Yehovah e meki Adam nanga Eva, èn a e gi den a howpu fu libi fu têgo na ini Paradijs. Satan e gi Gado porinen èn a e taki dati Gado no abi a reti fu tiri. Adam nanga Eva e teki a sei fu Satan, di opo ensrefi teige Gado. Na so den tyari sondu nanga dede kon tapu densrefi èn tapu den bakapikin fu den

Yehovah e krutu den sma di opo densrefi teige en, èn a e pramisi taki wan Frulusuman, noso wan Pikin o kon, di sa masi Satan na en ede. Na so wan kaba o kon na ala den bakapisi fu a opo di sma opo densrefi teige Gado èn fu sondu

Yehovah e pramisi Abraham nanga David taki den o de afo fu a Pikin, noso Mesias, di o tiri leki Kownu fu têgo

Yehovah e meki profeiti taki na fesi dati a Mesias o frulusu sma fu sondu nanga dede. A o tiri leki Kownu fu Gado Kownukondre, makandra nanga trawan. A Kownukondre disi o tyari wan kaba kon na feti, siki, èn srefi dede

Yehovah e seni en Manpikin kon na grontapu èn a e tyari kon na krin taki Yesus na a Mesias. Yesus e preiki fu Gado Kownukondre èn a e gi en libi leki wan srakti-ofrandi. Baka dati, Yehovah e gi en wan opobaka leki wan yeye

Yehovah e poti en Manpikin leki Kownu na ini hemel, èn disi na a bigin fu den lasti dei fu a grontapu sistema disi. Yesus e tiri den bakaman fu en na grontapu, te den e preiki fu Gado Kownukondre na heri grontapu

Yehovah e taigi en Manpikin fu tiri grontapu leki Kownu. A Kownukondre e pori ala den ogri tirimakti, a e tyari Paradijs kon, èn a e puru ala sondu fu libisma di tan gi yesi na Gado. A e kon na krin taki Yehovah abi a reti fu tiri, èn en nen kon santa fu têgo