PISI 4
Fa fu gebroiki moni
„Rai fu trawan o yepi yu fu du san yu abi na prakseri.”—Odo 20:18
Wi alamala abi moni fanowdu fu sorgu gi wi osofamiri (Odo 30:8). Fu taki en leti, „moni e kibri sma” (Preikiman 7:12). Kande a muilek gi yu nanga yu patna fu taki fu monitori, ma no meki moni tyari trobi kon na ini un trowlibi (Efeisesma 4:32). Masra nanga wefi musu frutrow makandra èn den musu taki nanga makandra fosi den bosroiti fa den o gebroiki den moni.
1 SREKA SANI BUN
SAN BIJBEL E TAKI: „Suma fu unu di wani bow wan toren, no sa go sidon fosi fu teri den kostu, so taki a kan si efu a abi nofo moni fu klari a wroko?” (Lukas 14:28) A prenspari fu sidon taki nanga makandra fa unu o gebroiki un moni (Amos 3:3). Luku san unu abi fanowdu èn omeni moni unu man gebroiki (Odo 31:16). Awansi yu abi a moni fu bai wan sani, dati no wani taki dati yu musu bai en. Pruberi fu no meki paiman. Gebroiki soso a moni di yu abi trutru.—Odo 21:5; 22:7.
SAN YU KAN DU:
-
Efu a mun tapu èn moni tan abra, dan taki nanga makandra san unu o du nanga a moni dati
-
Ma efu a moni no ben sari, dan taki krin san unu o du fu no gebroiki so furu moni moro. Kande unu kan bori un eigi nyanyan na presi fu bai nyanyan na strati
2 TAKI KRIN ÈN NO KORI UNSREFI
SAN BIJBEL E TAKI: „Te wi e seti sani, wi e du dati nanga wan krin ati na fesi Yehovah èn na fesi libisma” (2 Korentesma 8:21). Taigi yu patna krin omeni moni yu e wroko èn omeni yu e gebroiki.
Taki ala ten nanga yu patna te un musu teki prenspari bosroiti di abi fu du nanga monitori (Odo 13:10). Te unu e taki nanga makandra fu monitori, dan dati kan yepi fu meki sani waka bun na ini un trowlibi. No si a moni di yu e wroko leki yu eigi moni, ma si en leki a moni fu yu osofamiri.—1 Timoteyus 5:8.
SAN YU KAN DU:
-
Taki nanga makandra omeni moni ibriwan fu unu kan gebroiki sondro fu aksi a trawan
-
Taki nanga makandra fu monitori èn no wakti teleki wan problema opo kon
