Mateyus e fruteri 5:1-48
5 Di a si someni sma, a kren go na tapu a bergi èn baka di a go sidon, den disipel fu en kon na en.
2 Dan a opo en mofo èn a bigin gi den leri. A taki:
3 „Koloku fu den sma di sabi taki den abi Gado fanowdu, bika den o kisi a Kownukondre fu hemel.
4 Koloku fu den sma di e sari, bika den o kisi trowstu.
5 Koloku fu den safri-ati sma, bika den o kisi grontapu.
6 Koloku fu den sma di e angri fu retidu, bika den o kisi sani bogobogo.
7 Koloku fu den sma di abi sari-ati gi trawan, bika sma o abi sari-ati gi den.
8 Koloku fu den sma di abi wan krin ati, bika den o si Gado.
9 Koloku fu den sma di e suku fu libi bun nanga trawan, bika sma o kari den ’pikin fu Gado’.
10 Koloku fu den sma di kisi frufolgu fu di den e du san reti, bika a Kownukondre fu hemel na fu den.
11 Koloku fu unu te sma e gi unu porinen èn te den e frufolgu unu aladi den e lei èn e taki ala sortu ogri fu unu, fu di unu na mi bakaman.
12 Un musu breiti èn prisiri pasa marki, fu di unu o kisi wan bigi pai na hemel. Bika na so sma ben frufolgu den profeiti di ben de fosi unu.
13 Unu na a sowtu fu grontapu. Ma efu sowtu no abi tesi moro, dan fa a o kon sowtu baka? Yu no man gebroiki en gi noti moro. Na fu teki en trowe go na dorosei meki sma trapu na en tapu.
14 Unu na a leti fu grontapu. Ala sma man si wan foto te a de na tapu wan bergi.
15 Te sma leti wan lampu, den no e poti en na ondro wan baskita, ma den e poti en na wan hei presi, so taki a e skèin na tapu ala sma na ini na oso.
16 Na so un musu meki un leti skèin gi sma tu. Dan den kan si den bun di unu e du èn den kan gi glori na un Tata di de na hemel.
17 No denki taki mi kon fu puru a Wèt noso den buku fu den Profeiti. Mi no kon fu puru den, ma mi kon fu meki den kon tru.
18 Fu tru mi e taigi unu taki srefi efu hemel nanga grontapu ben o lasi gowe, toku srefi a moro pikin pisi fu a Wèt no o lasi gowe, fosi ala sani kon tru.
19 Fu dati ede, efu wan sma no e du wan fu den moro pikin sani di a Wèt disi taki èn efu a e leri tra sma fu no du den sani disi, dan a sma disi no fiti gi a Kownukondre fu hemel. Ma a sma di e hori den komando disi èn e leri sma den, fiti gi a Kownukondre fu hemel.
20 Mi e taigi unu taki efu unu no e du bun moro leki den leriman fu Wèt nanga den Fariseiman, dan unu no o go na ini a Kownukondre fu hemel kwetikweti.
21 Un yere taki den taigi den sma fu fositen: ’Un no musu kiri sma. Iniwan sma di kiri wan trawan, sa musu gi frantwortu na fesi krutu.’
22 Ma mi e taigi unu taki iniwan sma di ati e tan bron nanga en brada, sa musu gi frantwortu na fesi krutu. A sma di e kosi en brada èn e wisiwasi en, sa musu gi frantwortu na fesi Grankrutu. A sma di e taki: ’Yu wisiwasi lawman yu!’, sa musu go na ini a faya fu Gehena.*
23 Fu dati ede, te yu e tyari yu ofrandi go na a altari èn drape yu e memre taki yu brada abi wan sani nanga yu,
24 dan libi yu ofrandi drape na fesi na altari èn go meki en bun nanga yu brada fosi. Baka dati yu kan gi yu ofrandi te yu drai kon baka.
25 Efu wan sma wani tyari yu go na krutu, dan yu no musu draidrai fu lusu a problema di yu abi nanga en, te unu de na pasi ete fu go na krutu. Bika efu yu no du dati, dan a sma disi kan tyari yu go na a krutuman, a krutuman o tyari yu go na a wrokoman fu a krutu-oso, èn sma o trowe yu go na ini strafu-oso.
26 Fu tru mi e taigi yu: Yu no o komoto drape solanga yu no pai a lasti sensi.
27 Un yere taki den taki: ’Un no musu du sutadu.’
28 Ma mi e taigi unu taki iniwan sma di e tan luku wan uma nanga tranga lostu gi en, du sutadu nanga en kaba na ini en ati.
29 Fu dati ede, efu yu retisei ai e meki yu sondu, dan hari en puru èn trowe en gowe. Bika a moro bun te yu e lasi wan pisi fu yu skin, leki te yu heri skin go na ini Gehena.
30 Sosrefi, efu yu reti-anu e meki yu sondu, dan koti en puru èn trowe en gowe. Bika a moro bun te yu e lasi wan pisi fu yu skin, leki te yu heri skin go na ini Gehena.
31 Den taki tu: ’A sma di broko trow nanga en wefi, musu gi a wefi wan papira pe skrifi taki a broko a trow nanga en.’
32 Ma mi e taigi unu taki efu wan man broko trow nanga en wefi, ma a no fu hurudu ede, dan a e gi en wefi na okasi fu go du sutadu. Sosrefi, efu wan man trow nanga so wan uma, dan a e du sutadu.
33 Un yere tu taki den taigi den sma fu fositen: ’Un no musu sweri taki unu o du wan sani, dan unu no e du en, ma un musu du san unu pramisi Yehovah.’
34 Ma mi e taigi unu: Un no musu sweri kwetikweti. No sweri na hemel tu, bika dati na Gado en kownusturu.
35 No sweri na grontapu, bika dati na Gado en futubangi. No sweri na Yerusalem, bika dati na a foto fu a bigi Kownu.
36 No sweri tapu yu ede, bika yu no kan meki nowan wiwiri kon weti noso blaka.
37 Te unu taki ’iya’, dan meki a tan iya. Te unu taki ’nôno’, dan meki a tan nôno. Bika ala tra sani di yu o taki e kon fu na ogriwan.
38 Un yere taki den taki: ’Efu wan sma broko wan trawan ai, un musu broko en ai tu èn efu wan sma broko wan trawan tifi, un musu broko en tifi tu.’
39 Ma mi e taigi unu: No feti nanga wan ogri sma. Efu wan sma naki yu na a retisei fu yu fesi, dan drai a tra seifesi gi en tu.
40 Efu wan sma wani tyari yu go na krutu èn a wani teki yu krosi, dan meki a teki yu dyakti tu.
41 Efu wan sma di abi makti, e dwengi yu fu waka wán kilometer nanga en, dan waka tu kilometer nanga en.
42 Efu wan sma e aksi yu wan sani, dan gi en. Efu wan sma wani leni wan sani fu yu, dan no weigri fu leni en.
43 Un yere taki den taki: ’Un musu lobi tra sma, ma un no musu lobi un feanti kwetikweti.’
44 Ma mi e taigi unu: Tan lobi un feanti èn tan begi gi den sma di e frufolgu unu.
45 Dan sma kan si taki unu na pikin fu un Tata di de na hemel. Bika a e meki a son fu en opo gi ogri sma èn gi bun sma. A e meki alen fadon gi sma di e du san reti èn gi sma di no e du san reti.
46 Efu unu lobi soso den sma di lobi unu, sortu bun unu du dan? A no a srefi sani dati den sma e du di e teki belasting-moni gi lanti?
47 Efu unu e gi soso den brada fu unu odi, dan sortu spesrutu sani unu du dan? A no a srefi sani den grontapusma e du?
48 Fu dati ede un musu bun dorodoro, neleki fa un Tata na hemel bun dorodoro tu.
Futuwortu
^ Luku „Moro sani”, nr. 11.
