A besroiti de na yu
A fasi fa wi o besroiti fu libi o meki wi de koloku noso a o meki wi sari. Yehovah Gado sabi dati. Dati meki a wani taki wi musu libi soleki fa a feni bun.
Yehovah wani taki wi abi wan koloku libi nanga freide.
„Mi, Yehovah, na yu Gado. Mi na a sma di e leri yu fu kisi wini. Mi na a sma di e meki yu waka a pasi di yu musu waka. Mi winsi taki yu ben o poti prakseri na den komando fu mi! Dan a freide fu yu ben o de leki wan liba, èn a retidu fu yu ben o de leki den skwala fu se.”—Yesaya 48:17, 18.
Gado na wi Mekiman èn dati meki a sabi san na a moro bun fasi fa wi musu libi. A wani taki wi musu teki den rai fu en bika dati bun gi wi. Te wi e du san Gado e taki, dan wi no o abi fu tweifri efu a besroiti fu wi o abi bun bakapisi. Wi o teki bun besroiti ala ten, bosroiti di o gi wi freide nanga koloku.
Yehovah no o aksi wi fu du wan sani di wi no man du.
„Den komando di mi e taigi unu tide, no muilek tumusi èn den no de tumusi fara fu unu.”—Deuteronomium 30:11.
Efu wi wani libi soleki fa Gado wani, dan a kan taki wi musu kenki wi denki èn a fasi fa wi e du son sani. Ma Yehovah no e aksi tumsi furu fu wi. Fu di en na wi Mekiman, meki a sabi bunbun san wi man du. Èn te wi e kon leri sabi Yehovah, wi o si taki „den komando fu en no de wan hebi”.—1 Yohanes 5:3.
Yehovah e pramisi fu yepi den wan di wani libi soleki fa En feni bun.
„Mi, Yehovah, na yu Gado di e grabu yu reti-anu hori. Mi na a sma di e taigi yu: ’No frede. Misrefi o yepi yu.’”—Yesaya 41:13.
Wi man libi soleki fa Gado wani taki wi musu libi fu di a o yepi wi. A kan gebroiki en Wortu, Bijbel, fu gi wi dek’ati nanga howpu.
Milyunmilyun sma na heri grontapu si taki den kon abi wan moro bun libi fu di den e libi soleki fa Bijbel e taki. Yu no wani sabi moro fu den bun rai di Bijbel e gi? Yu kan bigin luku a brochure Yu kan de koloku fu têgo! di de gratis tapu jw.org. Yu kan feni den les disi na ini:
-
Fa Bijbel kan yepi yu fu abi wan moro bun libi?
-
Bijbel e pramisi wi taki wan moro bun ten o kon
-
Yu kan bribi den sani di Bijbel e taki?
Te yu o ondrosuku Gado Wortu, Bijbel, dan yu o kon si taki a no wan owru buku di no man yepi wi na ini a ten disi. Ma „fu ala ten yu kan fertrow den wet fu en” (Psalm 111:8). A moro bun fasi fu libi na fu libi soleki fa skrifi na ini Bijbel. Ma Gado no o dwengi wi fu du dati (Deuteronomium 30:19, 20; Yosua 24:15). Ibriwan fu wi musu teki en eigi besroiti.
