Meki wi go baka na a ten fosi den skotu fu Yerusalem kaba bow. Wan Israel man di nen Nehemia, ben e wroko gi Kownu Artakserkses. Nehemia ben e libi na ini Susan, wan foto fu Persia. Wan brada fu Nehemia kon fu Yuda èn a tyari takru nyunsu. A taki: ’Sani no e go bun nanga den sma fu Yerusalem. Den skotu nanga den portu di den Babilonsma pori no bow ete.’ Nehemia ben sari. A ben wani go na Yerusalem fu go yepi. Dati meki a begi Yehovah so taki a kownu kan meki a go.

Bakaten a kownu si taki Nehemia ben e sari. A taigi en: ’Noiti mi si yu nanga so wan sari fesi. San pasa nanga yu?’ Nehemia taki: ’Mi e sari fu di Yerusalem a foto fu mi no bow ete.’ A kownu aksi en: ’San yu wani taki mi du gi yu?’ Wantewante Nehemia begi na ini en ati. Ne a taki: ’Efu Kownu feni en bun, dan meki mi go na Yerusalem fu bow den skotu.’ Kownu Artakserkses taigi Nehemia taki a kan go èn a seti sani fu meki a doro bun na Yerusalem. Boiti dati, a meki Nehemia tron granman fu Yuda èn a gi en udu fu bow den portu fu a foto.

Di Nehemia doro Yerusalem, a go luku fa den skotu fu a foto de. Ne a kari den priester nanga den ondro-granman kon, dan a taigi den: ’Den skotu no bun srefisrefi. Wi musu bow den baka.’ A pipel ben feni en bun èn den bigin sreka sani fu bow den skotu.

Ma wan tu feanti fu Israel bigin spotu den. Den taki: ’Efu wan sabanadagu dyompo go na tapu a skotu di unu e bow, a o broko fadon.’ Den wrokoman bow go doro èn den no ben e arki den sani di den feanti ben e taki. Den bow wan hei skotu èn a ben tranga.

Den feanti meki mofo fu kon feti nanga den sma fu Yerusalem sondro taki den sabi. Di den Dyu yere a tori, den kon frede. Ma Nehemia taigi den: ’Un no musu frede. Yehovah de nanga wi.’ A poti waktiman fu luku den bowman èn den feanti no ben man kon feti nanga den.

 Na ini 52 dei, den ben kaba bow den skotu nanga den portu. Di den ben o gi a skotu abra na Yehovah, Nehemia tyari ala den Leifisma kon makandra na ini Yerusalem. A seti den na ini tu grupu fu singiman. Den go na tapu a skotu èn den waka teleki den doro a Trapu di e go na Watra-portu. Dan wan fu den grupu waka go na a wan sei èn a trawan waka go na a tra sei. Den ben e prei trompeti, harpu nanga tra pokusani fu singi gi Yehovah. Esra ben e waka nanga wan fu den grupu èn Nehemia ben e waka nanga a tra grupu teleki den miti nanga makandra na a tempel. Mansma, umasma nanga pikin-nengre ben e tyari ofrandi gi Yehovah èn den ben e prisiri. Bun fara yu ben kan yere fa den e prisiri.