1, 2. (a) Fu san ede sani no ben e go bun na ini a gemeente fu Kolose? (b) Sortu rai den brada fu Kolose kisi fu tranga a bribi fu den?

NA INI a fosi yarihondro, sani no ben e go bun nanga a Kresten gemeente fu Kolose. Son brada ben e taki dati ala sma ben musu du san a Wet fu Moses taki. Trawan ben e taki dati a no bun fu abi prisiri. Fu sori taki den sani disi ben de falsi leri, na apostel Paulus skrifi wan brifi fu gi den Kresten deki-ati. A warskow den brada nanga sisa fu Kolose: „Sorgu taki nowan sma kisi unu nanga a koni fu grontapu èn nanga soso takitaki di e bedrigi sma. Den sani disi no abi noti fu du nanga den leri fu Krestes, ma nanga den gwenti fu libisma èn nanga den sani di e tiri grontapu.”—Kol. 2:8.

² Efu den salfu Kresten fu Kolose ben o poti prakseri na libisma denki, dan den ben o lasi a grani fu de manpikin fu Gado (Kol. 2:20-23). Fu kan yepi den Kresten disi fu no pori a matifasi di den ben abi nanga Gado, Paulus gi den a deki-ati disi: „Tan poti un prakseri na den sani di de na hemel, no na den sani fu grontapu” (Kol. 3:2). Iya, den ben musu tan poti prakseri na a howpu di den ben abi fu kisi wan gudu di no ben o pori èn di ben ’poti na wan sei gi den na ini hemel’.—Kol. 1:4, 5.

3. (a) Na sortu howpu salfu Kresten e tan poti prakseri? (b) Sortu aksi wi o luku na ini na artikel disi?

 ³ Na ini a ten disi, salfu Kresten e tan poti prakseri tu na Gado Kownukondre na hemel èn na a howpu di den abi fu ’kisi wan gudu makandra nanga Krestes’ (Rom. 8:14-17). Ma fa a de nanga den sma di abi a howpu fu libi na grontapu? San den sani di Paulus taki abi fu du nanga den? Fa „tra skapu” kan tan poti prakseri na „den sani di de na hemel”? (Yoh. 10:16) Meki wi go luku a tori fu Abraham nanga Moses di tan poti prakseri na den sani di de na hemel aladi den ben e kisi tesi. Fa wi kan teki na eksempre fu den?

4. Fa den tra skapu kan tan poti prakseri na den sani di de na hemel?

⁴ Aladi den tra skapu no abi a howpu fu go na hemel, toku den srefi kan tan poti prakseri na den sani di de na hemel. Fa? Te den e poti Yehovah Gado nanga a Kownukondre na a fosi presi na ini den libi (Luk. 10:25-27). Fu kan du dati, wi e teki na eksempre fu Krestes (1 Petr. 2:21). Neleki den Kresten fu a fosi yarihondro, na so wi e kisi fu du tu nanga sma na ini Satan grontapu di abi wan fowtu denki fu sani, di e horibaka gi den leri fu grontapu èn di e feti na baka gudu. (Leisi 2 Korentesma 10:5.) Leki sma di e teki na eksempre fu Yesus, wi musu luku bun taki sani no e pori a matifasi di wi abi nanga Yehovah.

5. Fa wi kan kon sabi sortu denki wi abi fu moni nanga gudu?

⁵ A fasi fa grontapu e si moni nanga gudu, abi krakti na wi tapu? Den sani di wi e prakseri èn den sani di wi e du, e sori nofo tron san wi lobi trutru. Yesus taki: „Pe yu gudu de, na drape yu ati o de tu” (Mat. 6:21). Ten na ten a bun fu ondrosuku yusrefi fu kon sabi san prenspari gi yu. Aksi yusrefi: ’Na moni mi e denki ala yuru? Mi e broko mi ede doronomo nanga nyun bisnis di mi kan bigin? Mi e tan denki nomo fa mi kan meki moro moni? Mi e du ala san mi man soso fu kan abi wan switi libi? Noso mi e meki muiti fu tan poti prakseri na a matifasi di mi abi nanga Yehovah?’ (Mat. 6:22) Yesus ben sori taki sma di e meki muiti fu ’kibri gudu na grontapu’ kan pori a matifasi di den abi nanga Yehovah.—Mat. 6:19, 20, 24.

6. Fa wi kan wini a feti di wi e feti nanga den sondu firi fu wi?

⁶ Fu di wi na sondusma, meki a makriki gi wi fu du sani di no bun. (Leisi Romesma 7:21-25.) Efu wi no e meki a santa yeye fu Gado tyari wi na ini wi libi, dan kande wi o go ’du den sani di sma gwenti du na ini a dungru’. Den sani di den sma disi e du na taki den e go na ’bradyari fesa, den e kon drungu, den e du hurudu èn den no e syen fu den ogri di den e du’ (Rom. 13:12, 13). Ala ten baka wi e feti nanga „den sani fu grontapu”, dati na den lostu fu a sondu skin. Ma te wi e poti prakseri na den sani di de na hemel, dan wi kan wini a feti. Wi musu meki muiti fu du disi. Dati meki na apostel Paulus ben taki: „Mi e naki mi skin nanga kofu èn mi e basi en neleki a de wan srafu” (1 Kor. 9:27). Wi musu feti nanga wisrefi efu wi wani tan na ini a streilon di wi e lon fu kisi libi. Meki wi go luku san tu man di ben e libi na ini owruten du fu kan „prisiri Gado” ati.—Hebr. 11:6.

7, 8. (a) Sortu problema miti Abraham nanga Sara? (b) Na sortu sani Abraham ben poti prakseri?

⁷ Di Yehovah taigi Abraham fu froisi go na a kondre Kanan makandra nanga en  osofamiri, dan a ben de klariklari fu du disi. Fu di a sori bribi èn a gi yesi, meki Yehovah meki wan frubontu nanga en èn a taki: „Mi o meki yu tron na afo fu wan bigi pipel, [èn] mi o blesi yu” (Gen. 12:2). Ma wan tu yari baka dati, Abraham nanga en wefi Sara no ben kisi pikin ete. Yehovah ben frigiti a sani di a pramisi Abraham? Na a ten dati a no ben makriki gi den fu libi na ini Kanan. Abraham nanga en osofamiri ben libi den oso nanga den famiriman fu den na baka na ini Ur, wan gudu foto na ini Mesopotamia. Den waka moro leki 1600 kilometer go na Kanan, pe den ben e libi na ini tenti. Drape den kisi fu du tu nanga angriten èn nanga fufuruman di ben kon ròs den (Gen. 12:5, 10; 13:18; 14:10-16). Toku den no ben wani drai go baka na a switi libi di den ben abi na ini Ur.—Leisi Hebrewsma 11:8-12, 15.

⁸ Na presi fu poti prakseri na „den sani fu grontapu”, Abraham „poti bribi na ini Yehovah” (Gen. 15:6). Iya, a tan poti prakseri na den sani di de na hemel. Sobun, a tan prakseri den pramisi fu Gado. A bakapisi ben de taki a Moro Hei Gado blesi Abraham fu a bribi di a sori. Di Gado taki nanga en, a taigi en: „’Mi e begi yu, luku go na loktu èn teri den stari, efu yu man du dati.’ Baka dati a taigi en: ’Na someni bakapikin yu o kisi’” (Gen. 15:5). Di Abraham yere disi, a ben sabi taki Yehovah no frigiti en. Ibri leisi te a ben e luku den stari na hemel, a ben o prakseri a pramisi fu Yehovah taki a ben o kisi furu bakapikin. Di a ten fu Yehovah doro, dan Abraham kisi wan pikin trutru, soleki fa Gado pramisi.—Gen. 21:1, 2.

9. Fa na eksempre fu Abraham o gi wi deki-ati fu tan de fayafaya na ini a diniwroko fu Gado?

⁹ Neleki Abraham, na so wi srefi e fruwakti a ten te Gado o meki den pramisi fu en kon tru (2 Petr. 3:13). Efu wi no tan poti prakseri na den sani di de na hemel, dan a kan gersi leki a e teki langa fosi den pramisi disi kon tru. Disi kan meki taki wi no de fayafaya moro na ini a diniwroko. Fu eksempre, kande yu ben tyari kenki kon na ini yu libi fu kan pionier noso fu du wan tra sani na ini a diniwroko. Efu dati de so, dan na wan moi sani yu du. Ma fa a de now? Hori na prakseri taki Abraham tan prakseri „a foto di abi trutru fondamenti” (Hebr. 11:10). A „ben poti bribi na ini Yehovah. Fu dati ede Gado si en leki wan reti-ati sma.”—Rom. 4:3.

10. Sortu libi Moses ben abi di a ben yongu?

¹⁰ Wan tra man di tan poti prakseri na den sani di de na hemel, na Moses. Di Moses ben yongu, a „kon sabi ala den koni fu den Egeptesma”. Na a ten dati Egepte ben de wan makti kondre èn Moses ben e libi na ini na oso fu Farao. Sobun, a leri di a kisi no ben de san tra sma ben gwenti kisi. Dati meki a no musu fruwondru wi taki a hei skoroleri dati fu Moses, meki taki „den wortu fu en èn den sani di a ben e du ben abi bun furu krakti tapu sma” (Tori 7:22). Prakseri ala den sani di Moses ben kan du nanga a leri dati. Toku a poti prakseri na sani di ben de moro prenspari. Iya, a du a wani fu Gado.

11, 12. Sortu leri Moses ben e si leki wan warti sani? Fa wi du sabi dati?

¹¹ Wi kan de seiker taki di Moses ben yongu, en eigi mama Yokebed leri en suma na a Gado fu den Hebrewsma. Moses kon si taki a leri fu Yehovah ben warti moro iniwan gudu. Dati meki a drai baka gi den grani nanga den okasi di a ben o kisi te a ben o tan libi na ini na oso fu Farao. (Leisi Hebrewsma 11:24-27.) Iya, a leri di Moses kisi fu Gado nanga a bribi di a ben abi na  ini Yehovah, meki taki a tan poti prakseri na den sani di de na hemel.

¹² Moses kisi a moro bun grontapu leri di sma ben man kisi na ini a ten fu en. Ma a no gebroiki a leri dati fu suku biginen na ini Egepte noso fu kon gudu. Efu a ben du dati, dan a no ben o tapu sma fu „kari en a manpikin fu na umapikin fu a kownu fu Egepte. Ma a ben bosroiti fu nyan pina makandra nanga a pipel fu Gado, na presi fu nyan bun fu sondu fu wan pisi ten.” A de krin taki Moses gebroiki a leri fu Yehovah fu du den sani fu Yehovah.

13, 14. (a) San Moses ben musu leri fosi a ben kan du a wroko di Yehovah ben o gi en? (b) Neleki Moses, dan san wi srefi musu du tu?

¹³ Moses ben lobi Yehovah nanga en pipel. Di a ben abi 40 yari, a ben denki taki a ben man yepi frulusu Gado pipel di ben de srafu na Egepte (Tori 7:23-25). Ma fosi Yehovah ben kan gi Moses a wroko dati, a ben musu du wan tra sani. A ben musu leri fu abi sakafasi, pasensi, safri-ati èn a ben musu leri fu dwengi ensrefi (Odo 15:33). Moses ben musu kisi leri di ben o sreka en gi den seryusu problema di ben o miti en. A wroko di a du leki skapuman 40 yari langa, leri en fu kenki a fasi fa a ben de.

¹⁴ A de so taki a leri di Moses kisi leki skapuman yepi en? Iya, Gado Wortu e taki dati Moses ben tron „a moro safri-ati sma fu ala libisma di ben de na grontapu” (Num. 12:3). A ben leri fu abi sakafasi èn dati yepi en fu hori pasensi nanga difrenti sortu sma di ben abi den eigi problema (Eks. 18:26). A kan taki wi srefi musu kon abi fasi di o yepi wi fu pasa „a bigi banawtu” so taki wi kan go na ini Gado en nyun grontapu pe retidu o de (Openb. 7:14). A de so taki wi man feni en nanga ala sortu sma? Wi man feni en nanga den wan di ati e bron esi-esi noso di e firi wan fasi te sma taki wan sani di den no feni bun? A bun fu hori na prakseri san na apostel Petrus taki di a gi Kresten a deki-ati disi: „Gi grani na ala sortu sma, lobi ala brada.”—1 Petr. 2:17.

15, 16. (a) Fu san ede a prenspari fu tan poti prakseri na den yoisti sani? (b) Fu san ede Kresten musu tyari densrefi na wan bun fasi?

¹⁵ Wi e libi na ini ’muilek ten di tranga fu pasa’ (2 Tim. 3:1). Dati meki a prenspari fu tan poti prakseri na den yoisti sani fu kan tan krosibei fu Gado (1 Tes. 5:6-9). Luku dri fasi fa wi kan du disi.

¹⁶ A fasi fa wi e tyari wisrefi: Petrus sori taki a prenspari fu tyari wisrefi na wan bun fasi. A taki: „Tan tyari unsrefi na wan bun fasi na mindri den grontapusma, so taki . . . den o si den bun sani di unu e du. Dati o meki den gi Gado glori” (1 Petr. 2:12). Awinsi wi de na oso, na wroko, na skoro, awinsi wi e du prisiri sani, noso wi de na ini a preikiwroko, toku wi musu du muiti fu gi Yehovah glori nanga a bun fasi fa wi e tyari wisrefi. A tru taki wi alamala e meki fowtu fu di wi na sondu libisma (Rom. 3:23). Ma te wi e tan „feti a bun feti di abi fu du nanga a bribi”, dan wi kan wini den sondu firi fu wi.—1 Tim. 6:12.

17. Fa wi kan abi a srefi denki leki Krestes Yesus? (Luku a prenki na a bigin fu na artikel.)

¹⁷ A fasi fa wi e denki: Efu wi wani tyari wisrefi na wan bun fasi, dan wi musu abi wan yoisti denki. Na apostel Paulus taki: „Tan abi a srefi denki di Krestes Yesus ben abi tu” (Fil. 2:5). Fa Yesus ben de? We, a ben abi sakafasi. Sakafasi ben meki taki a no ben prakseri ensrefi te a ben de na ini a diniwroko. A moro prenspari sani gi Yesus ben de fu preiki a bun nyunsu fu Gado Kownukondre (Mark. 1:38; 13:10). Yesus ben e si Gado Wortu leki a moro prenspari sani di de (Yoh. 7:16; 8:28). A  ben e studeri den Santa Buku fu Bijbel fayafaya fu kan fruteri sma san skrifi na ini èn fu sori den taki den tori na ini de so trutru. A ben man tyari den kon na krin tu. Te wi abi a srefi denki leki Krestes, dan wi o abi sakafasi èn wi o du a preikiwroko fayafaya. Wi o de fayafaya tu fu studeri Bijbel.

18. Na sortu prenspari fasi wi kan horibaka gi a wroko fu Yehovah?

¹⁸ A fasi fa wi e horibaka gi a wroko: Yehovah wani taki ’ala den wan di de na hemel, nanga den wan di de na grontapu boigi den kindi na ini a nen fu Yesus’ (Fil. 2:9-11). Aladi Yesus abi wan hei posisi now, toku a e saka ensrefi na ondro en Tata fu di a abi sakafasi èn na dati wi musu du tu (1 Kor. 15:28). Fa wi kan du dati? Te wi e horibaka nanga wi heri ati gi a wroko di Gado gi wi fu du. Dati wani taki dati wi musu „go na sma fu ala kondre èn meki den tron disipel” (Mat. 28:19). Boiti dati, wi musu „du bun gi ala sma”. Sobun, gi wi brada nanga sisa èn gi tra sma.—Gal. 6:10.

19. Sortu muiti wi alamala musu du?

¹⁹ Wi kan breiti trutru taki Yehovah e memre wi fu tan poti prakseri na den sani di de na hemel. Dati meki wi musu „horidoro te wi e lon a streilon di wi musu lon ete” (Hebr. 12:1). Meki wi alamala du muiti fu wroko ’nanga wi heri ati gi Yehovah’. Dan wi hemel Tata o blesi wi gi a muiti di wi e du.—Kol. 3:23, 24.