Psalm 78:1-72
Wan Maskil.* Wan psalm fu Asaf.
78 Mi pipel, arki san mi e leri unu.*Un poti yesi arki den sani di mi e taigi unu.
2 Mi o opo mi mofo fu taki wan odo.
Mi o ferteri tori di ben kibri bun langa kba.
3 Mi o ferteri unu sani di wi ben yere kba,iya, sani di wi sabi èn di wi eigi p’pa ben ferteri wi.
4 Wi no o kibri den tori disi gi den pkin fu wi.Wi o ferteri den bakapkin di musu kon ete den tori disi.Wi o taki fu den moi sani di Yehovah du èn fu a fasi fa a sori a krakti fu en.Wi o taki tu fu den bigi sani di a du.
5 A gi den bakapkin fu Yakob den wet fu enèn a poti wan wet na ini Israel.A taigi den afo fu wifu ferteri den pkin fu den, den sani disi.
6 Na so den bakapkin di musu kon ete,iya, den pkin di musu gebore ete, kan kon sabi den tori dati.
Dan den fu den sei kan ferteri den pkin fu den, den tori disi.
7 Na a fasi dati den ben kan leri fu fertrow tapu Gado.
Na so den no ben o fergiti den sani di Gado du,ma den ben o hori den wet fu en.
8 Den no ben o de leki den afo fu den,di ben tranga-ede èn di ben opo densrefi teige Gado.A pipel disi no ben sreka den ati fu dini Gado.Den no du a wani fu Gado nanga den heri ati.
9 Den srudati fu Efrayim ben abi bo,ma den lon gwe libi a feti.
10 Den no hori a ferbontu fu Gadoèn den weigri fu hori densrefi na a wet fu en.
11 Den fergiti den sani di a duèn den wondru di a meki den si.
12 Leti na fesi den afo fu den a du bigi wondru na ini a kondre Egepte,iya, na ini a kontren fu Sowan.
13 A prati a se na tu fu meki den abra go na a tra sei.A meki a watra opo tnapu leki wan dan.*
14 A ben e tyari den nanga wan wolku na deitenèn na neti a ben e tyari den nanga a leti fu wan bigi faya.
15 Na ini a sabana a priti bigi ston na tu,so taki den ben kan dringi watra teleki a sari den. A watra ben furu leki a watra fu se.
16 A meki watra kmoto na ini wan bigi stonbergi.A ben e meki a watra lon neleki a watra fu den liba.
17 Tòg den ben tan sondu teige en.Den ben e opo densrefi teige a Moro Heiwan di den ben de na ini a drei sabana.
18 Den du sani fu espresi fu tesi Gado.Den ben wani nomonomo taki a gi den a n’nyan di den ben lostu.
19 Dati meki den bigin krutu Gado.Den taki: „Gado o man gi wi n’nyan dyaso na ini a sabana?”
20 Na en naki na tapu wan bigi stonfu meki bun furu watra lon kmoto na ini.
Tòg den taki: „A man gi wi brede tu?A man gi en pipel meti fu nyan?”
21 Di Yehovah yere san den taki, a kisi bigi atibron.Nanga faya a strafu Yakobèn Gado puru atibron na tapu Israel,
22 bika den no ben fertrow tapu Gado.Den no ben bribi taki a ben o man ferlusu den.
23 Ne a taigi a loktu di ben lai nanga wolku fu opoèn a opo den doro fu hemel.
24 A meki mana saka kon na den tapu neleki alen.A gi den n’nyan kmoto fu hemel.
25 Libisma nyan a brede fu hemel.*Gado gi den so furu n’nyan, taki den ben kan nyan den bere furu.
26 A meki wan tranga winti fu hemel wai kmoto na owstuseièn nanga a krakti fu en a meki wan winti wai kmoto na zuidsei.
27 Ne a gi den meti fu nyan. A meti ben furu leki fini doti.Iya, a meki fowru saka kon. Den ben furu leki a santi na sesyoro.
28 A meki den fowru fadon na ini a kampu fu en.Den ben de lontu den tenti fu en.
29 Ne a pipel nyan teleki den no ben man moro.A gi den san den ben wani.
30 Den no ben puru a lostu fu den wan bun fasi srefi,iya, a n’nyan ben de na ini den mofo ete,
31 di Gado en atibron saka kon na den tapu.
A kiri den moro tranga man di ben de na den mindri.A meki den yongu man fu Israel fadon dede.
32 Srefi di ala den sani disi psa nanga den, tòg den tan sondu go doro.Den no ben wani bribi aladi den si den wondru di Gado du.
33 Dati meki a syatu a libi fu den, iya, a libi fu den psa gwe leki wan blo.Den heri libi langa a gi den furu problema teleki den dede.
34 Ma ibri leisi te a ben e bigin kiri den, den ben e aksi en fu yepi den.Den ben e drai kon baka na Gado èn den ben e suku yepi na en.
35 Den ben memre taki na Gado ben de a Stonbergi fu denèn taki na Gado, a Moro Heiwan, ben de a Ferlusuman fu den.
36 Den ben e suku fu kori en nanga den mofo.Nanga den tongo den lei gi en.
37 Den no du a wani fu en nanga den heri ati.Den no hori a ferbontu fu en.
38 Tòg a ben e sari den.A ben gi den pardon fu* den sondu
èn a no kiri den alamala.Someni leisi a hori ensrefi fu no puru atibron na den tapu.
39 A ben e hori na prakseri taki den na libisma nomoèn taki den de leki winti di e wai psa èn di no e drai kon baka.*
40 Ibri tron baka den opo densrefi teige en na ini a sabana.Den ben e hati en firi di den ben de na ini a sabana!
41 Ibri leisi baka den ben e tesi Gado.Den ben e meki a Santawan fu Israel sari.*
42 Den no memre a fasi fa a yepi den*na a ten di a ferlusu den fu den feanti.
43 Den fergiti den bigi sani di a du na ini Egeptenanga den wondru di a du na ini a kontren fu Sowan.
44 Den fergiti fa a kenki a watra fu den kriki fu Nijl-liba kon tron brudu.Den no ben man dringi a watra moro di ben de na ini den liba.
45 A seni kawfrei kon na den tapu fu nyan den.A seni todo tu fu pori a kondre fu den.
46 A meki sprenka nyan den sani di ben e gro na den gron fu denèn a meki sprenka nyan ala den sani di den ben prani nanga bun furu muiti.
47 A meki pispisi ijs fadon kmoto na loktu fu kiri den droifibon fu den.Iya, nanga pispisi ijs a kiri den figabon fu den.
48 A meki pispisi ijs kiri den meti fu den di ben e tyari lai.A meki bliksem* naki den meti fu den.
49 A meki den firi a bigi atibron fu en.A mandi srefsrefi nanga den èn a pina den.Iya, a seni engel fu tyari rampu kon na den tapu.
50 A puru atibron na den tapu.
A no hori ensrefi, ma a kiri den.A kiri den nanga takru siki.
51 Te fu kba a kiri ala den fosi pkin fu Egepte,den fosiwan di gebore na ini den tenti fu Kam.
52 Baka dati a tyari en pipel gwe neleki wan ipi skapu.Na ini a sabana a tyari den neleki fa wan sma e tyari wan bigi ipi skapu.
53 A heri pisi ten dati ogri no ben e miti denèn den no ben e frede noti.A watra fu se tapu den feanti fu den.
54 A tyari den go na a santa kondre fu en.A teki a bergikontren disi abra nanga a makti fu en.
55 A yagi den tra pipel kmoto na ini a kondre.Nanga wan t’tei a marki a kondre fu prati en gi en pipel,so taki den lo fu Israel ben kan abi den eigi oso.
56 Ma den tan du sani fu tesi a Moro Hei Gado èn den ben e opo densrefi teige en.Den no prakseri den sani di a ben taigi den.
57 Den drai baka gi en èn neleki den afo fu den, den no tan du a wani fu en.
Neleki fa wan sma no man fertrow tapu wan bo di no span bun, na so den no ben de fu fertrow.
58 Ibri leisi baka den ben meki Gado ati bron nanga den, fu di den bow hei presi fu go anbegi falsi gado.Den meki Gado dyarusu nanga den popki di den ben meki.
59 Gado si san den ben e du èn a kisi bigi atibron.Dati meki a no ben wani Israel moro leki en pipel.
60 Te fu kba a gwe libi a tabernakel di ben de na Silo.Iya, a gwe libi a tenti pe a ben e tan di a ben de nanga libisma.
61 A meki den feanti fu en tyari a santa kisi fu en gwe.Iya, a meki den tyari a sani gwe di ben e prenki a krakti nanga a glori fu en.
62 A ben meki sma kon feti nanga a pipel fu en.Iya, a kisi bigi atibron nanga a pipel fu en.
63 A meki faya bron den yongu man fu en.Sma no ben e singi trowsingi gi den yongu uma fu en.*
64 Sma kiri den priester fu en nanga fet’owruèn den frow fu den no krei gi den.
65 Ne Yehovah wiki, neleki na sribi a ben e sribi,iya, neleki wan tranga man di e wiki, baka di a dringi win.
66 A meki den feanti fu en lon gwe.Na so a meki den kisi syen fu ala ten.
67 A drai baka gi den bakapkin fu Yosefèn a no ben wani a lo fu Efrayim moro.
68 Ma a teki a lo fu Yuda,iya, a teki Sion-bergi di a lobi.
69 A bow a santa presi fu en fu tan fu têgo, neleki hemel.*A poti en steifi fu ala ten, neleki grontapu.
70 A teki David leki en futuboi.A puru en na den skapupen.
71 Fosi, David ben e luku umaskapu di ben abi pkin na bobi.Ma Gado meki a tron a skapuman fu Yakob, a pipel fu Enèn a skapuman fu Israel di de a gudu fu En.
72 David ben e tiri a pipel nanga wan krin ati.A tiri den na wan koni fasi.
Futuwortu
^ Noso: „arki mi wet”.
^ Noso: „skotu”.
^ Hebrewtongo: „brede fu den wan di tranga moro libisma”.
^ Hebrewtongo: „A tapu”.
^ Noso: „te den blo koti, a libi fu den kba”.
^ Noso: „firi pen”.
^ Hebrewtongo: „Den no memre na anu fu en”.
^ Noso kande: „hebi korsu”.
^ Hebrewtongo: „Sma no ben e prèise den uma fu en di no ben sribi nanga wan man ete”.
^ Hebrewtongo: „A bow a santa presi fu en leki den hei presi”.
