1, 2. (a) San a wani taki fu de wan kotoigi èn san nyunsuman no fruteri sma? (b) Fu san ede Yehovah no abi den nyunsuman fanowdu?

SAN a wani taki fu de wan kotoigi? Wan wortubuku e taki dati wan kotoigi na „wan sma di si fa wan sani pasa èn di e fruteri bakaten san a si”. Fu eksempre, na Zuid-Afrika yu abi wan koranti The Witness (A Kotoigi) di e kon na doro 160 yari kaba. A nen dati fiti fu di a e fruteri finifini san e pasa na difrenti presi na grontapu. A sma di bigin tyari a koranti disi kon na doro pramisi taki a ben o skrifi „san tru, ala san tru, èn noti moro leki san tru”.

² Ma a sari fu taki dati a no ala ten nyunsuman fruteri fa sani de trutru. A de krin taki den no taki suma na Gado trutru èn san a du gi wi. Ma Yehovah di de a Moro Hei Tiriman fu hemel nanga grontapu no abi nyunsuman fanowdu. Gado taigi a profeiti Esekièl fu skrifi: „Sma sa musu fu sabi taki mi na Yehovah” (Esek. 39:7). Yehovah abi sowan aiti milyun Kotoigi di e fruteri sma fu ala kondre suma na en. Den e fruteri sma tu san a du gi libisma na ini a ten di pasa èn san a e du na ini a ten disi. Den milyunmilyun Kotoigi disi e meki bekènti sortu moi sani Gado pramisi fu du gi libisma na ini a ten di e kon. Yesaya 43:10 e taki: „’Unu na mi kotoigi’, na so Yehovah taki. ’Unu na den wan di mi teki leki mi futuboi.’” Sobun, te wi e si a preikiwroko leki a moro prenspari sani na ini wi libi, dan wi e sori taki wi na trutru Kotoigi fu Yehovah.

3, 4. (a) O ten Bijbel Ondrosukuman teki wan nyun nen èn fa den ben firi di den teki a nen dati? (Luku a prenki na a bigin fu na artikel.) (b) Sortu aksi wi o luku now?

 ³ Na wan bigi grani fu tyari a nen fu Yehovah, fu di en na „a têgo Kownu” di e taki: „Disi na mi nen fu ala ten, èn disi na fa sma o memre mi fu têgo” (1 Tim. 1:17; Eks. 3:15; luku Preikiman 2:16). Na ini 1931, den Bijbel Ondrosukuman teki a nen Yehovah Kotoigi. Furu fu den skrifi brifi fu sori fa den ben breiti nanga a kenki disi. Wan gemeente na Kanada skrifi: „Di wi yere a bun nyunsu taki wi na ’Yehovah Kotoigi’, wi ben breiti trutru. A sani disi gi wi deki-ati baka fu tan tyari wisrefi na wan fasi di e sori taki wi warti fu tyari a nyun nen disi.”

⁴ Fa yu kan sori taki yu e si en leki wan bigi grani fu tyari a nen fu Gado? Yu kan fruklari tu fu san ede Yehovah e taki dati wi na en Kotoigi, soleki fa a skrifi na ini a buku Yesaya?

5, 6. (a) Na sortu fasi papa nanga mama na ini Israel ben musu sori taki den na kotoigi fu Yehovah? (b) Sortu tra sani papa nanga mama ben musu du èn fu san ede papa nanga mama na ini a ten disi musu du a srefi?

⁵ Yehovah ben teki den Israelsma fu de kotoigi fu en. Dati meki ibriwan fu den ben abi a frantwortu fu taki nanga trawan fu Yehovah (Yes. 43:10). Wan fasi fa papa nanga mama na ini Israel ben e kotoigi fu Gado na te den ben e leri den pikin san Gado ben du gi den afo. Fu eksempre, di Gado sori a pipel taki den musu hori a Paskafesa ibri yari, a taki: „Te un manpikin aksi unu: ’Fu san ede unu e hori a fesa disi?’, dan un musu taigi den: ’Wi e srakti a Paska-ofrandi gi Yehovah, fu di a ben pasa den oso fu den Israelsma di den ben de na ini Egepte. A ben tyari rampu kon na tapu den Egeptesma, ma a ben kibri den osofamiri fu wi’” (Eks. 12:26, 27). Kande den papa nanga mama disi fruteri  den pikin tu taki di Moses go na a tiriman fu Egepte a fosi leisi fu aksi en efu den Israelsma ben kan go anbegi Yehovah na ini a sabana, a tiriman disi taigi en: „Suma na Yehovah taki mi musu gi yesi na en, èn seni Israel gowe?” (Eks. 5:2) Papa nanga mama fruteri den pikin san Yehovah du fu sori Farao suma na en. A tyari tin rampu kon na tapu a kondre èn a frulusu den Israelsma na a Redi Se di a legre fu Egepte hari kon na den baka. Na so Farao nanga ala tra sma ben man si krin taki Yehovah na a Moro Hei Gado. Den Israelsma ben man si tu taki Yehovah na a tru Gado èn taki ala ten a e du san a pramisi.

⁶ Den Israelsma di ben warderi a grani fu tyari a nen fu Yehovah, fruteri den pikin fu den nanga den trakondre sma di ben tron srafu fu den, sortu moi sani Yehovah du gi den. Den Israelsma ben sabi tu taki den ben musu de santa sma. Yehovah taigi den: „Un musu de santa, bika mi, Yehovah un Gado, de santa.” Papa nanga mama ben musu leri den pikin fu de santa sma tu. Dati wani taki dati den ben musu libi soleki fa Yehovah wani (Lef. 19:2; Deut. 6:6, 7). Kresten papa nanga mama na ini a ten disi musu leri den pikin fu den tu fu tyari densrefi na wan fasi di e gi grani na a bigi nen fu Gado.—Leisi Odo 1:8; Efeisesma 6:4.

7. (a) Sortu krakti a ben abi tapu tra pipel te den Israelsma ben e gi yesi na Yehovah? (b) Sortu frantwortu ala sma abi di e tyari a nen fu Gado?

⁷ Sobun, te den Israelsma ben e gi yesi na Gado, dan dati ben e meki a nen fu en kisi grani. Gado taigi den: „Ala pipel fu grontapu o si taki unu e tyari Yehovah en nen, èn den o frede unu” (Deut. 28:10). Ma na wan sari sani taki nofo tron den Israelsma ben e trangayesi Gado. Ibri leisi baka den go anbegi falsi gado. Boiti dati, den bigin tyari densrefi leki den ogri-ati gado di den Kanansma ben e anbegi. Dati meki den gi den pikin fu den leki ofrandi èn den du ogri nanga pôtisma. A tori disi e leri wi taki wi musu du muiti ala ten fu de santa sma, fu di wi e tyari a nen fu a Moro Santawan.

8. Sortu wroko Yehovah gi Yesaya èn san Yesaya du di a yere disi?

⁸ Yehovah ben taki na fesi sortu moi sani a ben o du fu frulusu den Israelsma di sma ben tyari gowe leki srafu (Yes. 43:19). Den fosi siksi kapitel fu a buku Yesaya lai nanga warskow taki wan rampu ben o kon na tapu Yerusalem nanga den foto na en lontu. Yehovah, di sabi sma ati, taigi Yesaya taki a ben musu tan warskow den sma aladi den no ben o arki en. Yesaya skreki di a yere taki sma no ben o arki den warskow fu Yehovah èn a ben wani sabi o langa a pipel fu Gado ben o sori taki den no abi berow fu san den du. San Gado taigi en? „A o tan so teleki den foto tron brokopresi. Nowan sma o tan drape moro, nowan sma o tan na ini den oso, èn a kondre o tron wan busibusi presi.”—Leisi Yesaya 6:8-11.

9. (a) O ten a profeititori di Yesaya fruteri fu Yerusalem kon tru? (b) Fa a situwâsi de na ini a ten disi èn fu san ede wi musu de na ai?

⁹ Na ini a lasti yari di Kownu Usia ben e tiri, kande na ini a yari 778 Fosi Krestes, Yehovah taigi Yesaya fu fruteri a pipel san Gado taki. Baka a yari 732 Fosi Krestes, na a ten di Kownu Heskia ben e tiri, Yesaya ben de wan profeiti moro leki 46 yari kaba. Disi ben de 125 yari fosi Yerusalem kisi pori na ini 607 Fosi Krestes. Sobun, langa ten na fesi, Gado warskow en pipel san ben o pasa nanga den. Na ini a ten disi, Yehovah taigi en pipel langa ten na fesi tu san o pasa. Sensi di A Waktitoren  kon na doro a fosi leisi sowan 135 yari pasa, sma ben man leisi taki den musu de na ai fu di na ogri tiri fu Satan o kon na wan kaba heri esi èn taki a tiri fu Krestes o teki abra.—Openb. 20:1-3, 6.

10, 11. Fa a profeititori fu Yesaya kon tru di den Israelsma ben de na Babilon?

¹⁰ Di Yerusalem kisi pori, son Dyu no dede fu di den gi yesi na Yehovah èn den gi densrefi abra na den Babilonsma di teki den tyari gowe leki srafu (Yer. 27:11, 12). Seibitenti yari baka dati, Gado pipel si nanga den eigi ai fa Gado meki wan moi profeititori kon tru. A ben taki: „Disi na san Yehovah, a Santawan fu Israel, a sma di bai unu baka, taki: ’Na fu unu ede mi o seni wan sma go na Babilon èn mi o broko den sroto fu den strafu-oso.’”—Yes. 43:14.

¹¹ Soleki fa a profeititori taki, dan wan sani pasa di seki a grontapu fu a ten dati. Wan neti na ini oktober 539 Fosi Krestes, a kownu fu Babilon nanga den granman fu en ben e dringi win na ini den kan di den ben puru na ini a tempel na Yerusalem èn den ben e gi grani na den falsi gado fu den. A srefi neti dati den legre fu den Mediasma nanga den Persiasma teki Babilon abra. Na ini 538 noso 537 Fosi Krestes, Sirus wini Babilon èn a taigi den Dyu fu drai go baka na Yerusalem fu bow a tempel fu Gado baka. Ala den sani disi Yesaya ben taki na fesi. Ma a fruteri tu taki Yehovah ben pramisi taki te a pipel fu en ben o drai go baka na Yerusalem, a ben o sorgu gi den èn a ben o kibri den efu den ben o abi berow. Gado taki fu den: „Mi pipel di mi srefi meki, o prèise mi” (Yes. 43:21; 44:26-28). Di a pipel fu Gado komoto na katibo èn den bigin bow Yehovah en tempel na Yerusalem baka, den si nanga den eigi ai taki Yehovah, a wan-enkri tru Gado, e du ala ten san a pramisi.

12, 13. (a) San pasa di den Israelsma drai go baka fu bow a tempel fu Yehovah baka? (b) Sortu grani den „tra skapu” kisi èn sortu howpu den abi?

¹² Di den Israelsma drai go baka na Yerusalem fu bow a tempel baka, dan dusundusun trakondre sma go nanga den tu fu anbegi Yehovah. Bakaten moro trakondre sma ben wani dini Yehovah (Esra 2:58, 64, 65; Ester 8:17). Na ini a ten disi, den salfu Kresten na a „Israel fu Gado”. „Wan bigi ipi sma” di de den „tra skapu” fu Yesus e anbegi Yehovah makandra nanga den salfu Kresten disi (Gal. 6:16; Openb. 7:9, 10; Yoh. 10:16). Den salfu Kresten nanga den tra skapu abi a grani fu tyari a nen Yehovah Kotoigi.

 ¹³ Na a ten fu a Dusun Yari Tiri fu Krestes, a bigi ipi o breiti pasa marki fu fruteri den sma di kon na libi baka fa a ben de fu de wan Kotoigi fu Yehovah na ini den lasti dei fu na ogri grontapu disi. Ma wi o man du disi soso te wi e sori taki wi warti fu tyari en nen èn te wi e meki muiti fu tan de santa sma. Hori na prakseri taki awinsi omeni muiti wi e meki fu de santa sma, wi musu aksi Gado pardon ibri dei fu di wi e meki fowtu. Na so wi e sori taki wi na sondusma èn taki wi e si en leki wan bigi grani fu tyari a santa nen fu Gado.—Leisi 1 Yohanes 1:8, 9.

14. San a nen Yehovah wani taki?

¹⁴ Fu kisi moro warderi gi a grani di wi abi fu tyari a nen fu Gado, a bun fu sabi san a nen wani taki. A nen fu Gado, di sma e vertaal moro furu leki „Yehovah”, kon fu a Hebrew wortu di kan vertaal nanga „kon tron” èn a e sori taki wan sma e du wan sani. Sobun, soleki fa wi e frustan en, dan a nen Yehovah wani taki „A e meki kon tron”. Yehovah teki a nen disi fu di dati e yepi wi fu frustan suma na en. En na a sma di meki ala sani. Boiti dati, te Yehovah taki dati a o du wan sani, dan nowan sma man tapu en fu du en. Srefi Satan no man tapu en.

15. San wi e kon sabi fu a nen fu Yehovah te wi e luku san a taigi Moses? (Luku a faki di nen „ Yehovah—Wan nen di wani taki furu sani”.)

¹⁵ Yehovah sori Moses san a nen fu en wani taki tu. Di Yehovah seni Moses go na Egepte fu fri a pipel fu En, a taigi en: „’Mi sa tron san mi wani tron [noso: Mi o buweisi fu de san mi o buweisi fu de].’ A taki tu: ’Disi na san yu musu taigi den Israelsma: „Mi sa tron san mi wani tron, seni mi kon na unu”’” (Eks. 3:14). Sobun, Yehovah o tron san de fanowdu fu du san a abi na prakseri, awinsi san na a situwâsi. Di den Israelsma ben de srafu fosi, a tron a sma di frulusu den, a sma di kibri den, a sma di tyari den na ini a sabana èn a sma di sorgu den. Na so a gi den ala san den ben abi fanowdu fu tan na libi èn fu tan anbegi en.

16, 17. (a) Fa wi kan sori taki wi e warderi a grani di wi abi fu tyari a nen fu Gado? (b) San wi o luku na ini a tra artikel?

¹⁶ Na ini a ten disi tu, Yehovah no kenki. A e sori wi taki a o tron iniwan sani di de fanowdu fu sorgu gi a pipel fu en. En nen no wani taki nomo dati a e kon tron san ensrefi wani. A abi fu du tu nanga sani di a e du fu meki den Kotoigi fu en du a wroko fu en. Na so a e meki den sani di a abi na prakseri fu du kon tru. Te wi e denki dipi fu disi, dan dati o yepi wi fu libi na wan fasi di e gi en nen grani. Kåre, wan brada fu 84 yari, na wan fayafaya Kotoigi na ini Noorwegen, 70 yari kaba. A e taki: „A de wan bigi grani gi mi fu dini Yehovah, a têgo Kownu, èn fu de wan pisi fu a pipel di e tyari en santa nen. Mi breiti fu fruteri sma den tru tori fu Bijbel èn fu si fa den e prisiri te den e kon frustan den tru tori disi. Fu eksempre, te mi kan leri den fu a frulusu-ofrandi fu Krestes, dan dati e gi mi furu prisiri, spesrutu te mi e si fa dati kan yepi den fu kisi têgo libi na ini a nyun grontapu pe retidu nanga freide o de.”

¹⁷ A tru taki dei fu dei a e kon moro muilek na ini son kontren fu feni sma di wani leri moro fu Gado. Ma neleki Kåre wi e prisiri srefisrefi te wi e feni wan sma di wani arki èn te wi man leri en san a nen fu Yehovah wani taki. Aladi wi na Yehovah Kotoigi, toku wi de kotoigi fu Yesus tu. Fa so? Na ini a tra artikel wi o luku a tori disi moro fini.