1. San na wan tu fu den sani di Yesus gi libisma?

 NOWAN ENKRI libisma oiti du moro leki Yesus fu yepi trawan. Di Yesus ben de na grontapu, a ben gwenti du wondru fu yepi sma (Luk. 9:12-17). A moro bigi kado di Yesus gi wi, na a libi fu en (Yoh. 15:13). Sensi di Yesus kisi wan opobaka, a tan yepi wi. Neleki fa a ben pramisi, a aksi Yehovah fu gebroiki en santa yeye fu gi wi leri èn fu trowstu wi (Yoh. 14:16, 17; 16:13). Èn Yesus e gebroiki den gemeente konmakandra, fu gi wi san wi abi fanowdu fu man meki disipel na heri grontapu.​—Mat. 28:18-20.

2. Suma na den „mansma di abi spesrutu koni”, soleki fa Efeisesma 4:7, 8 e sori?

² Meki wi poti prakseri now na wan tra sani di Yesus ben du gi wi. Na apostel Paulus ben skrifi taki baka di Yesus opo go na hemel, dan a „gi a gemeente mansma di abi spesrutu koni”. (Leisi Efeisesma 4:7, 8). Paulus taki dati Yesus ben gi wi den man disi fu yepi a gemeente na difrenti fasi (Ef. 1:22, 23; 4:11-13). Na ini a ten disi, den „mansma di abi spesrutu koni” na dinari ini a diniwroko, gemeente owruman, nanga kring-owruman. a A no de fu taki dati den man disi na sondusma, sobun, den e meki fowtu (Yak. 3:2). Ma tòg wi Masra Yesus Krestes e gebroiki den fu yepi wi.

3. Ferklari fa wi alamala kan horbaka gi a wroko di den „mansma di abi spesrutu koni” e du.

³ Yesus ben gi den „mansma di abi spesrutu koni” a prenspari frantwortu fu tranga a gemeente (Ef. 4:12). Ma wi alamala kan yepi den fu du a prenspari wroko disi. A de neleki te wi e bow wan Kownukondre zaal. Son sma e du bow-wroko.  Trawan e horbaka gi a wroko fu di den e tyari n’nyan gi den wrokoman, noso fu di den e yepi na tra fasi. Na so a de tu taki wi alamala kan taki noso du sani di e yepi den dinari ini a diniwroko, den owruman, nanga den kring-owruman fu tranga a gemeente. Meki wi go luku now fa wi kan kisi wini fu a tranga wroko di den brada disi e du èn fa wi kan sori warderi gi den èn so srefi gi Yesus di gi wi den mansma disi.

DINARI INI A DINIWROKO E „YEPI TRAWAN”

4. San na wan tu fasi fa den dinari ini a diniwroko ben e „yepi trawan” na ini a ten fu den fosi Kresten?

⁴ Na ini a fosi yarihondro, wan tu brada ben kisi a frantwortu fu de dinari ini a diniwroko (1 Tim. 3:8). Den man disi ben e „yepi trawan”, soleki fa Paulus ben skrifi na ini 1 Korentesma 12:28. A de krin taki dinari ini a diniwroko ben e du wan lo prenspari wroko so taki den owruman ben kan poti prakseri na a wroko di den ben musu du fu gi sma leri èn fu luku den skapu. Fu eksempre, a kan taki dinari ini a diniwroko ben e yepi fu meki kopi fu den buku fu Bijbel, noso kande den ben e bai den sani di ben de fanowdu fu meki den kopi disi.

5. San na wan tu fasi fa den dinari ini a diniwroko e yepi trawan na ini a ten disi?

⁵ Kow poti prakseri na wan tu fu den prenspari sani di dinari ini a diniwroko e du na ini a gemeente fu yu (1 Petr. 4:10). Kande den kisi a frantwortu fu sorgu gi den moni-afersi fu a gemeente, noso gi a gebied fu a gemeente. Kande den musu bestel buku nanga tijdschrift gi a gemeente, kande den musu sorgu gi geluid nanga felem, kande den musu sori sma pe den kan sdon, noso kande den musu yepi fu hori a Kownukondre zaal bun. Ala den wroko disi musu du so taki den gemeente kan drai bun (1 Kor. 14:40). Boiti dati, son dinari ini a diniwroko e hori lezing tu na a Wi Kresten libi nanga a preikiwroko konmakandra èn den e hori publiki taki. Wan dinari ini a diniwroko kan kisi a frantwortu tu fu horbaka gi wan grupu-opziener. Èn son leisi, dinari ini a diniwroko e go tu nanga den owruman fu luku den skapu.

6. San na wan tu reide fu san ede wi e warderi a tranga wroko di den dinari ini a diniwroko e du?

⁶ San son brada nanga sisa taki fu a wroko di den dinari ini a diniwroko e du? Beverly b, wan sisa di e tan na ini Bolifia, e taki: „Tangi fu den dinari ini a diniwroko meki mi man nyan bun fu den konmakandra. Na fu di den e du a wroko fu den bun, meki mi man singi, mi man gi piki, mi man arki lezing, èn mi man leri wan sani fu den felem nanga den prenki. Den e sorgu taki wi de veilig na ini a zaal èn den e yepi den wan di no man kon na den konmakandra fu luku a programa nanga yepi fu Internet. Baka a konmakandra, den e yepi krin a zaal, den e teri a moni di sma gi leki bijdrage, èn den e sorgu taki wi e kisi den buku nanga den tijdschrift di wi abi fanowdu. Mi breiti nanga den trutru.” Leslie e libi na ini Kolombia èn a masra fu en na wan owruman. A e taki: „Mi masra abi a yepi fu den dinari ini a diniwroko fanowdu. Sondro den, a ben o abi moro wroko fu du èn dati meki mi de nanga tangi taki den de fayafaya èn taki den de klarklari fu yepi nanga a wroko.” A no de fu taki dati wi alamala de nanga tangi gi den wroko di den dinari ini a diniwroko e du.​—1 Tim. 3:13.

7. Fa wi kan sori taki wi e warderi den dinari ini a diniwroko? (Luku a prenki.)

⁷ Te wi de nanga tangi gi den sani di den dinari ini a diniwroko e du, dan dati bun. Ma Bijbel e taki tu: „Sori taki unu de nanga tangi” (Kol. 3:15). Luku fa Kristof, wan owruman na ini Fensikondre e sori den dinari  ini a diniwroko taki a de nanga tangi gi san den e du. A e taki: „Mi e seni wan karta noso wan app gi den fu gi den dek’ati nanga wan Bijbeltekst. Mi e taki krin tu fa a dinari ini a diniwroko ben de wan dek’ati gi mi, noso fu san ede mi e warderi a wroko di a e du.” Pascal nanga Jael, di e libi na ini Nyun Kaledonia, e begi spesrutu gi den dinari ini a diniwroko. Pascal e taki: „Den dei disi, wi begi furu gi wan lo fu den dinari ini a diniwroko. Wi taigi Yehovah taki wi breiti nanga den èn wi aksi en fu de nanga den èn fu yepi den.” Yehovah e yere den begi dati èn a heri gemeente e kisi wini.​—2 Kor. 1:11.

GEMEENTE OWRUMAN E „WROKO TRANGA NA UN MINDRI”

8. Fu san ede Paulus ben taki dati den owruman na ini a ten fu en ben e „wroko tranga”? (1 Tesalonikasma 5:12, 13)

⁸ Owruman na ini a fosi yarihondro ben e wroko tranga gi a gemeente (Leisi 1 Tesalonikasma 5:12, 13; 1 Tim. 5:17). Den ben e „teki fesi” na ini a gemeente. Disi wani taki dati den ben e hori konmakandra èn den ben e teki besroiti gi a gemeente. Boiti dati, den ben e gi den brada nanga sisa krin rai na wan lob’ati fasi, so taki den ben kan tan abi wan tranga bribi (1 Tes. 2:11, 12; 2 Tim. 4:2). A no de fu taki dati den man disi ben e wroko tranga tu fu sorgu gi den osofamiri èn fu tan bun mati fu Yehovah.​—1 Tim. 3:2, 4; Tit. 1:6-9.

9. San na wan tu frantwortu di owruman abi na ini a ten disi?

⁹ Owruman na ini a ten disi abi furu fu du. Den na preikiman (2 Tim. 4:5). Den de wan bun eksempre gi wi fu di den e teki prati fayafaya na a preikiwroko, den e orga a preikiwroko na ini a kontren fu a gemeente, èn den e leri wi fa fu preiki èn fa fu gi sma leri na a yoisti fasi. Den e dini tu leki krutuman di abi sar’ati èn di no e teki sei. Te wan Kresten du wan seryusu sondu, dan owruman e du muiti fu yepi a sma dati fu tron wan mati baka fu Yehovah. Na a srefi ten, den e du ala san den man fu hori a gemeente krin (1 Kor. 5:12, 13; Gal. 6:1). Ma san moro prenspari, na taki den owruman na skapuman (1 Petr. 5:1-3). Den e hori Bijbel lezing di den sreka bun, èn den e du muiti fu kon sabi ala sma na ini a gemeente èn fu go luku den. Son owruman e yepi tu fu bow Kownukondre zaal èn fu hori den zaal bun, sonwan fu den e yepi orga den kongres, trawan de na ini na At’oso Kontakti Komte noso na ini a Fisiti Grupu gi Sikisma, èn den abi tra frantwortu tu. A no de fu taki dati den owruman e wroko tranga gi wi.

10. San na wan tu reide fu san ede wi e warderi a tranga wroko di den owruman e du?

¹⁰ Yehovah ben taki dati den owruman ben o sorgu bun gi wi, taki wi ’no ben o frede moro, èn taki wi no ben o beifi tu’ (Yer. 23:4). Disi na soifri san Johanna, wan sisa na ini Fensikondre ben ondrofeni baka di en m’ma kon siki seryusu. Johanna e taki: „Mi ben feni en muilek fu ferteri trawan fa mi ben e firi, ma wan owruman di mi no ben sabi so bun ben abi pasensi nanga mi, a begi nanga mi, èn a gi mi a dyaranti taki Yehovah lobi mi. Mi no sabi moro san a taigi mi, ma mi e memre taki mi no ben e broko mi ede moro. Mi e bribi taki Yehovah seni na owruman disi na a yoisti ten fu kon yepi mi.” Fa den owruman na ini yu gemeente yepi yu?

11. Fa wi kan sori taki wi e warderi den owruman? (Luku a prenki.)

¹¹ Yehovah wani taki wi musu warderi den owruman „gi a wroko di den e du” (1 Tes. 5:12, 13). Henrietta di e libi tu na ini Fensikondre, e taki: „Den owruman de klarklari fu yepi trawan, ma disi no wani taki dati den abi moro ten nanga krakti leki  trawan, noso taki den no abi problema na ini den libi. Son leisi mi e taigi den: ’Yu sabi? Yu na wan bun owruman. Mi howpu taki yu sabi dati.’” Sera, wan sisa na ini Torkukondre e taki: „Owruman abi dek’ati fanowdu so taki den kan tan du a wroko fu den. Dati meki a bun te wi e skrifi wan karta gi den, te wi e kari den fu kon nyan na wi oso, noso te wi e wroko nanga den na ini a preikiwroko.” Kande yu abi furu warderi gi a tranga wroko di wan owruman na ini yu gemeente e du. A ben o bun te yu e suku fasi fu sori en taki yu de nanga tangi gi san a e du.​—1 Kor. 16:18.

KRING-OWRUMAN E GI A GEMEENTE DEK’ATI

12. San na wan tra grupu mansma di Yesus ben gi a frantwortu fu tranga den gemeente? (1 Tesalonikasma 2:7, 8)

¹² Yesus ben gi son brada a frantwortu fu yepi a gemeente na wan tra fasi. A gebroiki den owruman na ini Yerusalem fu seni Paulus, Barnabas, nanga trawan fu go luku den difrenti gemeente (Tori 11:22). Fu san ede? Den ben musu du a srefi sani di den dinari ini a diniwroko nanga owruman ben musu du. Den ben musu tranga den gemeente (Tori 15:40, 41). Den man disi ben de klarklari fu du a wroko disi, awinsi san dati ben aksi fu den. Son leisi den ben kan lasi den libi srefi, soso fu man gi sma leri nanga dek’ati.​—Leisi 1 Tesalonikasma 2:7, 8.

13. San na wan tu frantwortu di kring-owruman abi?

¹³ Kring-owruman abi furu fu du. Sonwan fu den e reis omeni kilometer fu go luku den gemeente. Ibri wiki, wan kring-owruman e hori difrenti lezing, a e go luku den brada nanga sisa, a e hori wan pionier konmakandra, wan konmakandra gi den owruman, èn sosrefi preikiwroko konmakandra. A e sreka lezing èn a e orga kring-konmakandra  nanga kongres. A e gi leri na Pionierskoro, a e seti sani fu hori wan spesrutu konmakandra nanga den pionier na ini a kring. Boiti ala den sani disi, a bijkantoro wani taki a kring-owruman e poti prakseri na tra prenspari sani so srefi. Son leisi den sani dati musu du wantewante.

14. San na wan tu reide fu san ede wi de nanga tangi gi a tranga wroko di den kring-owruman e du?

¹⁴ Fa den gemeente e kisi wini fu a prenspari wroko di den kring-owruman e du? Luku san wan brada na ini Torkukondre ben taki fu den kring-owruman di ben e kon luku a gemeente fu en: „Ibri leisi te den e kon luku a gemeente, den e gi mi dek’ati fu gebroiki moro fu mi ten fu yepi den brada nanga sisa. Mi leri sabi furu kring-owruman, ma noiti wan fu den gi mi a firi taki den no ben wani taki nanga mi noso taki den no ben abi ten gi mi.” Johanna, di wi ben kari kba, ben e wroko nanga wan kring-owruman na ini a preikiwroko, ma den no miti nowan sma na oso. A e taki: „Tòg mi no o fergiti a dei dati noiti. Na a pisi ten dati, den tu sisa fu mi ben froisi go tan na wan tra presi èn mi ben e misi den trutru. A kring-owruman gi mi dek’ati na wan lob’ati fasi èn a yepi mi fu kon si taki nownowde a kan taki wi no o man libi krosbei fu wi famiri nanga mati. Ma na ini a nyun grontapu, wi o abi furu okasi fu de makandra.” Furu fu wi kon lobi den kring-owruman fu wi èn wi de nanga tangi gi a fasi fa den yepi wi.​—Tori 20:37–21:1.

15. (a) Soleki fa 3 Yohanes 5-8 e sori, dan fa wi kan sori taki wi e warderi den kring-owruman? (Luku a prenki.) (b) Fu san ede wi musu sori taki wi e warderi den wefi fu den brada di e wroko tranga na ini a gemeente? (Luku a faki: „ No fergiti den wefi fu den”.)

¹⁵ Na apostel Yohanes ben gi Gayus dek’ati fu gi den brada di ben e kon luku a gemeente wan switikon. A ben musu ’sorgu den te den ben e gowe baka èn a ben musu  dati na wan fasi di Gado feni bun’. (Leisi 3 Yohanes 5-8). Wán fasi fa wi kan du dati, na te wi e kari a kring-owruman fu kon nyan na wi oso. Wan tra fasi fa wi kan du dati, na te wi e go na a preikiwroko konmakandra te a kon luku a gemeente. Leslie, di wi ben kari kba, e du tra sani fu sori taki a e warderi den kring-owruman. A e taki: „Mi e begi taki Yehovah e gi den san den abi fanowdu. Mi nanga mi masra seni brifi tu gi den èn wi taigi den fa den ben de wan dek’ati gi wi di den kon luku a gemeente.” Hori na prakseri taki kring-owruman abi den eigi problema èn den e kon weri neleki wi. Son leisi den e siki, den e broko den ede, èn a kan srefi taki den e firi brokosaka. Kande yu kan taigi yu kring-owruman wan tu sani fu gi en dek’ati, noso kande yu kan gi en wan pkin kado. Yu no sabi efu na so Yehovah o piki a begi fu a kring-owruman disi.​—Odo 12:25.

WI ABI MANSMA FANOWDU „DI ABI SPESRUTU KONI”

16. Sortu sani Kresten brada ben kan aksi densrefi soleki fa Odo 3:27 e sori?

¹⁶ Na heri grontapu, wi abi moro brada fanowdu fu dini leki „mansma di abi spesrutu koni”. Efu yu na wan dopu brada, dan yu denki taki yu kan dini leki wan fu den mansma disi? (Leisi Odo 3:27.) Yu de klarklari fu meki muiti fu tron wan dinari ini a diniwroko? Efu yu na wan dinari kba, dan yu de klarklari fu du muiti fu tron owruman? c Yu man tyari kenki kon na ini yu libi so taki yu kan gi yu nen fu go na a Skoro gi Kownukondre preikiman? A skoro dati o train yu so taki Yesus kan gebroiki yu moro bun. Efu yu feni taki yu no man du den sani disi, dan begi Yehovah fu yepi yu. Aksi en fu gi yu en santa yeye so taki yu man du iniwan wroko di yu e kisi.​—Luk. 11:13; Tori 20:28.

17. San a tranga wroko fu den „mansma di abi spesrutu koni” e sori fu wi Kownu, Krestes Yesus?

¹⁷ A tranga wroko fu den brada di Yesus poti leki „mansma di abi spesrutu koni”, e sori taki Yesus e tiri wi na ini den lasti dei disi (Mat. 28:20). Yu no de nanga tangi taki wi abi wan Kownu di lobi wi, di sabi san wi abi fanowdu, èn di e gi wi brada fu yepi wi? Efu yu de nanga tangi, dan suku okasi fu sori taki yu e warderi den man disi di e wroko tranga. Èn noiti no fergiti fu taigi Yehovah tangi, fu di en na a Sma di e gi „Ibri bun presenti nanga ibri kado di bun dorodoro” (Yak. 1:17).