A di fu tu brifi gi den Korentesma 5:1-21
5 Wi sabi taki wi skin na wi oso dyaso na grontapu. A de leki wan tenti di o broko. Dan Gado o gi wi wan oso di no meki nanga libisma anu èn di o tan fu têgo na hemel.
2 Bika wi e geme fu tru na ini na oso disi pe wi e tan èn wi e angri srefisrefi fu go tan na ini wi oso na hemel. A o tapu wi leki wan krosi
3 èn te wi weri en, wi no o de nanga sososkin.
4 Fu taki en leti, wi e geme na ini a tenti disi, fu di a de leki wan hebi gi wi. A no de so taki wi wani puru a tenti disi, ma wi wani kisi a tanpresi na ini hemel. Dan libi kan kon na ini a presi fu dede.
5 Na Gado sreka wi gi a sani disi èn na en gi wi en santa yeye. Na so a gi wi a dyaranti taki wi o kisi den blesi di o kon.
6 Dati meki ala ten wi abi howpu èn wi sabi taki solanga wi skin na wi oso, wi no de na Masra.
7 Wi sabi disi fu di wi e waka nanga bribi èn no nanga san ai e si.
8 Wi abi howpu èn wi ben o feni en moro bun fu komoto na ini a skin disi fu go tan na Masra.
9 Fu dati ede, awinsi wi e tan nanga en, noso awinsi wi no de nanga en, toku wi e du muiti fu a feni wi bun.
10 Bika wi alamala sa musu kon na fesi a krutuman-sturu fu a Krestes. Dan ibri sma o kisi pai fu den sani di a du di a ben de nanga en libisma skin ete, efu a ben du bun noso ogri.
11 Sobun, fu di wi sabi taki wi musu abi lespeki gi Masra, meki wi e tan gi sma deki-ati fu bribi san wi e taki. Gado sabi suma na wi, èn mi e howpu taki a konsensi fu unu o yepi unu tu fu kon sabi suma na wi.
12 A no de fanowdu taki wi sori unu baka taki wi na dinari fu Krestes, ma wi e taki den sani disi fu gi unu deki-ati fu meki bigi fu wi ede. Na so unu kan piki den sma di e meki bigi fu sani di den e si nanga ai, ma di no e meki bigi fu san de na ini na ati.
13 Bika efu wi no ben de bun na wi frustan, dan dati ben de so fu Gado ede. Efu wi de nanga wi krin frustan, dan dati de so fu unu ede.
14 A lobi fu Krestes naki wi ati, bika wi kon frustan taki wán sma dede gi ala sma, fu di ala sma ben dede.
15 Sobun, a dede gi ala sma. Dati meki den sma di e libi, no musu libi gi densrefi moro, ma gi a sma di dede gi den èn di kisi wan opobaka.
16 Dati meki wi no e si nowan sma moro leki fa libisma e si den. Srefi efu wi ben si Krestes na a fasi dati fosi, wi no e du dati moro.
17 Fu dati ede, iniwan sma di de wán nanga Krestes, na wan nyun sma di Gado meki. Den owru sani no de moro. Luku, nyun sani kon de now.
18 Ma ala den sani disi komoto fu Gado di meki wi kon bun baka nanga en nanga yepi fu Krestes. A gi wi a wroko fu fruteri sma fa den kan kon bun baka nanga en.
19 Wi e fruteri sma taki Gado meki libisma kon bun baka nanga en nanga yepi fu Krestes èn taki a no hori den sondu fu den na prakseri. A gi wi a wroko fu fruteri sma fa den kan kon bun baka nanga en.
20 Wi na boskopuman di e teki presi gi Krestes. Sobun, leki sma di e teki presi gi Krestes, wi e begi unu: „Kon bun baka nanga Gado.” A de neleki Gado e gebroiki wi fu begi unu disi.
21 A ben meki a sma di no ben abi sondu, tron wan sondu-ofrandi gi wi, so taki nanga yepi fu en wi kan tron sma di Gado feni bun.
