Winston, fruteri wi sortu muiti yu du fu kon sabi Gado.

Mi famiri no ben de kerkisma èn mi kweki na wan boitipresi na ini Queensland, Australia. Fu di wi ben e tan so fara, meki mi no ben sabi furu sma, boiti mi famiri. Di mi ben abi 12 yari, mi bigin suku Gado. Te mi ben e begi, mi ben e aksi Gado fu yepi mi fu kon sabi suma na en trutru. Te fu kaba mi gowe fu oso, dan mi feni wroko na a foto Adelaide, na a zuidsei fu Australia. Di mi ben abi 21 yari, mi miti Pam di mi ben de tapu fakansi na Sydney. A fruteri mi fu wan kerkigrupu di e bribi taki sma fu Ingrisikondre na bakapikin fu den lo fu Israel di ben panya go na ala sei. A grupu disi e taki dati den lo disi na den tin lo fu a noordsei kownukondre fu Israel, di ben go na ini katibo na ini a yari 740 Fosi Krestes. Di mi drai go baka na Adelaide, mi opo a tori disi nanga wan mati fu mi na wrokope di ben e studeri Bijbel nanga Yehovah Kotoigi. Un ben e taki moro furu fu den sani di Yehovah Kotoigi e bribi. Baka di wi taki wan tu yuru nomo, mi kon si taki Gado ben arki den begi fu mi. Mi ben kon sabi suma na mi Mekiman trutru èn mi ben leri san na a Kownukondre fu en. Iya, mi ben feni a ’peri di warti furu’.​—Mat. 13:45, 46.

Pam, yu srefi bigin suku a peri dati di yu ben yongu. Fa yu feni en?

Mi famiri ben de kerkisma èn mi ben e libi na ini a foto Coffs Harbour, na New South Wales. Mi papa, mi mama, mi granpapa nanga granmama ben e bribi den leri fu a kerkigrupu di e taki dati sma fu Ingrisikondre na bakapikin fu den lo fu Israel. Mi, mi pikin  brada, mi bigi sisa nanga furu fu den neef nanga nicht fu mi ben leri taki den bakapikin fu den sma fu Ingrisikondre na Gado pipel. Ma mi no ben e bribi den sani disi èn mi no ben firi leki mi ben sabi Gado. Di mi ben abi 14 yari mi go na difrenti kerki soleki na Anglikan Kerki, a Baptist Kerki nanga a Zevendedagsadventist Kerki. Ma den kerki disi no yepi mi fu kon sabi Gado.

Bakaten mi famiri froisi go na Sydney, pe mi miti Winston di ben de tapu fakansi. Soleki fa a taki, a bigin studeri Bijbel nanga Yehovah Kotoigi baka di wi ben e taki fu Gado. Den brifi di Winston ben e skrifi gi mi baka di a bigin studeri, ben lai nanga Bijbeltekst! Fu taigi yu krin, na ini a bigin mi ben broko mi ede. Mi ben mandi srefi. Ma safrisafri mi kon si taki den sani di a ben fruteri mi ben tru.

Na ini 1962 mi froisi go na Adelaide fu de moro krosibei fu Winston. A ben seti sani taki mi ben man tan nanga Thomas nanga Janice Sloman, wan Kotoigi trowpaar di ben de zendeling fosi na ini Papuwa Nyun Ginea. Den ben sori switifasi gi mi. Mi ben abi 18 yari nomo èn den ben yepi mi fu kon sabi moro fu Yehovah. Na so mi bigin studeri Bijbel tu èn a no teki langa fosi mi si taki disi na a waarheid. Syatu baka di mi nanga Winston trow wi bigin nanga a furuten diniwroko èn wi kisi furu blesi. Aladi wi ben kisi problema, toku wi kisi moro warderi gi a peri di wi feni.

Winston, fruteri wi fu den fosi yari di yu bigin dini Yehovah.

Mi nanga Pam no ben trow langa di Yehovah gi wi a „moi okasi fu du furu wroko” gi en (1 Kor. 16:9). Brada Jack Porter, di ben kon fisiti a pikin gemeente fu wi leki kring-opziener, sori wi fa wi ben kan du moro gi Yehovah. (Now a de wan memre tu fu na Australasia Bijkantoro Komte.) Jack nanga en wefi Roslyn gi wi deki-ati fu du a gewoon pionierwroko. Wi du a wroko disi feifi yari èn a gi wi furu prisiri. Di mi ben abi 29 yari, den brada aksi mi nanga Pam fu du a kringwroko na den èilanti fu a Stille Zuidzee. A bijkantoro fu Fidyi ben e luku a wroko na den èilanti disi. Dati ben de den èilanti Amerkan Samoa, Samoa, Kiribati, Nawru, Ni-yu, Tokelaw, Tonga, Tufalu nanga Vanuwatu.

Na a ten dati, den sma di ben e tan na den moro fara èilanti no ben e frutrow Yehovah Kotoigi. Dati meki wi ben musu luku bun fa wi ben e preiki gi den (Mat. 10:16). Den gemeente ben pikin èn sonwan fu den no ben abi wan presi gi wi fu tan. Dati meki wi ben e aksi den sma fu den dorpu efu wi ben kan tan nanga den. Ala ten den sma disi ben sori switifasi gi wi.

Winston, a sori leki un lobi a vertaalwroko. Fa dati du kon?

Na a ten dati den brada fu Tonga ben abi wan tu traktaat nanga pikin buku nomo na ini Tongatongo. Na ini a preikiwroko den ben e gebroiki a buku „A waarheid di e tyari yu go na têgo libi” na ini Ingrisitongo. Di wi ben de na wan owruman skoro di ben hori fo wiki langa, dri owruman di ben sabi taki pikinso Ingrisitongo ben vertaal a buku disi na ini Tongatongo. Pam ben type gi den brada èn baka dati wi seni den sani di den ben vertaal go na a bijkantoro fu Amerkankondre fu print en. Den klari a wroko na ini aiti wiki. Aladi a vertaling no ben bun so, toku a buku disi yepi furu sma di e taki Tongatongo fu kon sabi a waarheid. Mi nanga Pam no e du vertaalwroko, ma na ondrofeni dati meki taki wi kon lobi a wroko disi.

Pam, fa a libi na den èilanti ben e difrenti fu a libi na ini Australia?

A libi na den èilanti ben de heri tra fasi! Na son presi maskita ben lai, tra presi ben faya, furu alata ben de, wi ben e kon siki èn son leisi wi no ben abi nofo nyanyan. Ma na a kaba fu ibri dei wi ben e firi bun te  wi ben e sidon na ini wi oso e luku a se. Na oso fu wi ben abi wan daki di meki fu tasi, a no ben abi wan vloer èn a no ben abi muur. Son neti te a munkenki ben de na loktu, wi ben kan si den palmbon èn a munkenki ben skèin go tapu a se. Na den moi momenti dati wi ben e denki dipi èn wi ben e begi. Disi yepi wi fu no poti prakseri na den tesi di wi ben e kisi, ma fu poti prakseri na den bun sani.

Wi ben lobi den pikin-nengre èn wi ben prisiri nanga den. Fu di den no ben gwenti si weti sma, meki den ben lobi kon na wi. Di wi ben de na a èilanti Ni-yu, wan fu den pikin boi kon prei nanga den wiwiri na Winston anu, dan a taki: „Mi lobi den wiwiri na yu anu.” A sori leki noiti a ben si wan sma nanga so furu wiwiri na en anu.

A ben hati wi fu si fa furu sma ben pôti. A presi ben moi, ma den no ben abi bun datrayepi èn nofo watra fu dringi. Toku den brada nanga sisa no ben broko den ede tumusi. Den ben gwenti a libi kaba. Den ben breiti kaba taki den ben de nanga den famiri, taki den ben abi wan presi fu kon makandra fu anbegi Gado èn taki den ben kan prèise Yehovah. Na eksempre fu den yepi wi fu tan poti prakseri na den moro prenspari sani èn fu no feti baka gudu.

Pam, son leisi yu ben musu go puru watra na ini wan peti èn yu ben musu suku wan fasi fu bori nyanyan. Fa yu du en?

Mi breiti taki mi papa leri mi furu sani. A leri mi fa fu meki wan udufaya, fa fu bori na en tapu èn fa mi musu libi nanga pikinso sani nomo. Wan leisi di wi go na Kiribati, wi ben tan na ini wan pikin oso di ben abi wan daki di ben meki fu tasi, wan tranga santi vloer èn den muur ben de fu bambu. Fu man bori, mi diki wan olo na ini a gron fu meki wan faya. Mi gebroiki kronto buba fu leti a faya. Efu mi ben wani watra, dan mi ben musu go tanapu na ini wan rèi na wan peti nanga den uma fu a dorpu. Fu puru watra na ini a peti, den ben gebroiki wan pikin emre di ben fasi na wan langa tiki nanga wan titei. A ben gersi wan ukutiki. Te mi ben doro na fesisei, dan mi ben trowe na emre fu mi omeni leisi go na ini a peti, ma a ben tan drifi tapu a watra. Ala den uma ben lafu mi, ma baka dati wan fu den aksi efu a kan yepi mi. Ala ten den ben sori switifasi gi wi èn den ben de klariklari fu yepi wi.

Unu ala tu ben lobi a ten di unu ben de na den èilanti. Sortu moi ondrofenitori un kan fruteri wi?

Winston: A teki ten fosi wi kon sabi ala den gwenti fu den sma drape. Fu eksempre, te den brada nanga sisa ben bori gi wi, dan den ben gi wi ala a nyanyan di den ben bori. Ma wi no ben sabi taki wi ben musu libi nyanyan gi den. Dati meki wi ben nyan ala a nyanyan. Ma te fu kaba wi kon frustan taki wi ben musu libi nyan gi den sma. Ma den brada nanga sisa no ben mandi nanga wi te wi ben meki den sortu fowtu disi. Èn den ben breiti te mi ben go drape leki kring-opziener ibri siksi mun. Boiti den brada nanga sisa fu a gemeente, mi nanga Pam ben de den wan-enkri Kotoigi di den ben sabi.

Te wi ben fisiti den gemeente, dan dati ben meki den sma denki tra fasi fu Kotoigi. Furu fu den sma na ini den dorpu ben denki taki na den brada nanga sisa srefi ben bigin nanga a bribi disi. Sobun, te den ben si tu sma fu wan tra kondre di abi a srefi bribi, dan den ben si taki wi ben de wan trutru bribi di abi sma di e broko den ede nanga makandra. Den ben lobi a sani disi.

Pam: Wan moi sani di mi no o frigiti noiti, na san ben pasa na ini Kiribati. Drape yu ben abi wan pikin gemeente. Wán owruman nomo ben de. A brada disi ben nen Itinikai Matera. Ala ten a ben meki muiti fu sorgu wi bun. Wan dei a kon na wi nanga wan manki di ben abi wán eksi nomo na ini. A taki: „Na gi unu.” Na a ten dati wi no ben e kisi eksi  furu. A ben de wan pikin sani, ma a naki wi ati trutru.

Pam, wan tu yari baka dati yu lasi bere. San yepi yu fu pasa a hebi tesi dati?

Mi kon de nanga bere na ini 1973 di mi nanga Winston ben de na den èilanti fu a Stille Zuidzee. Wi bosroiti fu drai go baka na Australia. Ma baka fo mun, mi lasi a pikin. Un ala tu ben sari. Baka wan pisi ten a pen no ben hebi so moro, ma toku a no ben gowe. Ma dati kenki di wi kisi A Waktitoren fu 15 april 2009. Na artikel „Aksi fu leisiman” ben abi na aksi disi: „Efu wan beibi dede na ini en mama bere, dan a kan kisi wan opobaka?” Na artikel disi trowstu wi èn a sori wi taki na Yehovah o bosroiti san a o du èn ala ten a e du san reti. A o tyari wan kaba kon na ala den hati sani di wi ondrofeni na ini na ogri grontapu disi èn a o meki en Manpikin „tyari wan kaba kon na den wroko fu Didibri” (1 Yoh. 3:8). Na artikel memre wi baka na a warti „peri” di a pipel fu Yehovah abi. San wi ben o du efu wi no ben sabi sortu moi sani a Kownukondre o du?

Baka di wi lasi a pikin, wi bigin baka nanga a furuten diniwroko. Wi wroko wan tu mun na a Betel fu Australia, èn baka wan pisi ten wi bigin du a kringwroko baka. Baka di wi du a kringwroko fo yari na ini New South Wales nanga Sydney, den brada aksi wi fu go dini na a bijkantoro fu Australia na ini 1981. Te now ete wi e wroko drape.

Winston, yu ondrofeni furu sani na den èilanti fu a Stille Zuidzee. Den sani disi yepi yu fu du yu wroko leki memre fu na Australasia Bijkantoro Komte?

Iya, a yepi mi furu. Australia ben abi a frantwortu fu luku a wroko na ini Amerkan Samoa nanga Samoa. Baka dati a bijkantoro fu Australia nanga a di fu Nyun Zeeland tron na Australasia bijkantoro. Now a bijkantoro disi e luku a wroko na ini Australia, Amerkan Samoa, Samoa, den Cook-èilanti, Nyun Zeeland, Ni-yu, Owstu-Timor, Tokelaw-èilanti, nanga Tonga. Mi go na furu fu den presi disi fu hori lezing èn fu teki presi gi a bijkantoro. Den sani di mi ondrofeni di mi ben wroko makandra nanga den brada nanga sisa na den èilanti e yepi mi fu du mi wroko bun na a bijkantoro.

Leki lasti mi wani taki dati furu yari langa mi nanga Pam frustan taki a no soso bigisma e suku Gado. Wi srefi ondrofeni a sani disi. Srefi yongusma e suku a ’peri di warti furu’, awinsi den tra famiriman fu den no wani kon sabi Yehovah (2 Kow. 5:2, 3; 2 Kron. 34:1-3). Yehovah na wan lobi-ati Gado di wani taki ala sma, yonguwan nanga owruwan, musu kisi têgo libi!

Mi nanga Pam bigin suku Gado sowan 50 yari pasa. Na a ten dati wi no ben sabi taki wi ben o feni so wan warti peri. Den sani di wi leri fu a Kownukondre de trutru leki wan peri di abi furu waarde! Wi o du ala san wi man fu no lasi a peri disi noiti!