1, 2. San Gado Kownukondre o du èn fu san ede wi kan de seiker taki a Kownukondre o kon?

NA A bigin fu a yari 31 na wan bergi krosibei fu Kaperna-um, Yesus Krestes leri den bakaman fu en fu begi: „Meki yu Kownukondre kon” (Mat. 6:10). Na ini a ten disi furu sma e aksi densrefi efu a Kownukondre o kon trutru. Ma wi sabi seiker taki Gado o piki den fayafaya begi fu wi pe wi e aksi taki en Kownukondre kon.

² Yehovah o gebroiki en Kownukondre fu meki en osofamiri na hemel nanga grontapu kon de wán baka. A sani disi di Gado abi na prakseri, o kon tru (Yes. 55:10, 11). Fu taki en leti, Yehovah tron Kownu kaba na ini a ten fu wi! Den kefalek moi sani di wi si na ini den 100 di pasa e sori taki disi de so trutru. Gado e du bigi sani gi den milyunmilyun futuboi di e gi yesi na en (Sak. 14:9; Openb. 15:3). Ma a tron di Yehovah tron Kownu, no de a srefi leki a kon di Gado Kownukondre musu kon, soleki fa Yesus leri wi fu begi. Fa den tu sani disi e difrenti èn fa dati abi krakti na wi tapu?

3. (a) O ten èn pe Yesus tron Kownu? (b) Fa yu kan sori taki a Kownukondre bigin tiri na ini 1914? (Luku san skrifi na a marki na ondrosei fu bladzijde 13.)

³ Na a kaba fu a di fu 19 yarihondro, den futuboi fu Gado  bigin frustan moro krin san a profeititori di Danièl skrifi moro leki 2500 yari pasa, ben wani taki. A ben skrifi: „Na ini a ten fu den kownu dati, a Gado fu hemel o seti wan kownukondre di noiti no o kisi pori” (Dan. 2:44). Furu yari langa den Bijbel Ondrosukuman ben e sori sma taki a yari 1914 ben de wan prenspari yari. Furu sma fu a ten dati ben prakseri taki ala sani ben o go bun. Wan skrifiman ben taki: „Sma na ini 1914 ben abi howpu èn den ben e bribi taki sani ben o go bun.” Ma di a Fosi Grontapufeti bigin a yari dati, a Bijbel profeititori disi kon tru. Baka dati yu ben kisi angriten, gronseki nanga takru siki di e kiri ipi-ipi sma. Ala den sani disi nanga tra Bijbel profeititori di ben e kon tru, sori krin taki Yesus Krestes bigin tiri leki Kownu fu Gado Kownukondre na ini a 1914. * Di Yehovah poti en Manpikin leki a Mesias Kownu a yari dati, yu kan taki dati Yehovah tron Kownu, ma na wan tra fasi now!

4. (a) San na a fosi sani di Yesus du di a tron Kownu? (b) San a du baka dati?

⁴ A fosi sani di a nyun Kownu fu Gado du, na taki a feti nanga Satan, a moro bigi Gensman fu en Tata. Yesus nanga den engel fu en fringi Didibri nanga den ogri yeye komoto na hemel. Disi meki taki bigi prisiri ben de na hemel, ma gi grontapu a ben tyari bigi pina kon. (Leisi Openbaring 12:7-9, 12.) Baka dati a Kownu bigin poti prakseri na den futuboi fu en na grontapu. A yepi den fu tyari kenki kon so taki den kon krin, a gi den leri èn a orga den fu du Gado wani. Meki wi go luku san wi na ini a ten disi kan leri fu a fasi fa den gi yesi na a tiri fu Yesus.

5. San Yesus krin na mindri 1914 nanga a fosi pisi fu 1919?

⁵ Baka di a nyun Kownu krin hemel puru Satan nanga en ogri yeye di ben kan kori den tra engel, Yehovah meki Yesus ondrosuku den bakaman fu en na grontapu èn a yepi den fu kon krin. A profeiti Maleaki skrifi taki na a fasi disi Yesus meki na anbegi kon soifri (Mal. 3:1-3). A historia e sori taki disi pasa na mindri 1914 nanga a fosi pisi fu 1919. * Fu kan de na ini na osofamiri fu Yehovah, wi musu de krin noso santa (1 Petr. 1:15, 16). Wi no musu meki falsi bribi noso politiek doti na anbegi fu wi.

6. Fa wi e kisi Bijbel leri èn fu san ede disi de prenspari?

⁶ Baka dati Yesus gebroiki en makti leki Kownu fu poti wan „koni srafu di de fu frutrow”. A srafu disi ben o sorgu taki ala sma di de fu a „wán ipi” di Yesus e tiri, ben o kisi leri fu Bijbel doronomo (Mat. 24:45-47; Yoh. 10:16). Sensi 1919 a koni srafu dati di de fu frutrow tan tyari a prenspari frantwortu di den abi fu gi leri na den tra „futuboi” fu Yesus. A srafu disi e gi wi furu leri fu Gado Wortu so taki wi kan tranga wi bribi. A leri disi yepi wi fu du ala san wi man fu tan krin na ini Gado ai te a abi fu du nanga wi anbegi, a fasi fa wi e tyari wisrefi, wi denki èn a fasi fa wi e sorgu wi skin nanga den sani di wi abi. A srafu gi wi ala san de fanowdu tu fu wroko tranga na ini a preikiwroko, di de a moro prenspari wroko na ini a ten disi. Yu e du ala san yu man fu kisi wini fu a leri disi?

7. Nanga sortu prenspari wroko Yesus bigin di a ben de na grontapu èn teleki o ten a wroko disi ben o go doro?

⁷ Di Yesus bigin nanga en diniwroko na grontapu, a taki: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon” (Luk. 4:43). Dri nanga afu yari langa a wroko disi ben de a moro prenspari sani gi  Yesus. A taigi den bakaman fu en: „Te unu e go preiki, dan un musu taki: ’A Kownukondre fu hemel kon krosibei kaba’” (Mat. 10:7). Baka di Yesus kisi wan opobaka, a taki dati den bakaman fu en ben o panya a boskopu disi go „te na den moro farawe presi fu grontapu” (Tori 1:8). A pramisi den taki te den ben o du a prenspari wroko disi, dan ensrefi ben o horibaka gi den teleki na ini a ten fu wi.—Mat. 28:19, 20.

8. Fa a Kownu ben gi en futuboi na grontapu deki-ati fu go preiki?

⁸ Sensi a yari 1919 ’a bun nyunsu fu a Kownukondre’ ben abi fu du nanga wan tra sani tu (Mat. 24:14). A Kownu ben e tiri na hemel èn a ben tyari wan pikin grupu futuboi di ben kon krin, kon na wán na grontapu. Den ben de klariklari fu gi yesi na a krin komando di den kisi: Preiki a bun nyunsu fu a nyun Kownukondre fu Gado na heri grontapu (Tori 10:42). Fu eksempre, sowan 20.000 sma di ben e horibaka gi a Kownukondre ben de na a internationaal kongres di ben hori na Cedar Point, Ohio, na Amerkankondre, na ini september 1922. Prakseri nomo fa den sma drape ben e prisiri di Brada Rutherford hori a lezing di nen „A Kownukondre”. Na ini a lezing disi a taki: „Luku, a Kownu e tiri! Unu na den sma di e fruteri fu en. Fu dati ede, preiki, preiki, preiki fu a Kownu nanga en kownukondre.” Tu dusun sma teki a kari disi èn na wan spesrutu „Preikiwroko Dei” den go preiki gi sma di ben libi sowan 72 kilometer moro fara fu a presi pe a kongres ben e hori. Wan brada di ben de fayafaya fu go preiki, taki: „Noiti moro mi o frigiti a kari di wi kisi fu preiki a Kownukondre èn a faya di ala sma ben abi di den ben kon makandra fu du a wroko disi!” A no a brada disi wawan ben denki so fu a tori.

9, 10. (a) Sortu sani seti fu gi leri na Kownukondre preikiman? (b) Fa yu srefi kisi wini fu a leri disi?

⁹ Na ini 1922, moro leki 17.000 Kownukondre preikiman ben e preiki na ini 58 kondre na heri grontapu. Ma den ben musu leri fa fu preiki. Na ini a fosi yarihondro, a nyun Kownu taigi den bakaman fu en krin san, pe èn fa den ben musu preiki (Mat. 10:5-7; Luk. 9:1-6; 10:1-11). Na ini a ten disi Yesus e sorgu taki ala preikiman leri fa den musu preiki èn taki den abi den sani di de fanowdu fu de bun leriman (2 Tim. 3:17). Yesus e gebroiki a Kresten gemeente fu leri den futuboi fu en fa fu preiki. Wan fasi fa a e du dati, de nanga yepi fu a Theokrasia Diniwroko-skoro di e hori na ini moro leki 111.000 gemeente na grontapu. Fu di moro leki seibi milyun preikiman e teki a leri disi, meki den sabi fa fu preiki èn gi leri na so wan fasi taki „ala sortu sma” kan kisi yepi.—Leisi 1 Korentesma 9:20-23.

¹⁰ Boiti a Theokrasia Diniwroko-skoro, yu abi tra Bijbelskoro tu di seti fu gi leri  na gemeente owruman, pionier, brada di no trow, Kresten trowpaar, zendeling nanga memre fu a Bijkantoro Komte nanga den wefi fu den. * Luku san den studenti fu wan fu den klas fu a Bijbelskoro gi Kresten trowpaar e taki fu sori a warderi fu den: „A spesrutu leri di wi kisi meki taki wi kon lobi Yehovah moro èn wi man yepi tra sma moro bun.”

11. Fa a du kon taki Kownukondre preikiman ben man horidoro, aladi Satan ben e gens den?

¹¹ Wi feanti Satan si omeni muiti sma e meki fu du a bigi wroko disi fu preiki fu a Kownukondre èn fu gi sma leri. Fu di a wani tapu a preikiwroko, meki a e gebroiki iniwan sani fu gens a Kownukondre boskopu nanga den sma di e tyari a boskopu disi. Ma Satan no o man tapu a wroko disi. Yehovah poti en Manpikin „moro hei leki ala tirimakti, ala hei makti, ala krakti, nanga . . . ala heihei sma” (Ef. 1:20-22). Leki Kownu, Yesus e gebroiki a makti fu en fu kibri den bakaman fu en èn fu tiri den so taki den kan du a wani fu en Tata. * Wi e preiki a bun nyunsu èn milyunmilyun reti-ati sma e leri fa fu anbegi Yehovah. A de wan bigi grani fu du a bigi wroko disi.

12. Fruteri san na wan tu sani di orga moro bun sensi di a Kownukondre seti.

¹² Sensi di a Kownukondre seti na ini 1914, a Kownu orga den futuboi fu Gado so taki den kan du a wani fu en Tata. (Leisi Yesaya 60:17.) Na ini 1919, den brada poti wan diniwroko fesiman na ini ibri gemeente, so taki a ben kan teki fesi na ini a preikiwroko. Na ini 1927, den brada orga a preikiwroko na so wan fasi taki ibri sonde sma ben kan preiki oso fu oso. Na ini 1931, den sma di ben e horibaka gi a Kownukondre teki a nen Yehovah Kotoigi èn den kisi deki-ati fu du moro na ini a preikiwroko (Yes. 43:10-12). Na ini 1938, sma no ben e stem moro sortu brada den ben o poti fu teki fesi na ini a gemeente. Na presi fu dati, wan brada ben kan kisi a frantwortu fu teki fesi te a ben e doro den markitiki di skrifi na ini Bijbel. Na ini 1972, den seti sani so taki wan grupu owruman kisi a frantwortu fu teki fesi na ini a gemeente, na presi taki wán owruman kisi a frantwortu disi. Ala lepi owruman nanga dinari ini a diniwroko ben kisi deki-ati fu ’luku den skapu fu Gado di a gi den fu sorgu’ (1 Petr. 5:2). Na ini 1976 a Tiri Skin ben seti na ini siksi komte so taki den ben man orga a Kownukondre wroko na heri grontapu. Sensi a ten dati Yesus tan yepi den bakaman fu en, so  taki den orga moro bun fu du sani na a fasi fa Gado wani.

13. Te yu luku ala den sani di a Kownukondre du na ini den 100 yari di pasa, dan fa disi abi krakti na yu tapu?

¹³ Prakseri nomo san a Mesias Kownu du na ini den fosi 100 yari di a e tiri leki Kownu. A krin wan pipel fu kan tyari a nen fu Yehovah. A tiri a wroko fu preiki a bun nyunsu fu a Kownukondre na ini 239 kondre èn a leri milyunmilyun sma fa den musu anbegi Yehovah. A tyari moro leki seibi milyun futuboi kon na wán èn ibriwan fu den sori taki den klariklari fu du a wani fu en Tata (Ps. 110:3). Iya, Yehovah e gebroiki a Mesias Kownukondre disi fu du bigi sani. Ma moro bigi sani musu kon ete!

14. (a) Te wi e begi: „Meki yu Kownukondre kon”, dan san wi e aksi Gado fu du? (b) San na a yaritekst fu 2014 èn fu san ede a fiti?

¹⁴ Aladi Yehovah poti en Manpikin Yesus Krestes leki a Mesias Kownu na ini 1914, disi no ben de a heri piki na tapu a begi fu wi pe wi e taki: „Meki yu Kownukondre kon” (Mat. 6:10). Na ini Bijbel skrifi taki Yesus ben o ’go na mindri den feanti fu en èn a ben o poti den na en ondro’ (Ps. 110:2). Libisma tiriman di abi Satan leki edeman e gens a Kownukondre te now ete. Te wi e begi taki Gado Kownukondre kon, dan wi e aksi Gado fu meki a Mesias Kownu nanga den tra sma di e tiri makandra nanga en, tyari wan kaba kon na den libisma tiriman èn na den sma na grontapu di e gens a Kownukondre. Na so Danièl 2:44 o kon tru pe skrifi taki Gado Kownukondre „o broko ala den kownukondre disi pisipisi èn a o tyari wan kaba kon na den”. A o puru ala politiek feanti fu a Kownukondre (Openb. 6:1, 2; 13:1-18; 19:11-21). A ten dati de krosibei. A yari 2014 na a yari pe wi e hori na prakseri taki Gado Kownukondre seti 100 yari kaba. Sobun, a fiti taki a yaritekst fu 2014 na Mateyus 6:10: „Meki yu Kownukondre kon.”

15, 16. (a) Sortu span sani o pasa te a Mesias tiri wán dusun yari? (b) San na a lasti sani di Yesus o du leki Mesias Kownu èn fa dati o meki a wani fu Yehovah kon tru?

¹⁵ Baka te a Mesias Kownu pori den feanti fu Gado, a o fringi Satan nanga den ogri yeye fu en go na ini a dipi peti di no abi gron èn den o tan drape wán dusun yari langa (Openb. 20:1-3). Te den ogri feanti disi no o de moro, dan a Kownukondre no o draidrai fu yepi sma kisi furu wini fu Yesus en frulusu-ofrandi èn a o puru den takru bakapisi di a sondu fu Adam tyari kon gi wi. A Kownu o meki milyunmilyun sma di e sribi na ini den grebi kon na libi baka èn a o orga wan bigi wroko fu leri sma sani fu Yehovah (Openb. 20:12, 13). Heri grontapu o tron wan paradijs neleki a dyari fu Eden. Ala libisma di no drai baka gi Gado o kon bun dorodoro.

¹⁶ Na a kaba fu Krestes en Dusun Yari Tiri, a Kownukondre fu a Mesias o meki ala den sani di Yehovah ben abi na prakseri gi grontapu kon tru. Baka dati Yesus o gi a Kownukondre baka na en Tata. (Leisi 1 Korentesma 15:24-28.) Na a ten dati wi no o abi wan sma fanowdu moro di musu taki gi wi na fesi Yehovah. Ala den manpikin fu Gado na hemel nanga den pikin fu en na grontapu o kon de wán nanga den hemel Tata èn den o de wán bigi famiri baka.

17. San yu wani du gi a Kownukondre, awinsi san e pasa?

¹⁷ Den span sani di pasa na ini den 100 yari di a Kownukondre e tiri kaba e gi wi a dyaranti taki Yehovah na Kownu te now ete èn taki den sani di a abi na prakseri o kon tru. Meki wi tan dini en leki futuboi ala ten èn meki wi tan preiki fu a Kownu nanga en Kownukondre. Wi de seiker taki heri esi Yehovah o piki a fayafaya begi fu wi pe wi e taki: „Meki yu Kownukondre kon”!