FU DI wi e libi na ini wan grontapu pe problema lai, meki wi musu du tranga muiti fu abi freide. Ma awinsi wi abi freide, toku a no makelek fu tan abi freide. Soleki fa Gado Wortu e sori, dan san wi musu du fu man abi trutru freide di o tan fu ala ten? Èn fa wi kan yepi trawan fu abi freide tu?

O ten wan sma abi trutru freide? Dati na te a no e frede taki ogri o miti en èn te a abi wan korostu firi. Sowan sma abi bun mati tu. San moro prenspari, na taki a musu tron wan bun mati fu Gado efu a wani abi trutru freide. San o yepi wi fu tron mati fu Gado?

Te wi e du san Yehovah e taki, dan wi e sori taki wi e frutrow na en tapu èn taki wi wani de en mati (Yer. 17:7, 8; Yak. 2:22, 23). Te wi e du dati, dan Yehovah o kon krosibei na wi èn a o meki wi abi wan korostu firi. Yesaya 32:17 e taki: „Te trutru retidu o du en wroko, dan ala sani o waka bun. Iya, te trutru retidu de, ala sma o de korostu ala ten èn den no o abi broko-ede.” Wi o abi wan korostu firi te wi e gi yesi na Yehovah nanga wi heri ati.​—Yes. 48:18, 19.

Wan tra sani di o yepi wi fu tan abi freide na a santa yeye di wi Papa na hemel e gi wi.​—Tori 9:31.

Na apostel Paulus ben kari freide leki a di fu dri „fasi di a yeye e meki sma kisi” (Gal. 5:22, 23). Na a santa yeye e yepi wi fu abi trutru freide. Dati meki wi musu meki a santa yeye abi krakti na wi tapu so taki wi kan kon abi freide. Meki wi go luku tu fasi fa a santa yeye kan yepi wi fu abi freide.

1. Te wi e leisi Gado Wortu ala dei, dan wi o kon abi freide (Ps. 1:2, 3). Te wi e denki  dipi fu den sani di wi e leisi na ini Bijbel, dan a santa yeye o yepi wi fu frustan fa Yehovah e denki fu furu sani. Fu eksempre, wi o si fu san ede freide prenspari gi en èn fu san ede a man tan abi freide awinsi san e pasa. Te wi e du san wi leri na ini Gado Wortu, dan wi o abi moro freide.​—Odo 3:1, 2.

2. Wi musu begi Gado fu gi wi santa yeye (Luk. 11:13). Yehovah pramisi taki efu wi e suku yepi na en, dan „a freide fu Gado di bigi moro iniwan sani di libisma man frustan, o kibri [wi] ati nanga [wi] frustan nanga yepi fu Krestes Yesus” (Fil. 4:6, 7). Te wi e begi doronomo èn te wi e aksi Yehovah fu gi wi en santa yeye, dan a o gi wi wan korostu firi. Yehovah e gi a freide disi soso na den mati fu en.​—Rom. 15:13.

Fa son sma fiti den Bijbel rai disi? Sortu kenki di den tyari kon yepi den fu tan abi freide nanga Yehovah èn nanga tra sma? Fa disi yepi den fu tan abi wan korostu firi?

Fosi son sma kon sabi Yehovah, den ben e ’ati bron esi’. Ma now den e hori den firi fu trawan na prakseri, den abi switifasi, den abi pasensi èn den e libi bun nanga tra sma (Odo 29:22). * Luku san yepi wan brada nanga wan sisa fu no ati bron so esi moro èn fu libi bun nanga tra sma.

A fasi fa David ben e denki, ben meki taki a no ben taki bun nanga sma. Fosi a gi en libi abra na Gado a ben lobi krutu tra sma èn a ben e taki grofu nanga en papa nanga mama èn nanga den pikin brada nanga sisa fu en. Bakaten David kon frustan taki a ben musu kenki èn taki a ben musu libi moro bun nanga trawan. San yepi en fu du dati? A taki: „Di mi bigin du san Bijbel e taki, mi bigin sori moro lespeki gi mi famiri èn den ben kon abi lespeki gi mi tu.”

A fasi fa Rachel kweki ben abi krakti tapu a fasi fa a ben e tyari ensrefi. A taki: „Mi kweki na ini wan famiri pe ala sma ben atibron furu. Dati meki te now ete mi musu meki muiti fu no atibron esi.” San yepi en fu no atibron esi? A taki: „Mi ben e  begi Yehovah doronomo èn mi aksi en fu yepi mi.”

David nanga Rachel na tu eksempre nomo di e sori taki te wi e du san Bijbel e taki èn te wi e frutrow tapu a santa yeye fu Gado, dan wi o abi freide. A de krin taki awinsi wi e libi na ini wan grontapu pe sma lobi meki trobi, wi kan abi freide. Dati o yepi wi fu libi bun nanga wi famiri èn nanga wi Kresten brada nanga sisa. Ma Yehovah e gi wi deki-ati fu „libi bun nanga ala sma” (Rom. 12:18). A sani disi kan? Sortu wini wi e kisi te wi e meki muiti fu libi bun nanga tra sma?

Te wi e du a preikiwroko, dan wi e gi sma okasi fu kon sabi taki Gado Kownukondre o tyari freide kon (Yes. 9:6, 7; Mat. 24:14). Wi breiti taki furu sma e arki a boskopu. Disi e meki taki den no e bruya moro, den no e frede èn den no e ati bron te den e si den sani di e pasa now. Ma den abi trutru howpu, den e ’suku freide èn den e du muiti fu feni en’.​—Ps. 34:14.

Ma a no ala sma e arki a boskopu fu wi te den yere en a fosi leisi (Yoh. 3:19). Toku a santa yeye fu Gado e yepi wi fu preiki a bun nyunsu gi den na wan switi fasi èn na wan lespeki fasi. Na so wi e du san Yesus leri wi soleki fa skrifi na Mateyus 10:11-13. Drape a gi wi a rai: „Te unu e go na ini na oso, taki den sma na ini na oso odi. Efu den e teki unu na ini oso, dan un musu blesi den. Ma efu den no e teki unu na ini oso, dan na unu o kisi a blesi.” Te wi e du san Yesus taki, dan wi o firi bun fu di wi sabi taki wi du san wi ben musu du èn wi kan howpu taki a sma o arki tra leisi.

Wi e suku freide tu te wi e taki nanga lantiman na wan lespeki fasi, srefi den wan di e gens a wroko fu wi. Fu eksempre, na ini wan Afrikan kondre, lanti no ben wani gi wi primisi fu bow Kownukondre zaal fu di den ben abi wan fowtu denki fu wi. Fu di den brada ben wani lusu a problema disi sondro taki dyugudyugu kon, meki den seni wan brada fu go taki nanga na ambassadeur fu a kondre disi na ini Londen, Ingrisikondre. A brada disi ben dini fosi leki zendeling na ini na Afrikan kondre dati. A brada ben musu fruteri na ambassadeur taki a wroko di Yehovah Kotoigi e du na ini en kondre na wan bun wroko. Fa sani waka?

A brada e fruteri: „Di mi doro na a kantoro, èn mi luku den krosi fu na uma di ben teki telefon, dan mi si taki a ben de fu wan lo di mi ben sabi. Mi ben leri taki a tongo fu en. Dati meki mi gi en odi na ini en mamatongo. A ben skreki, dan a aksi mi: ’San mi kan du gi yu?’ Na wan lespeki fasi mi taigi en taki mi ben wani taki nanga na ambassadeur. A bel en, dan a kon miti mi. A gi mi odi na ini a tongo fu a lo fu en. Baka dati a arki bun di mi fruteri en sortu bun wroko Yehovah Kotoigi e du na ini a kondre fu en.”

Fu di a brada fruteri na wan lespeki fasi sortu wroko wi e du, meki na ambassadeur kisi wan tra denki fu den Kotoigi. Baka wan pisi ten, lanti fu na Afrikan kondre dati gi wi primisi fu bow Kownukondre zaal. Den brada nanga sisa ben breiti taki a problema disi lusu sondro dyugudyugu. Iya, te wi e sori lespeki gi trawan, dan dati e tyari freide kon èn wi e kisi furu tra wini.

Na ini a ten disi, a pipel fu Yehovah e libi na ini freide nanga makandra. Yu kan sorgu taki a freide disi tan te yu e du muiti fu kon abi a fasi disi di a santa yeye e meki wi kisi. Ma san moro prenspari, na taki Yehovah o feni yu bun èn fu têgo yu o man libi na ini freide na ini a nyun grontapu.​—2 Petr. 3:13, 14.