi fu a stonbergi fu Gado di ben waka nanga den. A stonbergi dati na Krestes.
5 Toku Gado sori taki a no ben feni furu fu den sma disi bun, bika a kiri den na ini a sabana.
6 Den sani disi tron eksempre gi wi, so taki wi no o angri fu du ogri, soleki fa den ben e angri fu du den sani dati.
7 Wi no musu go anbegi falsi gado tu, soleki fa sonwan fu den ben du, bika Gado Buku taki: „A pipel go sidon fu nyan èn fu dringi, èn den opo fu meki prisiri.”
8 Wi no musu libi wan hurulibi tu, soleki fa sonwan fu den ben e huru, bika dati meki taki tutenti na dri dusun fu den dede na ini wán dei.
9 Wi no musu tesi Yehovah tu, soleki fa sonwan fu den ben tesi en, bika dati meki taki sneki kiri den.
10 Wi no musu krutukrutu tu, soleki fa sonwan fu den ben e krutukrutu, bika dati meki taki na engel kiri den.
11 Den sani disi di pasa nanga den de leki eksempre gi wi èn den skrifi leki wan warskow gi wi di e libi na a kaba fu a ten disi.
12 Fu dati ede, a sma di denki taki a e tanapu, musu luku bun taki a no fadon.
13 Nowan tesi di unu e kisi, na tesi di tra libisma no e kisi. Ma unu kan frutrow Gado. A no o meki unu kisi tesi di hebi moro leki san unu man tyari. Ma te tesi miti unu, a o yepi unu, so taki unu man horidoro.
14 Fu dati ede, mi lobiwan, wai pasi gi afkodrei.
15 Mi e taki nanga unu leki nanga sma di abi a koni fu man si sani krin. Unu srefi kan luku efu san mi e taki de tru.
16 A kan di kisi blesi èn di wi e blesi e meki taki wi kisi wini fu a brudu fu Krestes, a no so? A brede di wi e broko e meki taki wi e kisi wini fu a skin fu Krestes, a no so?
17 Fu di wán brede de, meki wi na wán skin aladi furu fu wi de, bika wi alamala e nyan fu a wán brede dati.
18 Luku den wan di de trutru Israelsma. Den sma di e nyan den srakti-ofrandi, e nyan den sani fu na altari, a no so?
19 San unu denki taki mi wani taki nanga dati? Taki den sani di sma tyari leki ofrandi gi falsi gado, na prenspari sani? Noso taki wan falsi gado na wan prenspari sani?
20 Kwetikweti. San mi wani taki, na taki den sani di den trakondre sma e tyari leki ofrandi, den e tyari gi ogri yeye èn no gi Gado. Mi no wani taki unu moksi nanga ogri yeye.
21 Unu no kan dringi fu a kan fu Yehovah èn fu a kan fu ogri yeye. Unu no kan nyan na „a tafra fu Yehovah” èn na a tafra fu ogri yeye.
22 Noso „na suku wi e suku fu meki Yehovah dyarusu”? Wi no tranga moro en, a no so?
23 Wi kan du ala sani, ma a no ala sani bun fu du. Wi kan du ala sani, ma a no ala sani e gi deki-ati.
24 Ibriwan sma no musu tan suku en eigi bun, ma a musu suku a bun fu trawan.
25 Unu kan nyan iniwan sani di e seri na wan wowoyo pe sma e seri meti, èn un no musu aksi-aksi sani fu un konsensi ede.
26 Bika „na Yehovah abi a grontapu nanga den sani di de na tapu”.
27 Efu wan sma di no de na bribi e gi unu wan kari fu kon nyan èn unu wani go, dan nyan iniwan sani di a e poti gi unu fu nyan, èn no aksi-aksi sani fu un konsensi ede.
28 Ma efu wan sma e taigi unu: „Disi na wan sani di sma tyari leki srakti-ofrandi”, dan un no musu nyan en fu a sma ede di taigi unu dati, èn fu a konsensi ede.
29 Mi no e taki fu a konsensi fu unu, ma a di fu a tra sma. Mi fri fu du san mi wani. Ma fu san ede mi ben o wani du wan sani di ben o meki wan trawan kisi konsensi fonfon?
30 Efu mi e taki Gado tangi fu a sani di mi e nyan, dan fu san ede sma musu krutu mi fu a sani di mi e taki Gado tangi fu en?
31 Fu dati ede, awansi unu e nyan noso unu e dringi, noso awansi san unu e du, du ala sani fu gi Gado glori.
32 Un no musu du nowan sani di kan meki Dyu, Grikisma, noso a gemeente fu Gado fadon.
33 Misrefi e du ala sani fu plisi ala sma. Dati meki mi no e suku mi eigi bun, ma mi e suku a bun fu furu sma, so taki den kan kisi frulusu.
