Baka te Yesus kisi wan opobaka, a e seti sani so taki den 11 apostel fu en kan miti en na wan bergi na ini Galilea. Sowan 500 tra disipel de drape tu. Na a bigin, sonwan fu den e tweifri efu na en (Mateyus 28:17; 1 Korentesma 15:6). Ma den sani di Yesus e taki now e meki taki ibriwan fu den e bribi taki a de na libi trutru.

Yesus e fruteri den taki Gado gi en ala makti na hemel èn na grontapu. Yesus e taigi den: „Fu dati ede, go na sma fu ala kondre èn meki den tron disipel. Dopu den na ini a nen fu a Tata, fu a Manpikin, èn fu a santa yeye. Leri den fu du ala san mi taigi unu fu du” (Mateyus 28:18-20). Iya, Yesus de na libi èn te now ete a prenspari gi en taki a bun nyunsu e preiki.

Ala den bakaman fu Yesus, mansma, umasma nanga pikin kisi a wroko fu meki disipel. Kande gensman o pruberi fu tapu den fu preiki a boskopu èn fu gi sma leri. Ma Yesus e gi den a dyaranti disi: „Mi kisi ala makti na ini hemel èn na grontapu.” San dati wani taki gi den bakaman fu en? A e taigi den: „Unu o si taki mi o de nanga unu ala dei te na a kaba fu grontapu.” Yesus no e taki dati ala sma di e preiki a bun nyunsu o man du wondru. Ma santa yeye o yepi den fu du a wroko di Yesus gi den.

Baka di Yesus kisi wan opobaka, a tan ete 40 dei na grontapu. Na ini a pisi ten dati, a sori ensrefi na den disipel fu en. Ibri leisi te a ben sori ensrefi na den disipel fu en a ben abi wan tra libisma skin. A ’sori den nanga furu krin buweisi, taki a de na libi’. A fruteri den tu „fu a Kownukondre fu Gado”.​—Tori 1:3; 1 Korentesma 15:7.

Soleki fa a sori, dan den apostel de na ini Galilea ete te Yesus e taigi den fu drai go baka na Yerusalem. Te a e miti den drape, a e taki: „No gowe libi Yerusalem, ma tan wakti a sani di a Tata pramisi, soleki fa mi ben taigi unu. A tru taki Yohanes ben dopu sma nanga watra, ma baka wan tu dei unu sa teki dopu nanga santa yeye.”​—Tori 1:4, 5.

Bakaten Yesus e kon makandra baka nanga den apostel fu en. A e tyari „den go te na Betania”, di de na a owstusei fu Olèif-bergi (Lukas 24:50). Aladi Yesus fruteri den disipel fu en krin taki a o gowe libi den, toku den e bribi ete taki a Kownukondre fu en o de na grontapu.​—Lukas 22:16, 18, 30; Yohanes 14:2, 3.

Den apostel e aksi Yesus: „Masra, yu o seti a kownukondre baka gi Israel na ini a ten disi?” A e piki den: „Unu no abi fu kon sabi a ten noso den spesrutu dei. A Tata wawan abi a reti fu bosroiti o ten dati sa de.” Dan a e sori den baka o prenspari a wroko de di den musu du. A e taki: „Unu sa kisi krakti te a santa yeye kon na un tapu, èn unu sa de kotoigi fu mi na ini Yerusalem, na ini heri Yudea nanga Samaria, èn te na den moro farawe presi fu grontapu.”​—Tori 1:6-8.

Den apostel di de na tapu Olèif-bergi makandra nanga Yesus e si fa Yesus e bigin opo go na hemel wantronso. Heri esi wan wolku e tapu en, so taki den no man si en moro. Baka di Yesus kisi wan opobaka, a ben sori ensrefi na ini libisma skin. Ma now a e kenki kon tron wan yeye. Dan a e opo go na hemel leki wan yeye (1 Korentesma 15:44, 50; 1 Petrus 3:18). Te den apostel fu en e tan luku fa a e opo gowe, dan wantronso „tu man na ini weti krosi” e tanapu na den sei. Fu taki en leti, den man disi na engel. Den e aksi den apostel: „Un man fu Galilea, fu san ede unu e tanapu e luku go na loktu? A Yesus disi di Gado puru na un mindri èn di opo go na hemel, sa kon na a srefi fasi leki fa unu ben si en e go na hemel.”​—Tori 1:10, 11.

Yesus no gowe libi grontapu nanga wan lo opo-opo. Soso den trutru bakaman fu en si di a opo go na hemel. A o drai kon baka „na a srefi  fasi”. Sobun, a no o kon nanga wan lo opo-opo èn soso den trutru bakaman fu en o frustan taki a tron Kownu fu a Kownukondre.

Den apostel e drai go baka na Yerusalem. Na ini den dei baka dati, den e kon makandra nanga tra disipel, sosrefi nanga „Maria a mama fu Yesus, èn nanga den brada fu Yesus” (Tori 1:14). A grupu disi e begi doronomo. Wan fu den sani di den e begi Gado, na fu yepi den fu teki wan disipel na ini a presi fu Yudas Iskariot. Na so 12 apostel o de baka (Mateyus 19:28). Den wani teki wan disipel di si den sani di Yesus ben du èn di si tu taki a kisi wan opobaka. Den disipel e iti lot fu man teki wan bosroiti. Disi na a lasti leisi di Bijbel e taki dati sma iti lot fu kon sabi san na a wani fu Gado (Psalm 109:8; Odo 16:33). Ne a lot e fadon tapu Matias. Kande a man disi ben de wan fu den 70 disipel di Yesus ben seni fu go preiki. Na so a e „tron wan apostel neleki den erfu trawan”.​—Tori 1:26.

Tin dei baka di Yesus opo go na hemel, a Dyu Pinksterfesa fu a yari 33 e hori. Sowan 120 disipel fu Yesus kon makandra na ini wan sodrokamra na Yerusalem. Wantronso wan babari de fu yere na ini na a heri oso. A ben de neleki te wan tranga winti e wai. Ne den e si sani leki pikin faya na tapu na ede fu ibriwan fu den sma drape. Wantronso ala den disipel e bigin taki difrenti tongo. Na so den kisi santa yeye soleki fa Yesus pramisi den!​—Yohanes 14:26.