Gi wi lobi brada nanga sisa:

Na ini a fosi Waktitoren gi a preikiwroko, a di fu 1 yanuari 2008, wan moi artikel ben kon na doro di nen „Abi bribi neleki den”. Sensi a ten dati, wan nyunwan fu na artikel dati kon na doro ibri dri mun, èn wi ben breiti srefisrefi!

Fa sma ben feni den artikel dati? Baka di wan uma leisi na artikel fu Marta, dan a skrifi: „Mi lafu di mi leisi en, fu di mi de neleki en. Ala ten mi wani sorgu bun gi sma di kon luku mi, èn mi e du so furu sani taki son leisi mi e frigiti fu teki ten fu taki tori nanga den mati fu mi.” Wan yonguwan di ben leisi a tori fu Ester ben taki a moi sani disi: „Mi sabi san a wani taki te wan sma e suku nomo fu abi moi krosi èn fu meki ala sortu modo. A bun te wi e moi wisrefi, ma wi no musu meki en tumusi.” A taki moro fara: „Yehovah e luku suma wi de na ini wi ati.” Wan Kresten sisa di ben lobi na artikel fu na apostel Petrus, ben taki a sani disi: „Mi ben lobi na artikel so te taki mi no ben man kaba leisi en. A ben de neleki mi srefi ben de drape! Mi ben man si èn mi ben man yere den sani di ben e pasa.”

Den sani di den leisiman disi taki fu den artikel, èn sosrefi den sani di furu trawan skrifi, e sori taki den sani di na apostel Paulus ben skrifi langa ten pasa, na tru tori. A ben skrifi: „Ala sani di sma skrifi fositen, ben skrifi fu leri wi wan sani” (Rom. 15:4). Iya, Yehovah ben meki sma poti den tori disi na ini Bijbel fu leri wi prenspari sani. Ibriwan fu wi kan leri wan sani fu den tori disi, awinsi o langa wi sabi a tru anbegi.

Wi e gi yu a deki-ati fu leisi a buku disi so esi leki yu man. Te yu e hori na Osofamiri Anbegi fu yu, dan a bun fu gebroiki en. Den pikin o lobi en! Te a gemeente o studeri a buku disi na a Gemeente Bijbelstudie, yu no musu misi nowan enkri wiki! Teki yu ten fu leisi en, no hasti yusrefi. Prakseri fa a ben o de te yu ben de drape. Pruberi fu si èn fu yere san ben e pasa. Pruberi fu firi fa den sma na ini Bijbel ben e firi, pruberi fu si san den ben e si. Luku san den ben e du te sani ben e miti den èn luku san yu ben o du efu yu ben de na ini a situwâsi dati.

Wi breiti kefalek taki wi man gi yu a buku disi. Meki a de so taki a tyari wini kon gi yu nanga yu osofamiri. Wi lobi unu èn wi e winsi soso bun gi unu,

A Tiri Skin fu Yehovah Kotoigi