Eksodes 15:1-27
15 Ne Moses nanga den Israelsma bigin singi a singi disi gi Yehovah:„Meki mi singi gi Yehovah, bika a kisi bigi glori.A trowe den asi nanga den sma na den tapu, go na ini a se.
2 Mi krakti nanga mi makti na Yah, fu di a frulusu mi.Disi na mi Gado, èn mi sa prèise en. En na a Gado fu mi papa, èn mi sa gi en glori.
3 Yehovah na wan tranga fetiman. Yehovah na en nen.
4 A trowe den asiwagi fu a kownu fu Egepte nanga den legre fu en go na ini a se.Den moro bun fetiman fu en sungu na ini a Redi Se.
5 Den bigi skwala kon na den tapu. Neleki ston den sungu go na ini a dipi watra.
6 Yu reti-anu, o Yehovah, tranga srefisrefi.Yu reti-anu, o Yehovah, kan masi wan feanti.
7 Nanga yu bigi krakti, yu kan trowe den wan di opo densrefi teige yu.A bigi atibron fu yu e bron den leki drei grasi.
8 Di yu bro nanga yu noso, a watra opo.A ben tanapu leki wan dan.Den bigi skwala ben kon steifi na ini na ati fu a se.
9 A feanti taki: ’Mi sa hari go na den baka! Mi sa kisi den!Mi sa prati den gudu fu den! Mi sa du ogri nanga den nomonomo!Mi sa hari mi feti-owru! Nanga mi anu, mi sa yagi den gowe!’
10 Yu ben bro, èn a se kon na den tapu.Leki loto den sungu na ini a bigi watra.
11 Sortu gado de leki yu, Yehovah?Suma makti èn santa leki yu?Yu na a wan di sma musu frede, a wan di sma musu prèise nanga prèisesingi. Yu na a wan di e du wondru.
12 Yu langa yu reti-anu, èn grontapu swari den.
13 Fu di yu lobi du bun, meki yu frulusu a pipel èn yu tyari den gowe.Nanga a krakti fu yu, yu o tyari den go na yu santa tanpresi.
14 Den pipel musu yere, den sa bruya.Den sma fu Filistea o kisi hebi pen neleki wan uma di de fu meki wan pikin.
15 Na a ten dati, den edeman fu Edom sa bruya srefisrefi.Den makti tiriman fu Moab sa beifi.Ala den sma di e libi na ini Kanan sa lasi-ati trutru.
16 Den sa frede èn skreki srefisrefi.Fu di yu tranga srefisrefi, meki den no o man buweigi, iya, den o de leki ston,Teleki yu pipel pasa, o Yehovah,Teleki a pipel di yu meki, pasa gowe.
17 Yu sa tyari den èn prani den na tapu a bergi fu yu,Wan tanpresi di yu sreka gi yusrefi, o Yehovah,Wan santa presi, o Yehovah, di yu meki nanga yu anu.
18 Yehovah sa tiri leki kownu fu ala ten, iya, fu têgo.
19 Di den asi fu a kownu, den fetiwagi, nanga den fetiman fu en di e rèi asi, go na ini a se,Dan Yehovah meki a watra fu a se kon na den tapu,Aladi den Israelsma ben e waka na tapu drei gron na ini a se.”
20 Ne na umaprofeiti Meriam, a sisa fu Aron, teki wan tyengretyengre, dan ala den uma go na en baka èn den ben e dansi nanga tyengretyengre na ini den anu.
21 Meriam ben e piki den mansma:
„Singi gi Yehovah, bika a kisi bigi glori.A trowe den asi nanga den sma na den tapu, go na ini a se.”
22 Bakaten Moses meki den Israelsma komoto na a Redi Se èn den waka go na ini Sur-sabana. Dri dei langa den waka na ini a sabana, ma den no feni nowan watra.
23 Baka wan pisi ten den doro na Mara, ma den no ben man dringi a watra fu Mara, fu di a ben bita. Dati meki a kari a presi Mara.*
24 Ne a pipel bigin krutu nanga Moses. Den taki: „San wi musu dringi?”
25 Ne Moses bari kari Yehovah, dan Yehovah sori en wan bon. Di a trowe a bon go na ini a watra, dan a watra ben kon bun fu dringi.
Drape Gado gi den wan wèt nanga wan krutubosroiti èn drape a tesi den.
26 Dan a taki: „Efu unu arki Yehovah un Gado èn du san a feni bun, efu unu gi yesi na den komando fu en trutru èn hori ala den wèt fu en, dan mi no sa meki unu kisi nowan fu den siki di mi ben gi den Egeptesma. Na so mi sa du, fu di mi na Yehovah, a sma di e meki unu kon bun baka.”
27 Baka dati den doro na Elim, pe twarfu watra-olo nanga seibitenti palmbon ben de. Ne den seti kampu drape na watrasei.
Futuwortu
^ Mara wani taki bita.
