De leki Yesus èn preiki nanga deki-ati

„Gado gi wi deki-ati fu fruteri unu a bun nyunsu.”​—1 TES. 2:2.

1. Fu san ede a switi fu yere a bun nyunsu fu a Kownukondre?

A SWITI srefisrefi fu yere bun nyunsu! Èn a moro bun nyunsu, na a nyunsu fu Gado Kownukondre. A bun nyunsu disi e gi wi a dyaranti taki wan kaba sa kon na pina, siki, pen, sari, nanga dede. A e gi wi a howpu fu kisi têgo libi, a e tyari kon na krin san Gado o du, èn a e sori wi fa wi kan tron sma di Gado lobi. Yu ben o fruwakti taki ala sma ben o breiti fu yere a nyunsu disi di Yesus ben e fruteri libisma. Ma a de wan sari sani taki dati no de so.

2. Fruklari san Yesus ben wani taki nanga den wortu: „Mi kon fu tyari trobi kon.”

² Yesus ben taigi den disipel fu en: „No prakseri taki mi kon fu tyari vrede kon na grontapu; mi no kon fu tyari vrede kon, ma mi kon fu tyari wan feti-owru kon. Bika mi kon fu tyari trobi kon na mindri wan man nanga en papa, na mindri wan umapikin nanga en mama, èn na mindri wan yongu wefi nanga a mama fu en masra. Iya, den feanti fu wan sma sa de en eigi osofamiri” (Mat. 10:34-36). Na presi taki sma breiti fu yere a bun nyunsu, furu fu den no wani arki en. Son sma e tron feanti fu den wan di e meki a nyunsu disi bekènti, èn a no abi trobi efu den sma dati na famiriman.

3. San wi musu abi èn san wi musu du fu man du a preikiwroko?

³ Wi e meki den srefi tru tori bekènti di Yesus ben e fruteri sma, èn te sma e yere den tori dati, dan den e handri nanga wi neleki fa furu sma na ini a ten fu Yesus ben e handri nanga en. A sani dati no musu fruwondru wi. Yesus  ben taigi den disipel fu en: „Wan srafu no bigi moro en masra. Efu den frufolgu mi, dan den o frufolgu unu tu” (Yoh. 15:20). Na ini furu kondre sma no e frufolgu wi krinkrin. Ma wi e kisi fu du nanga sma di e teige wi, èn nanga sma di no wani arki. Fu dati ede, wi musu abi bribi èn wi musu horidoro fu man preiki a bun nyunsu nanga deki-ati.​—Leisi 2 Petrus 1:5-8.

4. Fu san ede Paulus ben musu teki „deki-ati” fu preiki?

⁴ Kande yu feni en muilek son leisi fu teki prati na a diniwroko. Noso kande yu no abi nofo deki-ati fu teki prati na wan fu den difrenti fasi fa wi e du a preikiwroko. Efu dati de so, dan yu a no a wan-enkri preikiman di abi a problema disi. Na apostel Paulus ben de wan preikiman di ben abi deki-ati, a no ben e frede fu preiki, èn a ben e frustan den tru tori fu Bijbel heri bun. Ma toku a ben muilek gi en son leisi fu preiki a bun nyunsu. Luku san Paulus ben skrifi den Kresten na ini Tesalonika: „Baka di den sma na Filipi pina wi fosi èn den du sani nanga wi na wan syen fasi (soleki fa unu sabi), dan wi Gado gi wi deki-ati fu fruteri unu a bun nyunsu fu Gado, aladi a ben muilek srefisrefi gi wi” (1 Tes. 2:2). Na ini Filipi, den tiriman ben fon Paulus nanga en mati Silas nanga tiki, den ben poti den na strafu-oso, èn den ben bui den (Tori. 16:16-24). Ma toku Paulus nanga Silas teki „deki-ati” èn den preiki go doro. Fa wi kan teki na eksempre fu den man disi? Fu man kisi piki tapu na aksi dati, dan meki wi go luku san yepi den futuboi fu Gado na ini Bijbel ten fu fruteri sma den tru tori fu Yehovah nanga deki-ati. Wi sa luku tu fa wi kan teki na eksempre fu den futuboi dati.

Den fosi Kresten ben musu abi deki-ati fu man kakafutu gi gensman

5. Fu san ede sma di e gi yesi na Yehovah, musu abi deki-ati ala ten?

⁵ A no de fu taki dati Yesus Krestes ben de a moro bun eksempre fu wan sma di ben abi deki-ati. Ma toku, ala sma di e gi yesi na Yehovah musu abi deki-ati, èn dati de so sensi a bigin fu a libisma historia. Fu san ede? Baka di sma opo densrefi teige Yehovah na ini Eden, dan Yehovah taki dati den wan di e dini En èn den wan di e dini Satan ben o de feanti fu makandra (Gen. 3:15). A sani disi ben de fu si heri esi di Abel, wan reti-ati man, lasi en libi fu di en brada kiri en. Bakaten, sma ben e suku fu du ogri nanga Heinok, wan tra reti-ati man di ben e libi na ini a ten bifo a Frudu. Heinok ben e meki bekènti taki Gado ben o kon nanga den dusundusun santawan fu en fu krutu ala ogrisma (Yud. 14, 15). A no de fu taki dati sma no ben wani yere a boskopu disi. Sma ben e tegu gi Heinok, èn soleki fa a sori, den ben o kiri en efu Yehovah no ben teki en. Heinok ben abi deki-ati trutru!​—Gen. 5:21-24.

6. Fu san ede Moses ben musu abi deki-ati fu man taki nanga Farao?

⁶ Prakseri sosrefi fa Moses sori deki-ati di a ben e taki nanga Farao. A no ben de so nomo taki sma ben e si Farao leki wan man di ben e teki presi gi den gado. Na presi fu dati, den ben e si Farao srefi leki wan gado. Den ben e si en leki a manpikin fu Ra, a gado fu a son. A kan taki a Farao disi ben e anbegi wan prenki fu ensrefi, neleki fa den tra Farao ben e du dati. Te Farao ben taki wan sani, dan a sani dati ben de wèt. Farao ben abi makti, a ben abi heimemre, èn a ben trangayesi. Fu dati ede, a no ben gwenti taki tra sma ben e kon taigi en sani a ben musu du. Na fesi a man disi, Moses, wan safri-ati skapuman, ben musu go ibri tron baka. Èn a ben musu du dati aladi a no ben e kisi kari fu Farao, èn aladi Farao no ben breiti fu si en. San Moses fruteri Farao? A fruteri en taki ogri-ati rampu ben o pasa. Èn san a taigi Farao fu du? A taigi Farao fu gi milyunmilyun srafu fu en primisi fu gowe libi a kondre fu en! A no de fu taki dati Moses ben musu abi deki-ati!​—Num. 12:3; Hebr. 11:27.

7, 8. (a) Sortu tesi ben miti den futuboi fu Yehovah di ben e libi na ini a ten bifo Yesus? (b) San ben yepi den owruten futuboi fu Gado fu tan horibaka gi a tru anbegi èn fu tan gi kotoigi fu na anbegi disi?

⁷ Na ini den hondrohondro yari baka di a pipel fu Gado ben komoto na ini Egepte, tra profeiti nanga futuboi fu Gado ben abi deki-ati tu  fu opo taki gi a tru anbegi. A grontapu fu Satan no ben e sori switifasi gi den. Paulus e taki: „Sma ston den kiri, sma tesi den, den sa den koti na pisipisi, sma kiri den nanga feti-owru, den waka lontu na ini skapububa, na ini krabitabuba, aladi den ben de na nowtu, èn den ben de na ini banawtu, èn sma ben e libi takru nanga den” (Hebr. 11:37). San yepi den reti-ati futuboi dati fu tanapu kánkan? Na ini Hebrewsma 11:13, na apostel Paulus ben taki san ben gi Abel, Abraham, Sara, nanga tra futuboi fu Gado a krakti fu horidoro. A ben taki: „Den no si fa den pramisi disi kon tru, ma [fu di den ben abi bribi, meki] den ben si den fu farawe kaba, èn den ben prisiri nanga dati.” Den profeiti soleki Elia, Yeremia, nanga trawan di ben e libi na ini a ten bifo Krestes, ben abi a deki-ati fu opo taki gi a tru anbegi. A no de fu taki dati den ben man horidoro tu fu di den ben abi a frutrow taki den pramisi fu Yehovah ben o kon tru.​—Tit. 1:2.

⁸ Den futuboi fu Gado di ben e horibaka gi a tru anbegi na ini a ten bifo Krestes, ben e fruwakti wan tumusi moi tamara. Te den kisi wan opobaka, dan den sa tron volmaakti sma, èn den „o komoto na ini a katibo di e tyari pori kon”. Dati o pasa nanga yepi fu Krestes Yesus nanga den tra 144.000 priester (Rom. 8:21). Boiti dati, Yeremia nanga tra owruten futuboi fu Gado, teki deki-ati fu di den ben e bribi a sani disi di Gado ben pramisi Yeremia: „A no de fu taki dati den sa gens yu, ma den no sa abi bun bakapisi, bika ’mi de nanga yu’, na so Yehovah taki, ’fu frulusu yu’” (Yer. 1:19). Na ini a ten disi, wi e kisi deki-ati tu te wi e prakseri san Yehovah o du na ini a ten di e kon, èn te wi e prakseri a dyaranti di a gi wi taki a sa kibri wi gi iniwan sani di kan pori a matifasi di wi abi nanga en.​—Odo 2:7; leisi 2 Korentesma 4:17, 18.

Yesus ben e preiki nanga deki-ati fu di a ben lobi trawan

9, 10. Fa Yesus sori deki-ati na fesi (a) den kerki fesiman, (b) wan grupu srudati, (c) a granpriester, (d) Pilatus?

⁹ Yesus, wi Eksempre, ben sori deki-ati na difrenti fasi. Fu eksempre, aladi den wan di ben abi makti no ben lobi Yesus kwetikweti, toku a fruteri sma soifri san Gado ben wani den fu sabi. A no ben frede fu tyari kon na krin taki den kerki fesiman ben e denki taki den bun moro trawan, èn a tyari kon na krin tu taki den sani di den ben e leri sma ben de falsi leri. Den man dati ben o kisi krutu, èn Yesus ben taigi den dati krinkrin. Wan leisi a ben taigi den: „Helu fu unu, un leriman fu Wet nanga Fariseiman, un hoigriman! Bika un gersi grebi di sma meki kon weti èn di moi na dorosei, ma inisei den lai nanga dedesma bonyo nanga ala sortu morsu sani. Na so a de tu nanga unu; na ini sma ai a gersi leki unu regtfardiki, ma na ini un ati unu e hoigri kefalek èn unu e prakseri soso kruktudu.”​—Mat. 23:27, 28.

¹⁰ Di wan grupu srudati waka go miti Yesus na ini a dyari fu Getseimanei, dan Yesus no ben frede fu taigi den suma na en (Yoh. 18:3-8). Bakaten, den tyari Yesus go na fesi a Sanhedrin, pe a granpriester poti aksi gi en. Aladi Yesus ben sabi taki a granpriester ben e suku wan reide fu kiri en, toku a no ben frede fu taigi en taki en na a Krestes èn a Manpikin fu Gado. Yesus ben taigi den moro fara taki den ben o si en ’e  sidon na a reti-anusei fu a maktiwan èn taki den ben o si en e kon na tapu den wolku fu hemel’ (Mark. 14:53, 57-65). Syatu baka dati, Yesus ben musu tanapu na ini bui na fesi Pilatus di ben kan fri en efu a ben wani dati. Ma Yesus tan tiri di sma bigin taki ogri fu en (Mark. 15:1-5). Yesus ben musu abi furu deki-ati fu man du ala den sani dati.

11. Fa lobi kan yepi wi fu sori deki-ati?

¹¹ Yesus ben taigi Pilatus: „Na fu disi ede mi gebore èn na fu disi ede mi kon na grontapu, so taki mi kan kotoigi fu a waarheid” (Yoh. 18:37). Yehovah ben gi Yesus a komando fu preiki a bun nyunsu, èn Yesus ben du dati nanga prisiri, fu di a lobi en Papa di e tan na hemel (Luk. 4:18, 19). Yesus ben lobi a pipel tu. A ben sabi taki a libi no ben makriki gi den. Fu di wi abi trutru lobi gi Gado èn gi tra sma, meki wi e preiki nanga deki-ati tu.​—Mat. 22:36-40.

A santa yeye e gi wi deki-ati fu preiki sondro frede

12. Sortu sani ben gi den fosi disipel prisiri?

¹² Na ini den wiki baka di Yesus dede, Yehovah ben e meki moro sma tron disipel, èn a sani disi ben gi den disipel prisiri. Na a ten dati, furu Dyu nanga sma di ben teki a Dyu bribi ben de na ini Yerusalem. Den sma disi di ben komoto fu furu difrenti kondre, ben kon drape fu hori a Paskafesa. Fu taki en leti, na ini wán dei nomo, 3000 fu den sma disi teki dopu! A ben musu de so taki ala sma na ini Yerusalem ben e taki fu a tori dati! Bijbel e taki: „Ibriwan fu den sma disi bigin frede, èn den apostel bigin du furu bigi sani nanga wondru.”​—Tori. 2:41, 43.

13. Fu san ede den brada begi Gado fu gi den deki-ati, èn san ben de a bakapisi?

¹³ Den kerki fesiman di ben e atibron srefisrefi, meki sma grabu Petrus nanga Yohanes, èn den meki den tan na strafu-oso a neti dati. Den taigi den tu taki den no ben musu taki fu Yesus. Di den lusu den tu disipel disi, dan den disipel go fruteri den brada san ben pasa, èn den alamala begi Gado fu yepi den fu di den ben e kisi gens. Den taki: „Yehovah, . . . grantangi, meki den srafu fu yu tan taki a wortu fu yu sondro frede.” San ben de a bakapisi? „Santa yeye kon na tapu den alamala èn den ben e taki a wortu fu Gado sondro frede.”​—Tori. 4:24-31.

14. Fa a santa yeye e yepi wi te wi e preiki?

¹⁴ Luku taki na Yehovah en makti santa yeye yepi den disipel fu preiki Gado wortu nanga deki-ati. Te wi abi a deki-ati fu fruteri trawan den tru tori fu Bijbel, iya, awansi den sma dati e gens a boskopu fu wi, dan a krakti dati no e komoto fu wisrefi, ma a e komoto fu Gado. Te wi e aksi Yehovah fu gi wi en santa yeye, dan a man gi wi a yeye dati, èn a sa du dati tu. Te Yehovah e yepi wi, dan wi o man sori deki-ati tu fu man pasa iniwan sortu tesi.​—Leisi Psalm 138:3.

Kresten na ini a ten disi e preiki nanga deki-ati

15. Fa a tru anbegi e tyari prati kon na ini a ten disi?

¹⁵ Na ini a ten disi, a tru anbegi e tyari prati kon ete na mindri sma, neleki fa a ben de na ini owruten. Son sma e teki a tru anbegi, aladi trawan no e frustan na anbegi fu wi, noso den no abi lespeki gi en. Son sma e krutu wi, den e spotu wi, èn sonwan fu den e tegu gi wi, neleki fa Yesus ben taki dati sma ben o du (Mat. 10:22). Son leisi, nyunsu nanga koranti e fruteri lei nanga ogri-ati sani fu wi (Ps. 109:1-3). Ma toku a pipel fu Yehovah e tan preiki a bun nyunsu nanga deki-ati na heri grontapu.

16. Sortu ondrofenitori e sori taki te wi abi deki-ati, dan sma kan kon abi wan tra denki fu a boskopu fu wi?

¹⁶ A deki-ati di wi abi, kan meki taki sma e kisi wan tra denki fu a Kownukondre boskopu. Wan sisa na ini Kirgistan e fruteri: „Di mi ben de na ini a preikiwroko wan dei, dan wan ososma taigi mi: ’Mi e bribi na ini Gado, ma mi no e bribi na ini a Gado fu den Kresten. Efu yu kon na a portu disi ete wan leisi, dan mi o lusu mi dagu gi yu!’ Mi si taki wan bigi dagu ben tai na wan keti na tapu a man en dyari. Ma di wi ben e prati a Kownukondre Nyunsu nr. 37, di nen ’A kaba fu falsi kerki de krosibei!’, dan  mi bosroiti fu go baka na a srefi oso dati. Mi ben howpu taki mi ben o miti wan tra sma fu a man en osofamiri. Ma a srefi man opo a doro. Baka di mi begi Yehovah esi-esi, mi taki: ’Fa yu tan? Mi sabi ete san yu ben taigi mi dri dei pasa, èn mi no frigiti a dagu fu yu. Ma mi no ben kan pasa sondro fu kon na yu oso, bika neleki yu, mi e bribi na ini a wan-enkri tru Gado. Heri esi Gado sa tyari wan kaba kon na ala bribi di no e gi grani na en. Yu kan leisi moro fu a tori dati na ini a traktaat disi.’ Mi no ben man bribi taki a man teki a Kownukondre Nyunsu-traktaat. Baka dati, mi go na wan tra oso. Wan tu miniti baka dati, a man lon kon na mi baka nanga a Kownukondre Nyunsu-traktaat na ini en anu. A taki: ’Mi leisi en. San mi musu du so taki Gado no e strafu mi?’” A man bigin studeri Bijbel, èn a bigin kon na den Kresten konmakandra.

17. Fa a deki-ati fu wan sisa gi wan Bijbelstudenti deki-ati fu no frede libisma moro?

¹⁷ Te wi abi deki-ati, dan dati kan meki taki tra sma e sori deki-ati tu. Na ini Rosiakondre, wan sisa di ben e sidon na ini wan bus, ben wani gi wan tra sma na ini a bus wan tijdschrift. Ne, wan man dyompo komoto fu en sturu, a grabu a tijdschrift puru na ini a sisa en anu, a kroiki en, èn a fringi en na gron. A kosi a sisa meki ala sma yere, èn a komanderi en fu taigi en pe a ben e tan. A warskow a sisa tu taki a no ben mag preiki na ini a dorpu drape. A sisa begi Yehovah fu yepi en, èn a prakseri den wortu disi di Yesus ben taki: „No frede den sma di kan meki a skin kisi pori” (Mat. 10:28). A sisa opo safri sondro fu atibron, èn a taigi a man: „Mi no o taigi yu pe mi e tan, èn mi o tan preiki na ini a dorpu.” Baka dati, a sisa saka komoto na ini a bus. Ma a no ben sabi taki wan Bijbelstudie fu en ben e sidon na ini a srefi bus. Na uma dati no ben e kon na den Kresten konmakandra, fu di a ben e frede libisma. Ma baka di a Bijbelstudie disi si fa a sisa fu wi ben sori deki-ati, dan a bosroiti fu go na den konmakandra.

18. San o yepi yu fu preiki nanga deki-ati neleki fa Yesus ben e du dati?

¹⁸ Na ini a grontapu disi pe sma no e anbegi Gado, wan Kresten musu abi deki-ati fu man preiki neleki Krestes. San o yepi yu fu du dati? Prakseri a howpu di yu abi. Tan abi tranga lobi gi Gado èn gi tra sma. Begi Yehovah fu gi yu deki-ati. Ala ten hori na prakseri taki noiti yu de yu wawan, bika Yesus de nanga yu (Mat. 28:20). A santa yeye sa gi yu krakti. Èn Yehovah sa blesi yu èn a sa yepi yu. Dati meki wi kan abi deki-ati èn wi kan taki: „Yehovah na mi yepiman; mi no sa frede. San libisma kan du mi?”​—Hebr. 13:6.

San yu ben sa piki?

• Fu san ede den futuboi fu Gado musu abi deki-ati?

• Te a abi fu du nanga a sori di wi musu sori deki-ati, dan san wi e leri fu . . .

den futuboi fu Gado di ben e libi na ini a ten bifo Krestes?

Yesus Krestes?

den fosi Kresten?

den Kresten brada nanga sisa na ini a ten disi?

[Aksi fu a tori disi]

[Prenki na tapu bladzijde 21]

Yesus no ben frede fu tyari a hoigrifasi fu den kerki fesiman kon na krin

[Prenki na tapu bladzijde 23]

Yehovah e gi wi deki-ati fu preiki