„Unu na mi mati”

„Unu na mi mati te unu e du san mi e taigi unu.”​—YOH. 15:14.

1, 2. (a) Sortu mati Yesus ben abi? (b) Fu san ede a de tumusi prenspari taki wi na mati fu Yesus?

DIFRENTI sortu man ben e sidon na ini a sodrokamra makandra nanga Yesus. Petrus nanga Andreas di ben de brada, ben de fisiman. Fosi, Mateyus ben e teki belasting-moni gi lanti, èn den Dyu ben e tegu gi sma di ben e du a wroko dati. Ma a kan taki sonwan fu den man, soleki Yakobus nanga Yohanes, ben sabi Yesus sensi di den ben pikin. Trawan fu den, soleki Natanael, kande ben sabi Yesus wan tu yari nomo (Yoh. 1:43-50). Ma toku ala den man di ben de na ini Yerusalem a prenspari neti dati di a Paskafesa ben e hori, ben abi na overtoigi taki Yesus ben de a Mesias, noso a Manpikin fu a libi Gado (Yoh. 6:68, 69). Den ben musu fu firi bun di den yere fa a taigi den: „Mi kari unu mi mati, fu di mi taigi unu ala den sani di mi yere fu mi Tata.”​—Yoh. 15:15.

² Fu taki en leti, den wortu dati di Yesus taigi den reti-ati apostel fu en, abi fu du nanga ala salfu Kresten na ini a ten disi, èn sosrefi nanga den „tra skapu” di e wroko makandra nanga den (Yoh. 10:16). Awansi fa wi kweki, èn awansi suma na wi, toku wi kan abi a grani fu de mati fu Yesus. A de prenspari trutru taki wi na mati fu Yesus, bika te wi na mati fu en, dan wi sa de mati tu fu Yehovah. Fu taki en leti, wi no sa man kon krosibei na Yehovah, efu wi no kon krosibei fosi na Krestes. (Leisi Yohanes 14:6, 21.) San wi musu du dan fu tron mati fu Yesus èn fu tan mati fu en? Fosi wi o taki fu a prenspari tori dati, wi sa luku fa wi kan de wan bun mati neleki Yesus. Wi sa luku tu san wi kan leri fu den disipel fu en di ben de mati fu en.

Yesus ben de wan bun mati

3. Fa sma ben sabi Yesus?

³ A koni kownu Salomo ben skrifi: „Wan guduman lai mati” (Odo 14:20). Den wortu dati e sori taki furu sondusma no e meki mati fu di den wani gi sani, ma fu di den wani kisi sani. Yesus no ben abi a swakifasi dati. Te wan sma ben abi gudu noso biginen, dan den sani dati no ben abi krakti tapu Yesus. A tru taki Yesus ben lobi wan yongu tiriman di ben gudu, èn a aksi a tiriman disi fu tron wan bakaman fu en. Ma Yesus ben taigi a man fu seri den gudu fu en èn fu gi a moni na den pôtiwan (Mark. 10:17-22; Luk. 18:18, 23). Sma no ben sabi Yesus leki wan man di ben abi mati di ben gudu èn di ben abi biginen. Na presi fu dati, den ben sabi en leki wan man di ben de wan mati fu mofinawan èn fu sma di trawan ben e wisiwasi.​—Mat. 11:19.

4. Fu san ede wi kan taki dati den mati fu Yesus ben abi swakifasi?

⁴ A no de fu taki dati den mati fu Yesus ben abi swakifasi. Son leisi, Petrus no ben e si sani soleki fa Gado e si sani (Mat. 16:21-23). Yakobus nanga Yohanes ben aksi Yesus fu gi den wan hei posisi na ini a Kownukondre, èn a sani dati ben e sori taki den ben lobi fu kisi biginen. Den tra apostel ben atibron nanga den fu a sani disi, èn den ben lobi strei nanga makandra suma fu den ben o kisi wan moro hei posisi. Ma Yesus ben abi pasensi nanga den mati fu en, èn a ben e teki en ten fu pruberi fu meki den kisi wan tra denki fu sani.​—Mat. 20:20-28.

5, 6. (a) Fu san ede Yesus tan mati nanga furu fu den apostel fu en? (b) Fu san ede Yesus tapu fu de mati nanga Yudas?

⁵ Yesus no ben tan mati fu den sondu man disi fu di a ben e tapu ai gi den swakifasi fu den. Na presi fu dati, a ben si taki den man disi ben abi wan bun ati èn taki den ben abi bun fasi. Fu eksempre, Petrus, Yakobus,  nanga Yohanes ben fadon na sribi na presi taki den ben e horibaka gi Yesus na a ten di a ben e kisi bun hebi tesi. A no de fu taki, dati Yesus no ben feni en bun taki den du dati. Ma toku a ben si taki den no ben du dati fu espresi. A taigi den: „A tru taki a yeye wani, ma a skin swaki.”​—Mat. 26:41.

⁶ Ma Yesus ben tapu fu de mati nanga Yudas Iskariot. Aladi Yudas tan du neleki a ben de wan mati fu Yesus, toku Yesus kon si taki a man disi di ben de wan bun mati fu en fosi, ben gi pasi taki en ati kon pori. Fu di Yudas ben tron wan mati fu grontapu, meki a ben tron wan feanti fu Gado (Yak. 4:4). Dati meki Yesus seni Yudas gowe, fosi a taigi den tra 11 apostel taki den na en mati.​—Yoh. 13:21-35.

7, 8. Fa Yesus sori taki a lobi den mati fu en?

⁷ Yesus no ben e poti prakseri na den fowtu fu den tru mati fu en, èn a ben e suku a bun fu den. Fu eksempre, a begi en Papa fu kibri den te den ben e kisi tesi. (Leisi Yohanes 17:11.) Yesus ben e hori na prakseri taki den ben abi rostu fanowdu son leisi (Mark. 6:30-32). Èn a no ben e suku nomo fu taigi den fa en ben e denki, ma a ben wani yere tu fa den ben e denki èn fa den ben e firi.​—Mat. 16:13-16; 17:24-26.

⁸ Yesus ben e libi gi den mati fu en, èn a dede tu gi den. A tru taki a ben sabi taki a ben o abi fu gi en libi leki wan ofrandi di e kruderi nanga den regtfardiki markitiki fu en Papa (Mat. 26:27, 28; Hebr. 9:22, 28). Ma Yesus gi en libi fu sori taki a lobi den mati fu en. A ben taki: „Nowan sma abi moro lobi leki a sma di gi en libi gi den mati fu en.”​—Yoh. 15:13.

Fa den disipel ben sori taki den ben breiti fu abi Yesus leki den mati?

9, 10. Fa sma ben feni en taki Yesus ben lobi fu gi sani?

⁹ Yesus ben de klariklari fu gi en ten, en lobi, nanga den sani di a ben abi fu yepi trawan. Dati meki sma ben lobi en, èn den ben lobi fu gi en sani tu (Luk. 8:1-3). Yesus srefi ben kan taki: „Abi a gwenti fu gi sma sani, dan sma sa gi unu sani tu. Den o lai wan baskita, stampu en moi, seki en bun, furu en pasa marki, dan den o kanti en poti na ini a saka fu un krosi. Bika na a fasi fa unu e handri nanga trawan, na a fasi dati den sa handri nanga unu tu.”​—Luk. 6:38.

¹⁰ A no de fu taki, dati son sma ben e waka nanga Yesus, soso fu luku san den ben kan kisi fu en. Den falsi mati disi drai baka gi Yesus di den no ben e frustan wan sani di a ben taki. Na presi taki den ben e frutrow tapu Yesus, den bigin denki takru fu en, èn den drai baka gi en. Ma tra fasi leki den mati disi, den apostel horibaka gi Yesus. Nofo tron, a no ben makriki gi den fu tan horibaka gi Krestes, ma den du ala muiti fu du dati na ini bun ten  èn na ini muilek ten. (Leisi Yohanes 6:26, 56, 60, 66-68.) A lasti neti di Yesus ben de na grontapu leki libisma, a sori den mati fu en taki a ben breiti nanga den. A taigi den: „Unu na den wan di tan nanga mi di mi ben kisi tesi.”​—Luk. 22:28.

11, 12. Sortu dyaranti Yesus ben gi den disipel? San den ben du?

¹¹ Syatu baka di Yesus prèise den disipel fu en taki den ben tan horibaka gi en, den srefi man disi drai baka gi en. Fu di den ben frede libisma, meki fu wan syatu pisi ten, a lobi di den ben abi gi Krestes, kon lasi krakti. Yesus gi den pardon baka. Baka di a dede èn a kisi wan opobaka, a kon na den, èn a gi den a dyaranti taki a ben de den mati ete. Boiti dati, a gi den wan santa diniwroko. Iya, den ben musu „go na sma fu ala kondre” fu meki den tron disipel. Boiti dati, den ben musu de kotoigi fu en „te na den moro farawe presi fu grontapu” (Mat. 28:19; Tori. 1:8). San den disipel du?

¹² Den disipel du ala san den ben man fu preiki a Kownukondre boskopu. Nanga yepi fu Yehovah en santa yeye, den sma na ini heri Yerusalem heri esi kon sabi a boskopu fu den (Tori. 5:27-29). Awansi sma ben e suku fu kiri den, toku den tan gi yesi na a komando di Yesus ben gi den fu meki disipel. Wan tu yari nomo baka di den ben kisi a komando fu meki disipel, na apostel Paulus ben kan skrifi taki a bun nyunsu ben preiki „gi ala sma na grontapu” (Kol. 1:23). A no de fu taki, dati den apostel disi ben sori taki den ben breiti taki den ben de mati fu Yesus!

13. Fa den disipel fu Yesus ben meki den leri fu en abi krakti na den tapu?

¹³ Den sma di tron disipel, ben meki den leri fu Yesus abi krakti tapu a libi fu den. Gi furu fu den disipel, a sani disi ben wani taki dati den ben musu tyari bigi kenki kon na ini a fasi fa den ben e tyari densrefi èn na ini a fasi fa den ben de. Fosi, sonwan fu den nyun disipel ben e libi wan homo sekslibi, den ben e du sutadu, den ben de sopiman, èn den ben e fufuru (1 Kor. 6:9-11). Trawan fu den ben musu leri fu abi a yoisti denki fu sma di ben de fu wan tra ras (Tori. 10:25-28). Ma toku den gi yesi na Yesus. Den kenki a fasi fa den ben de fosi, èn den tron nyun sma (Ef. 4:20-24). Den bigin denki „soleki fa Krestes e denki”, iya, den teki na eksempre fu Krestes.​—1 Kor. 2:16.

Wi kan de mati fu Krestes na ini a ten disi

14. San Yesus ben pramisi fu du na „a kaba fu a grontapu sistema”?

¹⁴ Furu fu den fosi Kresten ben sabi Yesus, noso den ben si en baka di a kisi wan opobaka. A no de fu taki dati wi no kisi a grani dati. We dan, fa wi kan de mati fu Krestes? Wan fasi fa wi kan du dati, na te wi e gi yesi na a rai di wi e kisi fu a getrow èn koni srafu, noso den salfu brada fu Yesus di e libi ete na grontapu. Yesus ben pramisi taki na „a kaba fu a grontapu sistema disi”, a ben o poti a srafu disi fu luku „ala den sani di a abi” (Mat. 24:3, 45-47). Na ini a ten disi, furu fu den sma di wani de mati fu Krestes, no de fu a srafu-grupu disi. Fu san ede den musu gi yesi na a rai di den e kisi fu a getrow èn koni srafu, efu den wani tan mati fu Krestes?

15. San e sori efu wan sma na wan skapu noso wan bokoboko?

¹⁵ Leisi Mateyus 25:31-40. Yesus ben kari den wan di ben o tron memre fu a srafu-grupu, en brada. Na ini na agersitori di abi fu du nanga a prati di Yesus e prati den skapu fu den bokoboko, Yesus e taki dati te wi e handri  bun nanga den brada fu en, dan a de neleki wi e handri bun nanga en. Fu taki en leti, a taki dati a sani di o sori efu wan sma na wan skapu noso wan bokoboko, na a fasi fa a sma dati e handri srefi nanga „den moro mofina brada fu [en]”. Dati meki te den wan di abi a howpu fu libi na grontapu wani de mati nanga Krestes, dan a de tumusi prenspari taki den e horibaka gi a getrow èn koni srafu.

16, 17. Fa wi kan sori taki wi na mati fu den brada fu Krestes?

¹⁶ Efu yu abi a howpu fu libi fu têgo na grontapu na ondro a Kownukondre fu Gado, dan fa yu kan sori taki yu na wan mati fu den brada fu Krestes? Wi sa poti prakseri na dri fasi fa yu kan du dati. Na a fosi presi, yu musu teki prati fayafaya na a preikiwroko. Krestes ben gi den brada fu en a komando fu preiki a bun nyunsu na heri grontapu (Mat. 24:14). Ma den brada fu Krestes di e libi ete na grontapu, no ben o man du a wroko dati sondro a yepi fu den tra skapu. Iya, ibri leisi te den tra skapu e teki prati na a preikiwroko, den e yepi den brada fu Krestes fu du a santa diniwroko fu den. A getrow èn koni srafu abi bigi warderi gi a sani disi di den mati fu den e du, èn Krestes e warderi dati tu.

¹⁷ Wan tra fasi fa den tra skapu kan yepi den brada fu Krestes, na fu gi moni fu horibaka gi a preikiwroko. Yesus ben gi den bakaman fu en deki-ati fu meki mati nanga yepi fu „onregtfardiki gudu” (Luk. 16:9). Dati no wani taki dati wi kan pai Yehovah nanga Yesus fu de wi mati. Na presi fu dati, te wi e gebroiki den gudu fu wi fu horibaka gi Kownukondre afersi, dan wi e sori taki wi na mati fu den, èn taki wi lobi den. A no den sani di wi e taki nomo sa sori dati, ma wi e sori dati sosrefi „nanga san wi e du èn nanga waarheid” (1 Yoh. 3:16-18). Wi e horibaka gi Kownukondre afersi nanga den gudu fu wi te wi e teki prati na a preikiwroko, èn te wi e gi moni fu yepi bow konmakandra presi. Wi e gi moni tu fu seti den presi disi kon bun baka, èn fu horibaka gi a preikiwroko di e du na heri grontapu. Awansi wi e gi furu noso pikinso nomo, toku Yehovah nanga Yesus breiti te wi e gi nanga prisiri.​—2 Kor. 9:7.

18. Fu san ede wi musu gi yesi na a Bijbel rai di wi e kisi fu den gemeente owruman?

¹⁸ Ete wan fasi fa wi kan sori taki wi na mati fu Krestes, na te wi e gi yesi na a rai di wi e kisi fu den gemeente owruman. Nanga yepi fu santa yeye, Yesus poti den man disi leki owruman (Ef. 5:23). Na apostel Paulus ben skrifi: „Gi yesi na den wan di e teki fesi na un mindri èn saka unsrefi na den ondro” (Hebr. 13:17). Kande a no sa makriki gi wi son leisi fu gi yesi na a Bijbel rai di wi e kisi fu den gemeente owruman. Kande wi sabi den swakifasi fu den, èn dati kan meki taki wi no sa wani gi yesi na a rai fu den. Ma toku, Krestes, na Edeman fu a gemeente, de klariklari fu gebroiki den man disi di abi fowtu. Dati meki, te wi e saka wisrefi na den ondro, dan dati sa sori efu wi na mati fu Krestes. Te wi e frudrage  den fowtu fu den owruman, èn te wi de klariklari fu teki a rai fu den, dan wi e sori taki wi lobi Krestes.

Pe wi kan feni bun mati?

19, 20. San wi kan feni na ini a gemeente, èn na san wi sa poti prakseri na ini a tra artikel?

¹⁹ Yesus e tan sorgu gi wi nanga yepi fu a tiri di wi e kisi fu den lobi-ati skapuman, èn nanga yepi fu den sma na ini a gemeente di wi kan si leki wi mama, wi brada nanga wi sisa. (Leisi Markus 10:29, 30.) Di yu bigin abi demakandra nanga a pipel fu Yehovah, dan fa yu famiri ben feni dati? Wi howpu taki den horibaka gi yu di yu ben e pruberi fu kon moro krosibei na Gado èn na Krestes. Ma Yesus ben warskow den disipel taki son leisi „den feanti fu wan sma sa de en eigi osofamiri” (Mat. 10:36). A de wan trowstu trutru fu sabi taki wi kan feni sma na ini a gemeente di de wan moro bun mati gi wi, leki wi eigi brada!​—Odo 18:24.

²⁰ Te wi e luku fa Paulus e gi sma odi na a kaba fu a brifi di a ben skrifi gi a gemeente na ini Rome, dan wi e si taki a ben abi furu bun mati (Rom. 16:8-16). Na a kaba fu a di fu dri brifi fu en, na apostel Yohanes ben taki: „Taki ibriwan fu den mati odi gi mi” (3 Yoh. 14). A de krin taki a ben abi furu bun mati tu. Fa na eksempre fu Yesus nanga den fosi disipel kan yepi wi fu tron bun mati nanga wi Kresten brada nanga sisa èn fu tan bun mati nanga den? Na ini a tra artikel wi sa kisi piki tapu na aksi dati.

Fa yu ben sa piki?

• Fu san ede Yesus ben de wan bun mati?

• Fa den disipel ben e sori taki den ben breiti fu abi Yesus leki den mati?

• Fa wi kan sori taki wi na mati fu Krestes?

[Aksi fu a tori disi]

[Prenki na tapu bladzijde 14]

Yesus ben wani sabi fa den mati fu en ben e denki fu sani èn fa den ben e firi

[Prenki na tapu bladzijde 16]

Fa wi kan sori taki wi wani de mati fu Krestes?