Sma de di e bribi taki den stari, a mun, nanga den planeiti kan abi krakti na tapu a libi fu wi na grontapu. A sani disi na afkodrei. Den sma disi e taki dati na a presi pe den stari nanga den planeiti tanapu na loktu na a momenti te wan sma gebore e sori fa wan sma o de èn fa en libi o waka.

A gwenti di sma abi fu luku den stari fu kon sabi san o pasa, bigin na ini owruten Babilon. Toku furu sma na ini a ten disi e du a sani disi ete. Furu sma e bribi den sani di den sma di e luku den stari e taki. Ma yu kan frutrow den sani dati trutru? Nôno. Luku fu san ede.

• Den planeiti nanga den stari no man abi krakti na tapu libisma soleki fa den sma dati e taki.

• Furu tron den sani di den sma di e luku den stari e taki, na sani di kan miti iniwan sma.

• Sma di e luku den stari na ini a ten disi sabi taki den planeiti no e drai lontu grontapu soleki fa sma ben e denki fosi, ma taki den e drai lontu a son. Toku den e tan gebroiki a owru denki dati fu koti luku gi sma.

• Te difrenti sma di e luku den stari musu taki san o pasa nanga wán spesrutu sma, dan den alamala o taki wan tra sani.

• Den sma di e luku den stari e prati sma na ini 12 grupu, noso sterrenbeeld. Dan den e luku a dei di wan sma gebore fu luku sortu sterrenbeeld a sma abi. Ma na ini den hondrohondro yari di pasa, grontapu no tan na a srefi presi na loktu èn den stari grupu no de na a srefi presi moro pe den ben de na a dei di wan sma gebore. Sobun, baka wan pisi ten a dei dati no e kruderi moro nanga a sterrenbeeld di a sma abi.

Sma e bribi taki den difrenti sterrenbeeld e sori fa wan sma de. Ma te yu luku en bun, dan sma di gebore na tapu a srefi dei no abi den srefi fasi. A dei di wan sma gebore no e fruteri yu noti fu a fasi fa a sma de. Na presi taki den wan di e luku den stari e si ala sma leki fa den de trutru, den e prakseri taki den kan sabi fa wan sma de te den e luku a sterrenbeeld fu a sma. Ma yu no feni taki na a fasi dati den e krutu sma sondro taki den sabi den?

Sensi owruten, sma ben gwenti go suku yepi na lukuman. Sonwan fu den lukuman dati ben e gebroiki den inibere fu meti noso fu libisma fu koti luku, noso den ben e luku fa wan kakafowru e tyopu siri fu nyan. Trawan ben e luku fa den wiwiri fu te noso a sakasaka fu kofi ben e didon na ondrosei fu wan kan, baka te wan sma ben dringi den sani disi. Na ini a ten disi sma e gebroiki tarot karta, grasi bal, dòbelston, nanga tra sani fu koti luku gi sma. Ma a sani disi e yepi trutru? Nôno. Kwetikweti. Meki wi go luku fu san ede.

Prakseri a sani disi. Te difrenti lukuman o koti luku gi wan sma, dan nofo tron den no e taki a srefi sani. Awinsi den gebroiki a srefi fasi fu du dati, toku a sani di den e taki e difrenti. Fu eksempre, efu wan sma ben o aksi tu lukuman fu „leisi” den srefi karta gi en so taki a kan kon sabi fa sani o waka, dan yu ben o fruwakti taki den ala tu ben o taigi en a srefi sani. Ma furu tron dati no e pasa.

Furu sma no e frutrow den lukuman èn a fasi fa den e koti luku. Den feni taki den karta noso den grasi bal di lukuman e gebroiki no e yepi den fu kon sabi sani. Furu tron a lukuman e luku fa a sma e du, na presi fu luku den wrokosani fu en. Fu eksempre, wan sma di sabi a lukuman-wroko o poti wan tu aksi gi yu. Dan a o arki bun san yu e taki èn a o luku fa yu e du te yu e piki en. Na so a lukuman e suku fu kon sabi moro sani fu a sma di go na en. Baka dati a o du neleki a sabi sani fu a sma èn fu a situwâsi fu en, aladi a e gebroiki den sani di a sma srefi sori en sondro taki a sabi. Dan te son lukuman e si taki a sma e bigin frutrow den, dan den e puru bun furu moni na den sma saka.

Lukuman nanga sma di e luku den stari fu kon sabi san o pasa, e meki sma denki taki a seti na fesi fa wi libi o waka. Ma dati tru? Bijbel e fruteri wi taki wi alamala man bosroiti san wi wani bribi noso san wi wani du èn taki den bosroiti di wi e teki abi krakti tapu a fasi fa wi libi o waka.​—Yosua 24:15.

Boiti dati, Gado e krutu iniwan fasi fa sma e du afkodrei. Fu dati ede anbegiman fu Gado no e bribi den lukuman nanga den sma di e luku den stari. Na ini Bijbel wi e leisi: „Nowan . . . lukuman noso bonuman musu de na un mindri, nowan sma di e suku marki fu sabi san o pasa, nowan towfruman, nowan wisiman, nowan sma di e go suku rai na wan sma di e taki nanga yeye, nowan sma di abi a wroko fu taki sani na fesi, èn nowan sma di e go suku rai na den dedewan. Yehovah e tegu gi iniwan sma di e du den sani disi.” a​—Deuteronomium 18:10-12.