TAPU a di fu dri dei baka a dede fu Yesus, wan tu uma di ben de disipel fu en, kon si taki a ston di ben tapu na olo fu a grebi, ben lolo komoto. Boiti dati, a grebi ben leigi!

Tu engel ben kon èn wan fu den ben taki: „Unu e suku Yesus fu Nasaret . . . A opo baka” (Markus 16:6). Wantewante den uma lon go fruteri den apostel. Di den ben de na pasi, den miti Yesus. A taigi den: „No frede! Un go fruteri den brada fu mi taki den kan go na Galilea èn drape den o si mi.”—Mateyus 28:10.

Moro lati na a srefi dei dati, tu disipel ben waka fu Yerusalem go na a dorpu Ema-us. Wan sma di den no ben sabi, ben kon waka nanga den èn a aksi den fu sortu sani den ben e taki. Fu taki en leti, a sma disi ben de Yesus di kisi wan opobaka. A ben sori ensrefi na wan fasi di meki taki den no ben sabi na a bigin taki na en. Nanga sari fesi den piki en taki den ben taki fu Yesus. A sma disi di den no ben sabi bigin fruklari sani di abi fu du nanga a Mesias, soleki fa den Santa Buku e taki. Iya, Yesus meki den profeititori di abi fu du nanga a Mesias, kon tru finifini. * Di den disipel kon si taki a sma di ben e waka nanga den ben de Yesus, di kisi wan opobaka leki wan yeye, dan wantronso a no ben de fu si moro.

Wantewante den tu disipel drai go baka na Yerusalem. Drape den miti den apostel di ben kon makandra na ini wan kamra pe den doro ben sroto. Di den tu disipel ben fruteri san miti den, dan wantronso Yesus ben de na den mindri. Den bakaman fu en ben skreki èn den no ben man bribi san den ben si! Yesus aksi den: „Fu san ede unu e tweifri na ini un ati?” A taigi den: „Gado Buku taki dati Krestes ben o pina èn taki a ben o opo baka na tapu a di fu dri dei.”—Lukas 24:38, 46.

Na ini den 40 dei baka di Yesus kisi wan opobaka, a sori ensrefi na den disipel fu en na difrenti okasi. Na wan okasi a sori ensrefi na moro leki 500 disipel! Soleki fa a sori, dan na a okasi disi a gi den a bigi frantwortu disi: „Go na sma fu ala kondre èn meki den tron disipel . . . Leri den fu du ala san mi komanderi unu. Dan unu o si taki mi sa de nanga unu ala dei te na a kaba fu a grontapu sistema.”—Mateyus 28:19, 20.

A lasti leisi di Yesus kon makandra nanga den 11 apostel di ben tan horibaka gi en, a pramisi den: „Unu sa kisi krakti te a santa yeye kon na un tapu, èn unu sa de kotoigi fu mi . . . te na den moro farawe presi fu grontapu” (Tori fu den Apostel 1:8). Dan Yesus opo go na loktu èn wan wolku tapu en so taki den no si fa a opo go na hemel.

—Den tori disi teki puru fu Mateyus kapitel 28; Markus kapitel 16; Lukas kapitel 24; Yohanes kapitel 20 nanga 21; 1 Korentesma 15:5, 6.