Son sma di leisi a tori disi frafra, e aksi densrefi a sani disi. Ma den vers disi e taki fu tu difrenti man di ben nen Mefiboset. Wi kan leri wan sani fu a tori disi te wi luku san ben pasa.

Kownu Saul fu Israel ben abi seibi manpikin nanga tu umapikin. A fosi manpikin fu en ben de Yonatan. Bakaten Saul kisi wan manpikin nanga na uma Rispa. A boi dati ben nen Mefiboset. Ma Yonatan ben abi wan manpikin di ben nen Mefiboset tu. Sobun, Kownu Saul ben abi wan manpikin nanga wan granpikin di ben abi a srefi nen.

Te fu kaba, Kownu Saul kisi bita-ati gi den Gibeonsma di ben e libi na mindri den Israelsma èn a ben suku fu kiri den alamala. Soleki fa a sori, dan a kiri wan tu fu den. A sani dati no ben bun srefisrefi. Fu san ede? Fu di na ini a ten fu Yosua, den edeman fu Israel ben meki wan frubontu fu freide nanga den Gibeonsma.​—Yos. 9:3-27.

A frubontu dati ben e teri ete na ini a ten fu Kownu Saul. Na presi fu hori ensrefi na a frubontu, a kownu suku fu kiri ala den Gibeonsma. A sani dati meki taki ’Saul nanga en osofamiri kisi brudu-paiman’ (2 Sam. 21:1). Te fu kaba, David tron kownu. Den Gibeonsma di ben tan na libi taki nanga David fu a bigi ogri di Saul ben du. David aksi den san a ben kan du fu meki sani kon bun baka, so taki Yehovah ben kan blesi a kondre. Na presi fu aksi moni, den aksi David fu gi den seibi manpikin fu a man di ben ’suku fu kiri den puru’ na ini ala den kontren fu Israel, so taki den ben kan kiri den. David du san den ben aksi en.​—2 Sam. 21:2-6; Num. 35:30, 31.

Na a ten dati, Saul nanga Yonatan ben dede kaba na ini wan feti, ma Mefiboset a manpikin fu Yonatan ben de na libi ete. A ben malengri fu di a ben kisi mankeri di a ben pikin èn a no ben abi noti fu du nanga na ogri di en granpapa ben du nanga den Gibeonsma. David ben meki wan frubontu nanga Yonatan èn ala den bakapikin fu Yonatan ben o kisi wini fu dati, en manpikin Mefiboset tu (1 Sam. 18:1; 20:42). A tori e taki: „Kownu [David] ben e sari Mefiboset, a manpikin fu Yonatan, di ben de wan manpikin fu Saul. David ben memre a sweri di en nanga Yonatan, a manpikin fu Saul, ben meki na fesi Yehovah.”​—2 Sam. 21:7.

Toku David du san den Gibeonsma aksi en. A gi den tu fu den manpikin fu Saul, nanga feifi fu en granpikin. Wan fu den manpikin fu Saul ben nen Mefiboset (2 Sam. 21:8, 9). A sani di David du ben meki taki a kondre no ben abi brudu-paiman moro.

Wi kan leri wan prenspari sani fu a Bijbel tori disi di pasa na ini owruten. A wet fu Gado ben e taki krin: „Un no musu kiri wan pikin fu a sondu di en papa du” (Deut. 24:16). Efu den tu manpikin nanga den feifi granpikin fu Saul no ben abi noti fu du nanga na ogri disi, dan Yehovah no ben o feni en bun taki a sani disi miti den. A wet ben e taki tu: „Na a sma di sondu, musu dede.” A sori leki den seibi bakapikin fu Saul di dede ben horibaka gi en di a ben wani kiri ala den Gibeonsma. Dati meki den seibi man disi pai fu na ogri di den du.

A tori disi e leri wi taki wan sma no kan denki taki a no o kisi strafu fu wan ogri di a du, fu di a feni taki a du nomo san sma taigi en. Wan odo e taki: „Grati a pasi pe yu e poti yu futu èn waka sondro fu degedege. No beni go na a reti-anusei noso na a kruktu-anusei. Puru yu futu na a pasi fu ogridu.”​—Odo 4:24-27; Ef. 5:15.