1. Fu san ede wi musu taki Yehovah tangi?

YEHOVAH na a sma di e gi wi „ibri bun presenti nanga ibri kado di bun dorodoro” (Yak. 1:17). Fu dati ede wi musu taki en tangi ala ten. A de wi lobi-ati Skapuman di e gi wi ala san wi abi fanowdu (Ps. 23:1-3). A de „wan kibripe gi wi èn a e gi wi krakti”, spesrutu na ini muilek ten (Ps. 46:1). A no de fu taki dati furu sani de di e meki taki wi e agri nanga a psalm skrifiman di ben taki: „Un taki Yehovah tangi, bika a bun. En bun-ati de fu têgo.”—Ps. 106:1.

2, 3. (a) Fu san ede wi musu luku bun taki wi no tron sma di no e warderi den blesi di wi e kisi? (b) Sortu aksi wi o luku na ini na artikel disi?

² Fu san ede a prenspari taki wi de nanga tangi ala ten? Soleki fa Bijbel ben taki na fesi, dan na ini den lasti dei furu sma no ben o de nanga tangi (2 Tim. 3:2). Furu sma no abi warderi gi den bun sani di Yehovah gi den. Wi e libi na ini wan grontapu di lobi moni èn di e gi sma deki-ati fu bai moro sani leki san den abi fanowdu. Fu dati ede furu sma no de tevrede  nanga san den abi. Wi musu luku bun taki wi no tron leki den Israelsma fu owruten di no ben de nanga tangi moro èn di no ben abi warderi gi den blesi di Yehovah ben gi den. Boiti dati, den no ben e si en leki wan bigi grani moro fu de mati fu Yehovah.—Ps. 106:7, 11-13.

³ Prakseri tu san kan pasa te hebi tesi miti wi. Tesi kan moro wi so te, taki wi no man si den blesi moro (Ps. 116:3). Fa wi kan de nanga tangi ala ten? San o yepi wi fu no lasi-ati awinsi wi e kisi hebi tesi? Meki wi luku a piki tapu den aksi disi.

4. Fa wi kan de nanga tangi ala ten?

⁴ A fosi sani di wi musu du efu wi wani de nanga tangi ala ten, na fu teki ten fu prakseri den difrenti fasi fa Yehovah blesi wi. Baka dati wi musu go denki finifini fa den blesi disi e sori taki a lobi wi trutru. Di a psalm skrifiman du disi, a ben fruwondru fu ala den bigi sani di Yehovah du gi en.—Leisi Psalm 40:5; 107:43.

5. San wi kan leri fu na apostel Paulus di ben de nanga tangi ala ten?

⁵ Wi kan leri furu fu na apostel Paulus di ben de nanga tangi ala ten. Soleki fa a sori, dan a ben e teki ten fu prakseri den blesi di a kisi. Furu leisi a ben taki tu dati a ben de nanga tangi trutru. Paulus ben sabi heri bun taki fosi, a ben de „wan sma di ben e taki ogri fu Gado, di ben e frufolgu sma èn di no ben abi syen”. Aladi a ben du furu ogri fosi, toku Gado nanga Krestes ben sori en sari-ati èn den ben gi en a grani fu preiki gi tra sma. Fu dati ede a ben de nanga tangi trutru. (Leisi 1 Timoteyus 1:12-14.) Paulus ben abi furu warderi tu gi den Kresten brada nanga sisa fu en. Furu tron a ben taki Yehovah tangi, fu di den ben abi moi fasi èn fu di den ben e dini Gado fayafaya (Fil. 1:3-5, 7; 1 Tes. 1:2, 3). Ala ten Paulus ben e taki Yehovah tangi tu fu a yepi di den brada nanga sisa ben gi en te a ben e kisi tesi (Tori 28:15; 2 Kor. 7:5-7). Fu dati ede wi kan frustan taki Paulus ben gi den Kresten a deki-ati disi: „Sori taki unu de nanga tangi. . . . Tan gi makandra deki-ati nanga psalm, nanga singi di e prèise Gado èn nanga tra moi singi di abi fu du nanga Gado.”—Kol. 3:15-17.

6. Sortu blesi fu Yehovah yu e warderi trutru?

⁶ Fa yu kan de nanga tangi neleki Paulus? Teki ten fu prakseri san Yehovah du gi yu neleki fa Paulus ben e du dati (Ps. 116:12). Efu wan sma ben o aksi yu: ’Sortu blesi fu Yehovah yu e warderi trutru?’, dan san yu ben o piki? Kande yu breiti taki a de wan mati fu yu, noso taki a e gi yu pardon fu di yu e bribi na ini a lusu-paiman fu Krestes. Yu e si den brada nanga sisa leki blesi tu? Kande yu e prakseri den wan di yepi yu di yu ben abi bigi problema. Èn a no de fu taki dati yu ben o taki dati yu trowpatna nanga yu pikin na blesi tu. Sobun, teki ten fu prakseri den difrenti fasi fa a blesi yu. Disi o naki yu ati trutru èn yu o wani taki Yehovah tangi ibri dei.—Leisi Psalm 92:1, 2.

7. (a) Fu san ede wi musu begi Yehovah fu taki en tangi? (b) Sortu wini yu o kisi te yu e begi Yehovah fu taki en tangi?

⁷ Te wi e hori den blesi fu wi na  prakseri, wi o wani begi Yehovah fu taki en tangi (Ps. 95:2; 100:4, 5). Furu sma e begi Gado soso fu aksi en sani. Ma wi sabi taki Yehovah lobi en te wi e taki en tangi gi den sani di wi abi. Bijbel abi furu moi eksempre fu sma di ben taki Yehovah tangi, sma soleki Hana nanga Heskia (1 Sam. 2:1-10; Yes. 38:9-20). Sobun, teki na eksempre fu den sma disi di ben de nanga tangi trutru. Iya, taigi Yehovah taki yu e warderi den blesi di yu kisi (1 Tes. 5:17, 18). Yu o kisi furu wini te yu e du dati. Yu o firi koloku, yu o kisi moro lobi gi Yehovah èn yu o tron wan moro bun mati fu en.—Yak. 4:8.

8. San kan meki taki wi no e warderi moro san Yehovah du gi wi?

⁸ Fu san ede wi musu luku bun taki wi no tron sma di no de nanga tangi? Wi musu luku bun, fu di wi na sondu sma èn bakapikin fu Adam nanga Eva di ben abi a fasi disi. Yehovah ben meki Adam nanga Eva tan na ini wan paradijs èn a ben gi den ala san den ben abi fanowdu. Den ben kan libi wan koloku libi fu têgo (Gen. 1:28). Ma den no ben abi warderi gi den blesi fu den. Den ben abi bigi-ai èn den ben wani moro. Te fu kaba den lasi ala sani (Gen. 3:6, 7, 17-19). Fu di wi e libi na ini wan grontapu pe sma no de nanga tangi, meki wi srefi kan teki a fasi disi abra. A kan pasa taki wi no de nanga tangi moro gi ala den sani di Yehovah du gi wi. Kande wi no o si en leki wan grani moro fu de en mati noso fu abi Kresten brada nanga sisa na heri grontapu. Kande wi o poti moro prakseri na den sani fu a grontapu disi di o pasa gowe heri esi (1 Yoh. 2:15-17). Efu wi no wani taki a sani disi pasa nanga wi, dan wi musu tan prakseri den blesi fu wi èn ala ten wi musu taki Yehovah tangi gi a grani di wi abi fu de en pipel.—Leisi Psalm 27:4.

9. Fu san ede a bun fu prakseri den blesi fu yu te hebi tesi e miti yu?

⁹ Te wi de nanga tangi, dan disi o yepi wi fu horidoro te wi e kisi hebi tesi. Kande yu libi kenki wantronso fu di yu trowpatna waka gi yu, fu di yu kisi wan seryusu siki, fu di wan lobiwan fu yu lasi libi noso fu di wan rampu soleki gronseki  pasa na a presi pe yu e tan. Te den sortu ogri disi e pasa, dan a kan taki yu e bruya. Ma te yu e prakseri den blesi di Yehovah gi yu, dan dati kan trowstu yu èn a kan yepi yu fu horidoro. Luku san son brada nanga sisa ondrofeni.

10. Fa Irina kisi wini fu di a e prakseri den blesi fu en?

¹⁰ Irina * na wan gewoon pionier na ini Amerkankondre di ben trow nanga wan owruman. Bakaten a man disi waka gi Irina èn a gowe libi en nanga den pikin. San yepi Irina fu tan dini Yehovah? A taki: „Mi breiti taki Yehovah e sorgu mi. Mi bosroiti fu prakseri den blesi di mi e kisi ibri dei. Dati meki mi e si taki a de wan bigi grani taki wi hemel Tata sabi mi, taki a lobi mi èn taki a e kibri mi. Mi sabi taki a no o gowe libi mi noiti.” Aladi furu sari sani pasa nanga Irina, toku a e horidoro nanga prisiri èn disi e meki trawan kisi deki-ati tu.

11. San yepi Kyung-sook fu horidoro aladi a abi wan seryusu siki?

¹¹ Kyung-sook di e tan na Asia, ben e pionier nanga en masra moro leki 20 yari. Ne wan dei datra kon si taki a abi kanker na en fokofoko. Den taigi en taki a ben o libi so wan dri te siksi mun ete. En nanga en masra ben kisi furu tesi, ma ala ten den ben de gosontu. Kyung-sook taki: „A tesi disi ben hebi trutru. Mi ben firi leki mi lasi ala sani èn mi ben e frede srefisrefi.” San yepi en fu horidoro? A taki: „Ibri neti fosi mi go didon, mi e go na tapu a daki fu wi oso, dan mi e begi Yehovah. Nanga tranga sten mi e taki fu feifi blesi di mi kisi a dei dati. Dan mi e firi korostu èn mi e taigi Yehovah fa mi lobi en.” Fa den begi disi yepi Kyung-sook? A taki: „Mi kon si taki Yehovah e gi wi krakti te wi de na ini muilek situwâsi èn taki den blesi di wi e kisi furu omeni tron moro den tesi di wi e kisi.”

12. Fa Jason kisi trowstu di en wefi dede?

¹² Jason di e wroko na wan bijkantoro na ini Afrika, e du furuten diniwroko moro leki 30 yari kaba. A taki: „Seibi yari pasa, mi wefi dede èn son leisi a hebi gi mi srefisrefi. Te mi e prakseri fa a kanker ben e pina en, dan mi e sari trutru.” San e yepi Jason fu horidoro? A taki: „Wan leisi mi ben memre fa mi nanga mi wefi ben abi prisiri èn mi begi Yehovah fu taki en tangi gi a moi momenti dati. Baka dati mi ben e firi korostu. Sensi a ten dati mi e taki Yehovah tangi ala ten te mi e memre den bun ten di mi ben abi nanga mi wefi. A warderi di mi abi e meki taki mi e si a libi heri tra fasi now. Te now ete mi e sari. Ma te mi e taki Yehovah tangi taki mi ben abi wan bun trowlibi èn taki mi ben man dini en nanga wan sma di ben lobi en trutru, dan a no hebi so.”

13. San yepi Sheryl di a lasi furu sma fu en osofamiri?

¹³ Na a kaba fu 2013 wan bigi draiwinti di sma ben kari Haiyan pori wan heri kontren na mindrisei fu den Filippijnen-èilanti. Sheryl di ben abi 13 yari ben lasi ala sani. A taki: „Mi lasi mi oso èn mi lasi furu sma fu mi osofamiri.” En papa, en mama, wán brada nanga tu sisa fu en dede na watra di a heri presi sungu. San yepi Sheryl fu no lasi-ati di so wan hebi tesi miti en? A de nanga tangi fu di a e prakseri ala den blesi di Yehovah gi en. A taki: „Mi si omeni sani den brada nanga  sisa du fu yepi den wan di ben de na nowtu èn fu gi den deki-ati. Mi ben sabi taki brada nanga sisa na heri grontapu e begi gi mi.” A taki tu: „Mi breiti trutru taki Yehovah na mi Gado. Ala ten a e gi wi san wi abi fanowdu.” Iya, te wi abi warderi gi den blesi di wi e kisi, dan dati e yepi wi fu no sari tumusi. A o yepi wi tu fu horidoro te wi de na ini muilek situwâsi.—Ef. 5:20; leisi Filipisma 4:6, 7.

14. Sortu moi ten e wakti wi? (Luku a prenki na a bigin fu na artikel.)

¹⁴ Sensi owruten a pipel fu Yehovah de nanga tangi taki Yehovah e blesi den. Fu eksempre, baka di a frulusu den fu Farao nanga den legre fu en na a Redi Se, den Israelsma ben e singi gi Yehovah fu prèise en èn fu taki en tangi (Eks. 15:1-21). Wan fu den moro moi blesi di wi abi na ini a ten disi, na a howpu taki heri esi nowan sari noso broko-ede o de moro (Ps. 37:9-11; Yes. 25:8; 33:24). Prakseri fa wi o firi te Yehovah kiri ala den feanti fu en èn te a o gi wi wan switikon na ini wan nyun grontapu pe freide nanga retidu o de. Dati o de wan moi dei fu taki Yehovah tangi!—Openb. 20:1-3; 21:3, 4.

15. San yu wani du na ini 2015?

¹⁵ Wi e angri fu si den furu blesi di Yehovah o gi wi na ini 2015. A no de fu taki dati wi o kisi tesi tu. Ma awinsi san pasa, wi sabi taki Yehovah no o gowe libi wi noiti (Deut. 31:8; Ps. 9:9, 10). A o tan gi wi ala san wi abi fanowdu fu man dini en go doro. Fu dati ede, meki wi abi a srefi denki leki a profeiti Habakuk di taki: „Kande den figabon no o gi figa èn den droifibon no o abi froktu. Kande den olèifbon no o gi bun froktu èn den gron no o gi nyanyan. Kande skapu no o de na ini den skapupen moro èn kaw no o de na ini den kawpen moro. Toku mi o de nanga bigi prisiri fu Yehovah ede. Mi o prisiri nanga a Gado di o frulusu mi” (Hab. 3:17, 18). Iya, meki a de so taki na ini a heri yari disi, wi tan prakseri nanga prisiri fu den blesi di wi e kisi. Meki a de so taki wi e kisi deki-ati fu a yaritekst fu 2015, di e taki: „Un taki Yehovah tangi, bika a bun.”—Ps. 106:1.