A PIPEL fu Yehovah ondrofeni furu moi sani na ini den someni yari di den e anbegi en. Wi kan leisi den span ondrofenitori disi na ini den buku nanga tijdschrift fu wi. Ma fowtow, brifi, nanga tra tori di sma skrifi noso tra sani di den abi, de tu fu sori wi san pasa na ini na anbegi fu wi, na ini a preikiwroko fu wi, èn na ini a historia fu wi. Ma fu san ede a bun fu kibri den sani disi èn fu sabi san pasa fositen? We, na ini owruten Israel den famiri-edeman ben musu fruteri den pikin den wèt fu Yehovah èn den tumusi moi sani di a du. Na so den pikin ben o „leri fu frutrow tapu Gado”.​—Ps. 78:1-7.

Sensi owruten a de so, taki a prenspari fu ondrosuku fositen sani fu man du san Yehovah wani. Fu eksempre, di gensman ben wani tapu a bow-wroko fu a tempel na ini Yerusalem, sma go ondrosuku den lanti-papira na Ekbatana, a mamafoto fu den Mediasma. Den papira disi tyari kon na krin taki Kownu Sirus ben gi primisi fu bow a tempel baka (Esra 6:1-4, 12). Na so den ben kan bow a tempel baka soleki fa Gado ben wani. Sosrefi, di a Bijbel skrifiman Lukas skrifi fu a libi fu Yesus, a „ondrosuku ala sani finifini sensi a bigin”.​—Luk. 1:1-4.

Den fositen sani fu na organisâsi fu wi prenspari srefisrefi gi a Tiri Skin. Wan brada fu a Tiri Skin ben sori taki a prenspari fu kibri, fu skrifi èn fu fruteri fositen sani fu na anbegi fu wi. A ben taki: „Efu  yu wani sabi pe yu e go, yu musu sabi pe yu komoto.” Fu dati ede den brada seti wan Kantoro fu historia afersi na a edekantoro na ini Brooklyn, New York. A kantoro disi de ondro a tiri fu a Skrifi Komte.

FOWTOW NANGA TRA MOI SANI FU FOSITEN

Nofo tron sma e frigiti den sani di pasa fositen, èn kande furu fu wi e winsi taki wi ben kibri den fositen sani fu wi famiri. A Kantoro fu historia afersi e du ala muiti now fu kibri den fositen sani fu Kotoigi èn fu skrifi sani di pasa na ini a historia fu wi. Den fositen fowtow di a kantoro disi e kibri, de leki wan buku pe sma gwenti poti fowtow fu a famiri fu den. Tra sani di a kantoro disi e kibri tu, na den fositen buku nanga tra sani di na organisâsi tyari kon na doro, span ondrofenitori fu Kotoigi, èn tra prenspari sani di Kotoigi ben e gebroiki fositen. Den sani disi na moi sani di e memre wi san pasa fositen na ini na anbegi fu wi èn den e gi wi a frutrow taki sani o waka bun nanga wi bigi famiri fu Kotoigi.

Nanga yepi fu a nyun artikel di nen „A historia fu wi”, wi wani yepi yu fu sabi san a Kantoro fu historia afersi abi kaba. Ten na ten yu o si na artikel disi na ini a Studie-Waktitoren. Fu eksempre, na ini a Studie-Waktitoren di o kon wi o abi wan artikel nanga fowtow di o fruteri wi san ben de a Dawn Mobile. A o sori tu suma ben e gebroiki en, o ten den ben e gebroiki en, èn fu san ede den ben e gebroiki en.

Den sani di de na a Kantoro fu historia afersi de leki wan fowtow buku di e fruteri fu wi èn fu ’den afo fu wi’. Na so wi kan leri sani fu a bribi nanga a deki-ati fu den fosi Kotoigi èn a prisiri nanga den problema di den ben abi fu di den ben e anbegi wi lobi-ati hemel Tata. Wi kan leri tu fa Gado tiri den èn fa a horibaka gi den ala ten (Deut. 33:27). Wi de seiker taki Yehovah o blesi a muiti di wi e meki fu kibri den fositen sani fu na anbegi fu wi, bika na so wi o firi moro nanga moro taki wi de wán, èn wi o kisi moro deki-ati fu du en wani.

[Faki/​Prenki na tapu bladzijde 31]

A wroko fu a Kantoro fu historia afersi

Te na organisâsi o tyari nyun DVD, buku, noso tra sani kon na doro, dan den skrifiman, den sma di e teken den prenki, nanga tra sma di e yepi, e ondrosuku den fositen sani fu wi. Fu dati ede, a Kantoro fu historia afersi e du ala muiti fu feni èn kibri furu fositen sani fu wi. Den feni den sani disi na den bijkantoro fu wi, na son kantoro na Betel, na gemeente, èn na sma nanga organisâsi di abi den sani disi. Meki wi luku syatu fa a wroko disi e du:

Fa den e kisi den fositen sani èn fa den e ondrosuku den: Ala ten a kantoro e kisi sani fu kibri. Furu fu den sani disi na sani fu futuboi fu Yehovah di ben dini en furu yari langa. Den famiri fu den ben de so bun fu gi noso leni na organisâsi fu wi den sani disi. Te a kantoro kisi den sani disi, dan den e ondrosuku den èn den e luku san a abi fu du nanga a historia fu wi. Disi e yepi wi fu frustan moro bun fa sani waka na ini a historia fu wi èn nanga den Kotoigi di ben e libi na a ten dati.

Den e skrifi san den kisi: A Kantoro fu historia afersi abi dusundusun sani, èn sonwan fu den owru moro leki 100 yari. Den sani disi na bigi sani, pikin sani, sani tapu papira noso fowtow. A kantoro e skrifi finifini fu ibriwan fu den sani disi, so taki den kan feni den makriki efu den wani sabi sani fu den bakaten.

Den e meki den fositen sani èn den e sorgu taki den tan bun: Te wan buku noso wan tra sani no de so bun moro, dan den e meki en kon bun baka. Sma di leri fa fu hori owruten sani bun, e du a wroko disi. Den e meki kopi fu prenspari papira, fowtow, koranti artikel, felem, nanga tori di teki tapu cassette noso plaat, dan den e poti dati na ini computer. Na so den no abi fu fasifasi den owruten sani disi ala ten te den abi den fanowdu. Den kan gebroiki den kopi di den abi na ini a computer.

Fa den e kibri èn suku den sani baka: Den e kibri den fositen sani bun, so taki den no lasi, èn so taki leti nanga watra no pori den. Ala san den sabi fu ibriwan fu den sani disi, den e poti na ini computer, so taki den kan gebroiki dati te den wani ondrosuku wan sani noso te den wani feni den prenspari fositen sani disi baka.

[Prenki na tapu bladzijde 32]

1. Prenki fu gi sma wan kari fu kon luku a „Photo-Drama der Schepping”. 2. Lijst fu sma di e kisi buku doronomo. 3. Wagi nanga bigi boksu. 4. A fesisei kafti fu The Watchtower fu 15 april 1912. 5. Papira di sori J. F. Rutherford taki a musu go na strafu-oso. 6. Mikrofon fu a radio-station WBBR. 7. Gramafon. 8. Kofru fu tyari buku. 9. Prenspari sani di son sma skrifi. 10. Telegram-brifi gi J. F. Rutherford.