SON SMA E TAKI NÔNO: Wan datra taki dati te yu ben o gebroiki Bijbel na ini a ten disi, dan a de neleki yu e gebroiki wan owru scheikunde buku fu 1920 fu gi pikin na ini a ten disi les. Kande wan sma di no e lespeki Bijbel ben o agersi en nanga wan owru computer buku di yu no kan gebroiki fu leri wroko nanga wan nyun computer. Nanga tra wortu, son sma feni taki Bijbel a no gi a ten disi srefisrefi.

Fu san ede wan sma ben o suku rai na ini so wan owru buku na ini a ten disi pe so furu nyunyun sani de? Fu taki en leti, so furu Internet website de pe sma kan feni den moro nyun rai. Ala sortu sabiman, datra nanga sma di e skrifi buku e kon tapu telefisi fu leri sma fa den kan abi wan moro bun libi. Èn na ini bukuwenkri yu kan feni bun furu buku di e leri sma fa densrefi kan du son sani. Sma e meki milyunmilyun moni nanga a bisnis disi.

Efu so furu fasi de fa wi kan kon sabi sani o ten wi wani, dan fu san ede wi musu suku rai na ini Bijbel, wan buku di ben skrifi sowan 2000 yari pasa? Yu denki taki den sma di e krutu Bijbel abi leti te den e agersi en nanga wan owru skorobuku noso nanga wan owru computer buku? Fu taki en leti, a denki disi fowtu. A fasi fa sabiman e si sani e kenki doronomo, ma libisma no e kenki. Te nanga now libisma wani kon sabi fu san ede wi de na grontapu, den wani de koloku, den wani taki sani go bun nanga den, den wani abi wan bun osofamiri-libi èn den wani abi bun mati.

Awinsi fa Bijbel owru, toku a kan yepi wi nanga ala den sani disi. Na ini Bijbel skrifi taki a komoto fu wi Mekiman. A e gi wi rai di kan yepi wi fu abi wan koloku libi èn a kan yepi wi nanga iniwan problema di wi abi (2 Timoteyus 3:16, 17). San moro moi srefi, na taki a abi rai di noiti e kon owru! Bijbel srefi e taki: „A wortu fu Gado de na libi.”​—Hebrewsma 4:12.

Den sani disi tru? A de so taki Bijbel owru tumusi, noso a abi den moro bun rai gi wi na ini a ten disi? A de trutru wan buku di e libi? A Waktitoren disi o yepi yu fu feni piki tapu den aksi dati. Disi na a fosi Waktitoren fu a yari disi di o taki fu wan spesrutu tori.