A fosi brifi gi den Tesalonikasma 2:1-20
2 Mi brada, unu srefi sabi heri bun taki wi no ben kon na unu fu soso.
2 We, soleki fa unu sabi, dan den sma na Filipi ben pina wi èn ben du sani nanga wi fu gi wi syen. Ma baka dati a Gado fu wi gi wi deki-ati fu fruteri unu a bun nyunsu fu Gado, aladi sma ben e gens wi srefisrefi.
3 A no fu di wi abi fowtu denki, noso takru prakseri, noso fu di wi wani bedrigi unu, meki wi e gi unu rai.
4 Ma fu di na Gado ben feni en bun fu gi wi a wroko fu preiki a bun nyunsu, meki wi no e preiki fu plisi libisma, ma fu plisi Gado di e ondrosuku wi ati.
5 Fu taki en leti, unu sabi taki noiti wi no kori sma nanga switi wortu èn noiti wi hoigri fu kisi wini gi wisrefi. Gado na wi kotoigi!
6 Wi no ben suku fu kisi glori fu libisma tu, no fu unu èn no fu tra sma. Toku wi leki apostel fu Krestes ben kan tron wan hebi gi unu, fu di unu ben o abi fu pai furu moni fu sorgu wi.
7 Ma na presi fu dati, wi ben sori switifasi gi unu, leki te wan mama e gi en eigi pikin bobi èn e sorgu den na wan fasi di e sori taki a lobi den.
8 We, fu di wi lobi unu trutru, meki wi no ben prisiri fu fruteri unu a bun nyunsu fu Gado wawan, ma wi ben de klariklari tu fu lasi wi libi* gi unu, bika wi ben kon lobi unu srefisrefi.
9 Mi brada, a no abi misi taki unu e memre ete fa wi ben wroko tranga èn fa wi ben meki furu muiti. Wi ben e wroko dei nanga neti, fu di wi no ben wani taki wan fu unu pai furu moni fu sorgu wi, so taki wi ben o de wan hebi gi unu te wi ben e preiki a bun nyunsu fu Gado gi unu.
10 Unu na wi kotoigi èn Gado srefi na wi kotoigi tu, taki di wi ben de nanga unu di de bribiman, wi ben tai hori na unu èn wi ben du san reti. Unu no ben man feni fowtu na wi tapu.
11 Unu sabi heri bun taki wi tan gi unu rai, wi tan trowstu unu èn wi tan gi ibriwan fu unu deki-ati, neleki fa wan papa e du nanga den pikin fu en.
12 Na so unu ben kan tan tyari unsrefi na wan fasi di Gado feni bun. Na en e kari unu fu kon na ini en Kownukondre èn fu kisi a glori fu en.
13 Iya, na fu dati ede wi e taki Gado tangi doronomo tu, bika di unu yere Gado wortu di wi ben preiki gi unu, dan unu no teki a wortu leki a wortu fu libisma, ma leki a wortu fu Gado èn na dati a de trutru. A wortu dati abi furu krakti tu na tapu unu di de bribiman.
14 Mi brada, unu ben teki na eksempre fu den gemeente fu Gado di de wán nanga Krestes Yesus èn di de na Yudea, bika neleki fa den Dyu ben pina den brada na Yudea, na so un eigi kondreman pina unu tu.
15 Srefi Masra Yesus den Dyu dati kiri, neleki fa den ben gwenti kiri den profeiti, èn den frufolgu wi. Boiti dati, den no e plisi Gado èn den no e suku a bun fu trawan.
16 Den e pruberi fu tapu wi fu no preiki gi den trakondre sma fu den kan kisi frulusu. Na so den e tan du furu sondu. Ma te fu kaba, a bigi atibron fu Gado kon na den tapu.
17 We brada, di sma dwengi wi fu gowe libi unu, a ben de fu wan syatu pisi ten nomo (iya, wisrefi no ben kan de nanga unu, ma toku wi tan prakseri unu). Ma wi du bun furu muiti fu miti unu fu di wi ben angri trutru fu si unu.
18 Na fu dati ede wi ben wani kon na unu. Iya mi, Paulus suku fu kon, a no wán leisi nomo, ma tu leisi srefi. Ma Satan tapu pasi gi wi.
19 San na a sani di e gi wi howpu, san e gi wi prisiri èn sortu pai* wi kisi di o meki taki wi breiti te wi Masra Yesus kon? We, a no unu dan?
20 Fu tru, unu na wi glori nanga wi prisiri.
