Baka di Salomo tron kownu fu Israel, Yehovah aksi en: ’San yu wani taki mi musu gi yu?’ Salomo taki: ’Mi yongu ete èn mi no sabi fa mi musu luku a pipel fu yu. Mi e begi yu fu gi mi koni so taki mi kan tiri yu pipel bun.’ Yehovah piki en: ’Fu di yu aksi mi fu gi yu koni, meki mi o gi yu furu koni èn yu o de a moro koni man na grontapu. Mi o gi yu furu gudu tu. Èn efu yu arki mi, yu o libi langa.’

Salomo bigin bow a tempel. A gebroiki gowtu, solfru, udu nanga ston. Dusundusun man nanga uma di ben sabi du ala sortu wroko, ben yepi fu bow a tempel. Baka seibi yari, a tempel ben kaba bow èn den ben o gi en abra na Yehovah. A tempel ben abi wan altari èn den ben poti ofrandi na en tapu. Salomo saka kindi na fesi na altari èn a begi: ’Ke Yehovah, a tempel disi no bigi nofo gi yu èn a no moi nofo. Ma grantangi, arki wi te wi e kon dya fu anbegi yu èn fu begi yu.’ Fa Yehovah ben feni a tempel nanga a begi fu Salomo? Fa yu si Salomo kaba begi, Yehovah meki faya komoto fu hemel bron den ofrandi na tapu na altari. Na so Yehovah sori taki a ben breiti nanga a tempel. Di den Israelsma si disi, den ben prisiri.

Na ini heri Israel nanga tra farawe presi, sma ben sabi Kownu Salomo leki wan koni man. Sma ben e kon na Salomo fu a yepi den nanga den problema fu den. Srefi na umakownu fu Skeiba kon na Salomo fu poti muilek aksi gi en. Di a yere fa Salomo piki den aksi fu en, a taki: ’Mi no ben bribi san sma ben taigi mi fu yu, ma now mi si taki yu koni moro leki san den ben taki. Yehovah a Gado fu yu, blesi yu.’ Den Israelsma ben abi wan bun libi èn den ben de koloku. Ma sani ben o kenki.