1, 2. (a) San e miti furu sma di e go libi na ini wan tra kondre? (Luku a prenki na a bigin fu na artikel.) (b) Sortu rai na apostel Paulus e gi wi èn sortu aksi wi o go luku?

MORO leki 30 yari pasa, Osei ^[1] di no ben de wan Kotoigi ete, froisi fu Gana go na Europa. A e taki: „Heri esi mi kon si taki furu sma no ben e span nanga mi. Mi no ben man nanga a weer drape tu. Di mi saka fu a plain èn mi firi fa a weer kowru, mi bigin krei. Fositron na ini mi libi mi firi so wan kowru weer.” Fu di Osei no ben man taki a tongo so bun, meki moro leki wán yari a no ben man feni wan bun wroko. A ben e misi en kondre nanga en famiri fu di a ben de fara fu den.

² Fa yu ben o wani taki sma libi nanga yu efu yu ben de na ini so wan situwâsi? Yu no ben o breiti efu sma na ini a Kownukondre zaal ben o gi yu wan switikon awinsi fu sortu kondre yu de noso awinsi sortu skin kloru yu abi? Fu taki en leti, Bijbel e gi Kresten a rai disi: „No frigiti fu lobi fu gi sma wan switikon” (Hebr. 13:2). Na ini Grikitongo den wortu di vertaal  nanga „lobi fu gi sma wan switikon”, wani taki „sori switifasi gi trakondre sma”. Sobun, meki wi go luku den aksi di e kon now: Fa Yehovah e si sma fu tra kondre? Fu san ede a kan taki wi musu kenki a fasi fa wi e si sma fu tra kondre? Fa wi kan meki trakondre sma di kon na ini wi gemeente, firi leki den de na oso?

3, 4. Soleki fa Eksodes 23:9 e sori, dan fa Gado ben wani taki en pipel si trakondre sma èn fu san ede?

³ Baka di Yehovah fri en pipel fu Egepte, a gi den wet di ben e sori fa den ben musu libi nanga den furu trakondre sma di ben de na den mindri (Eks. 12:38, 49; 22:21). Fu di a muilek gi sma fu tra kondre fu feni san den abi fanowdu, meki Yehovah ben seti wan tu moi sani gi den sma disi. Wan fu den sani dati, na taki den ben kan piki a nyanyan di tan abra na ini den gron.​—Lef. 19:9, 10.

⁴ Yehovah no dwengi den Israelsma fu sori lespeki gi trakondre sma, ma a aksi den fu sori sari-ati gi den sma disi. (Leisi Eksodes 23:9.) Den Israelsma ben ’sabi fa wan trakondre sma e firi’. Srefi fosi den tron srafu, den Egeptesma no ben wani bumui nanga den fu di den ben de fu wan tra ras èn den ben abi wan tra bribi (Gen. 43:32; 46:34; Eks. 1:11-14). Aladi den Israelsma ben pina di den ben e libi na ini Egepte, toku Yehovah ben wani taki den ben musu si den trakondre sma di ben e libi na den mindri, ’leki den eigi kondreman’.​—Lef. 19:33, 34.

5. San o yepi wi fu si trakondre sma leki fa Yehovah e si den?

⁵ Na ini a ten disi, wi kan de seiker taki Yehovah e broko en ede tu nanga sma fu tra kondre di e kon na den konmakandra fu wi (Deut. 10:17-19; Mal. 3:5, 6). Denki sortu problema e miti den sma disi. Fu eksempre, sma e desko den èn a no makriki gi den fu taki a tongo. Dati meki wi musu luku fa wi kan yepi den èn fa wi kan sori switifasi gi den.​—1 Petr. 3:8.

6, 7. San e sori taki den fosi Kresten ben leri fu no desko trawan?

⁶ Den fosi Kresten ben leri fu no denki takru fu trakondre sma moro, soleki fa den Dyu ben gwenti. Na a Pinksterfesa fu a yari 33, den Dyu Kresten di ben e libi na Yerusalem ben meki den nyun Kresten di ben komoto fu tra kondre tan na ini den oso èn den ben yepi den tu (Tori 2:5, 44-47). A fasi fa den Dyu Kresten sori lobi gi den Kresten brada fu den, e sori taki den ben frustan san a wani taki fu gi sma wan switikon.

⁷ Ma di a fosi Kresten gemeente ben e kon moro bigi, wan seryusu sani pasa. Den Dyu di ben e taki Grikitongo, krutu taki den tra Kresten no ben e libi bun nanga den Griki uma di lasi den masra na ini dede (Tori 6:1). Fu lusu a problema disi, den apostel poti seibi man di ben musu sorgu taki ala sma e kisi san den abi fanowdu. Ala den man disi ben abi Griki nen. Kande den apostel du disi so taki den Griki Kresten no firi wan fasi moro.​—Tori 6:2-6.

8, 9. (a) San kan sori taki wi e denki takru fu sma di de fu wan tra ras noso kulturu? (b) San wi musu du te wi e si taki wi e desko sma? (1 Petr. 1:22)

⁸ Awinsi fa a no fa, wi alamala e denki takru fu sma fu tra kulturu son leisi (Rom. 12:2). A e pasa tu taki wi e yere birtisma, sma na wi wrokope noso skoropikin e taki fruferi sani fu sma di abi wan tra skin kloru, di de fu wan tra ras noso wan tra lo. Wi e teki a denki fu den sma  disi abra tu? Fa wi e firi te sma e meki spotu fu a kondre fu wi noso te den e taki sani fu a ras fu wi?

⁹ Wan pisi ten, na apostel Petrus ben e desko sma di no ben de Dyu, ma bakaten a leri fu no denki takru moro fu den sma disi (Tori 10:28, 34, 35; Gal. 2:11-14). Sobun, efu wi si taki wi e desko sma fu wan tra ras, awinsi na pikinso srefi, wi musu meki muiti fu kenki a fasi fa wi e denki. (Leisi 1 Petrus 1:22.) A bun fu hori na prakseri taki nowan fu wi abi a reti fu kisi frulusu fu di wi alamala na sondusma, awinsi fu sortu kondre wi de (Rom. 3:9, 10, 21-24). Dati meki wi no musu denki taki wi bun moro trawan (1 Kor. 4:7). Wi musu abi a srefi denki leki na apostel Paulus di ben taigi den salfu brada fu en taki den no ben de ’trakondre sma moro, ma taki den ben de fu na osofamiri fu Gado’ (Ef. 2:19). Te wi e du furu muiti fu no desko sma fu wan tra ras noso kulturu, dan dati o yepi wi fu tron nyun sma di e sori den fasi fu Gado.​—Kol. 3:10, 11.

10, 11. Fa Boas sori taki a ben e si sma fu tra kondre leki fa Yehovah e si den?

¹⁰ Den sani di Boas du gi Rut, wan uma fu Moab, e sori taki a ben e si sma fu tra kondre leki fa Yehovah e si den. Di Boas go luku fa a ben e go nanga a kotiwroko, dan a si fa wan uma di ben de fu wan tra kondre ben e wroko tranga. A ben e waka piki nyanyan na baka den wrokoman fu en. Boas yere taki na uma disi ben aksi primisi fu piki a nyanyan di tan na baka, aladi a no ben abi fu du dati. Ne Boas taigi den kotiman fu en taki den ben musu puru srefi wan tu fu den tiki aleisi di den ben tai na ini bosu kaba èn libi den gi Rut meki a piki den.​—Leisi Rut 2:5-7, 15, 16.

¹¹ Den sani di Boas taki moro fara e sori taki a ben e broko en ede nanga Rut fu di a ben de wan uma fu wan tra kondre di ben de na ini wan muilek situwâsi. A aksi Rut fu tan krosibei fu den yongu uma so taki den yonguman no fruferi en. Boas taigi Rut srefi taki te a ben wani nyan èn dringi a ben kan du dati neleki den tra wrokoman fu en. Boas taki na wan lespeki fasi tu nanga a pôti uma disi èn a trowstu en.​—Rut 2:8-10, 13, 14.

12. Te wi e sori switifasi gi trakondre sma, dan san dati kan du gi den?

¹² Boas ben lobi a fasi fa Rut ben sorgu gi Naomi, ma a ben naki en ati tu di a yere taki Rut tron wan anbegiman fu Yehovah. A switifasi di Boas sori gi Rut, e meki wi si fa Yehovah sori lobi gi wan uma di ben kon ’suku wan kibripresi na a Gado fu Israel’ (Rut 2:12, 20; Odo 19:17). Te wi e sori switifasi gi „ala sortu sma” na ini a ten disi, dan wi kan yepi den tu fu kon sabi a tru anbegi èn fu si fa Yehovah lobi den.​—1 Tim. 2:3, 4.

13, 14. (a) Te sma fu wan tra kondre kon na ini wi gemeente, dan fu san ede wi musu meki muiti fu gi den odi? (b) San yu kan du efu yu e syen fu taki nanga wan sma fu wan tra kulturu?

¹³ Wi kan sori switifasi gi wan trakondre sma te wi e gi en wan switikon na ini a gemeente. Kande wi e si taki sma di no de so langa na ini a kondre e syen pikinso èn den no wani bumui nanga tra sma. A kan taki fu di den pôti noso fu di den kweki na wan tra fasi, meki den e firi leki den lagi moro sma fu wan tra ras noso fu wan tra kondre. Dati meki wi no musu wakti, ma wi musu go taki den odi èn aksi den fa a e go nanga den. Efu yu abi a JW Language app na ini yu tongo, dan dati kan yepi yu fu leri fa fu taki den sma disi odi na ini den eigi tongo.​—Leisi Filipisma 2:3, 4.

 ¹⁴ Kande yu e syen fu go taki nanga sma fu wan tra ras noso kulturu. San yu kan du fu no syen so furu? Yu kan fruteri den wan sani fu yusrefi. Te yu du dati, dan yu o si taki yu nanga den no e difrenti so furu èn taki ala ras noso kulturu abi en bun sei nanga en takru sei.

15. San kan yepi wi fu kon frustan fa trakondre sma e firi?

¹⁵ Efu yu wani meki sma di kon na ini yu gemeente firi leki den de na oso, dan a bun fu aksi yusrefi: ’Efu mi ben de na ini wan tra kondre, fa mi ben o wani taki sma libi nanga mi?’ (Mat. 7:12) Hori pasensi nanga sma di musu kon gwenti a kondre fu yu. Na a bigin, wi no o frustan kande fa den e denki noso fu san ede den e du son sani. Ma fu san ede wi no e teki den leki fa den de, na presi fu fruwakti taki den musu kon gwenti wi kulturu?​—Leisi Romesma 15:7.

16, 17. (a) San wi kan du fu leri sabi sma fu wan tra kulturu noso ras? (b) San wi kan du fu yepi sma fu tra kondre di kon na ini wi gemeente?

¹⁶ Te wi kon sabi moro fu a kondre nanga a kulturu fu trakondre sma, dan a o moro makriki gi wi fu taki nanga den. Te wi e hori na Osofamiri Anbegi, dan kande wi kan leisi sani fu a kondre noso a kulturu fu wan trakondre sma di kon na ini wi gemeente. Wan tra sani di wi kan du fu kon sabi den moro bun, na fu kari den kon nyan na wi oso. Yehovah ’opo a pasi gi den trakondre sma so taki den kan teki a bribi tu’. Sobun, meki wi srefi opo wi oso gi trakondre sma „di abi a srefi bribi leki wi”.​—Tori 14:27; Gal. 6:10; Yob 31:32.

¹⁷ Te wi e meki muiti fu kon sabi wan osofamiri di komoto fu wan tra kondre, dan wi o si omeni muiti den musu du fu kon gwenti a kulturu fu wi. Ma wi o si tu taki den abi yepi fanowdu fu leri a  tongo fu wi. Kande wi kan yepi den tu fu seti papira tori so taki den kan feni wan oso noso wan wroko. Te wi e sori switifasi gi den sma disi di e dini Yehovah, dan den o warderi dati srefisrefi.​—Odo 3:27.

18. Fa sma fu trakondre kan teki na eksempre fu Rut?

¹⁸ Na a tra sei, sma fu tra kondre musu meki muiti tu fu fiti densrefi na den gwenti fu a nyun kondre. Na ini a tori disi, Rut gi wi wan moi eksempre. A fosi sani di a du, na taki a sori lespeki gi den gwenti fu a nyun kondre èn dati meki a aksi primisi fu piki a nyanyan di tan na baka (Rut 2:7). A ben frustan taki sma no ben fruplekti fu du bun gi en, ma taki na bun-ati den sori en. Boiti dati, a taigi den tangi gi den bun di den du gi en (Rut 2:13). Te sma fu tra kondre e sori den moi fasi disi, dan a kan taki den sma fu a nyun kondre pe den de, o lespeki den èn brada nanga sisa o du dati tu.

19. Fu san ede wi wani gi trakondre sma wan switikon?

¹⁹ Wi breiti taki Yehovah e sori bun-ati èn taki a e opo a pasi gi sma fu ala kulturu noso ras fu yere a bun nyunsu. Kande den sma disi no ben o man studeri Bijbel noso go na den konmakandra fu Yehovah pipel efu den ben de na ini a kondre fu den. Ma now den abi na okasi fu kon makandra nanga wi èn dati meki wi musu yepi den fu firi switi na wi mindri. Kande wi no abi furu moni noso kande wi no man yepi den nanga ala sani. Ma te wi e sori switifasi gi den, dan wi e sori lobi neleki Yehovah. Sobun, meki wi „teki na eksempre fu Gado” èn du ala san wi man fu gi trakondre sma wan switikon.​—Ef. 5:1, 2.