1. Fa furu sma e denki te a abi fu du nanga têgo libi?

 FURU sma e pruberi fu nyan gosontu n’nyan èn fu oefen den skin fu di den wani tan gosontu. Ma tòg den sma disi no e ferwakti fu libi fu têgo. Kande den e denki taki wan sma no man libi fu têgo. Ma Yesus ben taki dati libisma man kisi „têgo libi” èn taki a de wan blesi fu Gado, soleki fa a skrifi na Yohanes 3:16 nanga 5:24.

2. San Yohanes kapitel 6 e taki fu têgo libi? (Yohanes 6:39, 40)

² Wan dei, Yesus du wan wondru fu gi dusundusun sma brede nanga fisi. a Furu sma no ben man bribi san den si, ma a sani di a taigi den ip’ipi sma a dei baka dati, ben abi moro krakti na den tapu. Den sma disi ben go miti en na ini Kaperna-um, krosbei fu a syoro fu Galilea, èn drape a taigi den taki sma ben o kisi wan opobaka èn taki den ben o libi fu têgo. (Leisi Yohanes 6:39, 40.) Prakseri san dati wani taki gi den mati nanga den famiriman fu yu di dede kba. Ma furu fu den sma di ben go miti Yesus, no ben man ferstan den sani di Yesus ben taki moro fara na ini Yohanes kapitel 6, èn na ini a ten disi furu sma no man ferstan den tu. San Yesus ben taki?

3. San Yesus ben taki fu ensrefi, soleki fa Yohanes 6:51 e sori?

³ Baka di Yesus du wan wondru fu gi den sma n’nyan,  dan den sma ben e prakseri a mana di Yehovah ben gi den Israelsma di den ben den na ini a gran sabana. Fu taki en leti, Bijbel e kari a mana dati „brede fu hemel” (Ps. 105:40; Yoh. 6:31). Yesus kari wan tu sani di den sma ben sabi fu a mana, fu di a ben wani leri den wan prenspari sani (Yoh. 6:49). Aladi Gado ben du wan wondru fu gi den a mana, tòg den sma di ben nyan en kon dede te fu kba. Ma Yesus kari ensrefi „a trutru brede fu hemel”, „a brede fu Gado”, èn „a brede di e gi libi” (Yoh. 6:32, 33, 35). Yesus sori den sma wan prenspari fasi fa a ben e difrenti fu a mana. A taki: „Mi na a brede di e gi libi èn di saka komoto fu hemel. Efu wan sma e nyan a brede disi, dan a o libi fu têgo.” (Leisi Yohanes 6:51.) Den Dyu dati no ben man ferstan san Yesus ben wani taigi den. Fa Yesus ben kan taki dati a ben de „a brede” di ben saka kmoto fu hemel èn taki a brede disi ben bun moro a mana di Gado ben gi den afo fu den? Dan Yesus taigi den: „A brede na mi skin di mi o gi.” San Yesus ben wani taki nanga dati? A prenspari taki wi e ferstan san a ben wani taki nanga den wortu dati, fu di a piki tapu na aksi disi e sori fu san ede wi nanga den lobiwan fu wi o man libi fu têgo. Meki wi go luku san den wortu fu Yesus ben wani taki.

SAN DEN WORTU „A BREDE DI E GI LIBI” ÈN „MI SKIN” WANI TAKI?

4. Fu san ede son sma skreki fu a sani di Yesus taki?

⁴ Sonwan fu den sma di ben e arki Yesus skreki di a taki dati a ben o gi ’en skin so taki grontapu kan kisi libi’. Kande den ben e denki taki a ben wani den fu nyan en trutru skin (Yoh. 6:52). Dan Yesus taigi den wan sani di den no ben lobi srefsrefi. A taigi den: „Efu unu no e nyan a skin fu a Manpikin fu libisma èn unu no e dringi en brudu, dan unu no abi libi na ini unsrefi.”​—Yoh. 6:53.

5. Fu san ede wi kan de seiker taki a no en trutru brudu Yesus ben wani taki sma dringi?

⁵ Na ini a ten fu Noa, Gado ben taigi libisma taki den no mag nyan brudu (Gen. 9:3, 4). Bakaten, Yehovah taigi den Israelsma tu taki den no mag nyan brudu. Iniwan sma di ben nyan brudu ben „musu dede” (Lef. 7:27). Yesus ben e hori ensrefi na a Wet dati (Mat. 5:17-19). Dati meki noiti a ben o aksi den Dyu dati fu nyan en trutru skin noso fu dringi en trutru brudu. Ma di a taki den wortu dati, dan fu taki en leti a ben wani leri a pipel fa den kan kisi libi, iya, „têgo libi”.​—Yoh. 6:54.

6. Fa wi du sabi taki Yesus ben e gebroiki wan agersitori na Yohanes 6:53?

⁶ A de krin taki a ben e gebroiki wan agersitori di a ben e taki nanga den sma. Yesus ben du dati tu di a ben taigi a Samaria uma: „Efu wan sma e dringi a watra di mi o gi en, dan watra no o kiri en noiti moro. Ma a watra di mi o gi en o tron leki wan peti na ini en. A o gi watra di o gi en têgo libi” (Yoh. 4:7, 14). b Den wortu fu Yesus no ben wani taki dati na watra nomo a Samaria uma ben o abi fu dringi fu wan spesrutu watra-olo, èn taki a ben o kisi têgo libi baka dati. Na so a de tu taki a sani di a ben taigi den sma na ini Kaperna-um no ben wani taki dati den ben musu nyan en trutru skin èn dringi  en trutru brudu efu den ben wani libi fu têgo.

WAN TRA OKASI PE YESUS TAKI DEN SREFI SORTU SANI

7. San son sma e taki fu den sani di Yesus taki na Yohanes 6:53?

⁷ Son kerkisma e taki dati na Yohanes 6:53 Yesus e sori san sma ben o abi fu du na a Avondmaal fu Masra, fu di a ben taki den srefi sortu sani na a okasi dati (Mat. 26:26-28). Den sma disi feni taki ibri sma di de na a Avondmaal fu Masra, musu nyan fu a brede èn dringi fu a win di e psa na den fesi. A sani disi tru? A prenspari fu kon sabi efu den sma disi abi leti, fu di ibri yari milyunmilyun sma na heri grontapu e konmakandra nanga wi na a okasi dati. Wi o si taki den wortu fu Yesus na Yohanes 6:53, wani taki wan heri tra sani leki san a ben taki na a Avondmaal fu Masra.

8. Fa den tu okasi disi e difrenti fu makandra? (Luku den prenki.)

⁸ Wi o poti prakseri na tu fasi fa den okasi disi e difrenti fu makandra. A foswan, na o ten Yesus taki den sani di skrifi na Yohanes 6:53-56 èn pe a du dati. A ben taigi wan grupu Dyu den sani dati na ini a Galilea, na ini a yari 32. Dati ben de bijna wán yari fosi a ben seti na Avondmaal fu Masra na ini Yerusalem. A di fu tu, na suma a ben taigi den sani  dati. A ben e taki nanga sma di ben feni en moro prenspari fu kisi n’nyan, leki fu leri sani fu Yehovah noso fu Gado Kownukondre (Yoh. 6:26). Fu taki en leti, di Yesus taki wan sani di den no ben man ferstan, dan wantewante den tapu fu bribi na ini en. Srefi sonwan fu den disipel fu en drai baka gi en (Yoh. 6:14, 36, 42, 60, 64, 66). Ma luku fa sani waka wán yari baka dati, na ini a yari 33, di Yesus seti na Avondmaal fu Masra. Na a okasi dati den 11 getrow apostel ben de nanga en aladi den no ben e ferstan ala den sani di a ben e leri den. Ma tra fasi leki furu fu den sma na ini Galilea, den 11 apostel ben de seiker taki Yesus ben de a Manpkin fu Gado di ben saka kmoto fu hemel (Mat. 16:16). Yesus ben taigi den: „Unu na den wan di tan nanga mi di mi ben kisi tesi” (Luk. 22:28). Den tu difrenti disi e sori kba taki na Yohanes 6:53, Yesus no ben e pruberi fu ferklari san ben o psa na a Avondmaal fu Masra. Ma moro fasi de fa den tu okasi disi e difrenti fu makandra.

SAN DEN WORTU FU YESUS WANI TAKI GI YU

9. Sortu grupu sma de na ini a nyun ferbontu di Yesus ben taki fu en na a Avondmaal fu Masra?

⁹ Na a Avondmaal fu Masra, Yesus ben gi den apostel fu en brede sondro srudeki èn a taigi den taki a brede dati ben e prenki en skin. Dan a meki wan kan nanga win psa na den fesi fu meki den dringi èn a taki dati a win disi ben e prenki a „brudu fu a frubontu” (Mark. 14:22-25; Luk. 22:20; 1 Kor. 11:24). A sani di a taki fu a ferbontu prenspari srefsrefi. A nyun ferbontu disi meki nanga na Israel fu Gado. Dati na soso den wan di o tiri makandra nanga Yesus „na ini a Kownukondre fu Gado” (Hebr. 8:6, 10; 9:15). Den apostel no ben e ferstan ala sani fu a ferbontu na a ten dati, ma syatu baka dati Yehovah ben o salfu den nanga santa yeye èn den ben o kon na ini a nyun ferbontu fu man tiri na hemel makandra nanga Yesus.​—Yoh. 14:2, 3.

10. Fa den sani di Yesus ben taki na ini Galilea ben e difrenti fu den sani di a taki na a Avondmaal fu Masra? (Luku a prenki.)

¹⁰ Den sani di Yesus ben taki na a Avondmaal fu Masra abi fu du nanga a „pikin ipi”. Den fosi sma na ini a grupu disi ben de den getrow apostel di ben de drape na ini a kamra makandra nanga Yesus (Luk. 12:32). Den apostel disi nanga trawan di ben o de tu na ini a grupu, ben o abi fu nyan fu a brede èn dringi fu a win. Na den sma disi o tiri na hemel makandra nanga Yesus. Den sani di Yesus ben taigi den apostel fu en na a Avondmaal fu Masra e difrenti fu den sani di a ben taigi a den sma na ini Galilea. Den sani di a ben taki na ini Galilea abi fu du nanga wan moro bigi grupu.

11. Fa den sani di Yesus ben taki na ini Galilea e sori taki a no ben e taki fu wan pkin grupu sma?

¹¹ Di Yesus ben de na ini Galilea na ini a yari 32, dan a ben e taki moro furu nanga Dyu di ben wani kisi brede. Ma Yesus pruberi fu yepi den fu kon ferstan taki wan moro prenspari sani ben de leki brede. A sani dati ben kan gi den têgo libi. Yesus ben taki srefi taki den sma di dede ben kan kisi wan opobaka na a lasti dei èn den ben o man libi fu têgo. Dyaso na ini Yohanes 6, a no ben e taki fu wan blesi di wan tu sma nomo ben o kisi, neleki fa a ben du dati na a Avondmaal fu Masra. Na presi fu dati, a ben e taki fu  wan blesi di ala sma ben o man kisi. A ben taki: „Efu wan sma e nyan a brede disi, dan a o libi fu têgo. . . A brede na mi skin di mi o gi, so taki grontapu kan kisi libi.”​—Yoh. 6:51.

12. San de fanowdu fu man kisi têgo libi?

¹² Ma disi ben wani taki dati ala sma di oiti ben de na libi ben o kisi têgo libi? Nôno, soso den wan di „e nyan a brede disi” ben o kisi têgo libi, èn dati na den wan di e bribi na ini Yesus. Furu sma na ini a ten disi e taki dati den e bribi na ini Yesus èn den e si en leki den ferlusuman (Yoh. 6:29). Ma moro de fanowdu. Na ini Galilea, furu sma ben de di ben e bribi fosi na ini Yesus, ma dan den drai baka gi en. Fu san ede?

13. San a wani taki fu bribi na ini Yesus?

¹³ Furu fu den sma di Yesus ben gi n’nyan ben de klarklari fu waka na en baka solanga a ben e gi den san den ben wani. Den ben wani taki a dresi den siki fu den, taki a gi den n’nyan, èn taki a ferteri den sani di den ben wani yere. Ma Yesus sori den krin taki a no ben kon na grontapu soso fu gi den san den ben wani. A ben kon fu leri den san den ben musu du fu man de trutru bakaman fu en. A ben wani taki den ben musu „kon na” en. Dati wani taki dati den ben musu arki en èn gi yesi na en.​—Yoh. 5:40; 6:44.

14. San wi musu du fu man kisi wini fu Yesus en skin nanga en brudu?

¹⁴ Yesus ben leri den sma taki den ben o man libi fu têgo fu di a ben gi en skin nanga en brudu leki srakti-ofrandi. Den ben musu bribi a sani dati. Wi na ini a  ten disi musu bribi dati tu (Yoh. 6:40). Dus, den sani di Yesus ben taki na Yohanes 6:53 wani taki dati wi musu poti bribi na ini a lusu-paiman fu man kisi têgo libi. Bun furu sma kan kisi wini fu a lusu-paiman disi.​—Ef. 1:7.

15-16. Sortu prenspari sani wi leri fu Yohanes kapitel 6?

¹⁵ Na ini Yohanes kapitel 6, wi leri furu sani di prenspari srefsrefi èn di e gi wi alamala dek’ati. Wi leri taki Yesus e broko en ede trutru nanga sma. Di a ben de na ini Galilea, a dresi sikisma, a gi sma leri fu a Kownukondre, èn a sorgu taki sma ben abi n’nyan (Luk. 9:11; Yoh. 6:2, 11, 12). Ma san moro prenspari, na taki a leri sma taki en na „a brede di e gi libi”.​—Yoh. 6:35, 48.

¹⁶ A tru taki den sma di Yesus ben kari den „tra skapu”, no e nyan fu a brede èn den no e dringi tu fu a win na a Avondmaal fu Masra. Den no musu du dati tu (Yoh. 10:16). Ma tòg den e kisi wini fu a skin nanga a brudu fu Yesus Krestes. Den e kisi wini fu di den e bribi na ini a srakti-ofrandi fu Yesus èn na ini den moi sani di a e du (Yoh. 6:53). Den sma di musu nyan fu a brede èn dringi fu a win e sori taki den de na ini a nyun ferbontu èn taki den abi a howpu fu tiri na ini a Kownukondre na hemel. Dati meki, awinsi wi de fu a grupu fu salfuwan, noso fu den tra skapu, wi kan leri furu fu a tori na ini Yohanes kapitel 6. A e leri wi taki wi alamala musu bribi tranga na ini a lusu-paiman efu wi wani libi fu têgo.