1. San e kon na ini yu prakseri te yu e denki fu Yehovah?

 OITI yu aksi yusrefi fa Yehovah de? Te yu e taki nanga en na ini begi, san e kon na ini yu prakseri? Wi no man si Yehovah, ma Bijbel e kari en difrenti sani soleki wan „son” nanga wan „skelt” èn sosrefi „wan faya di e bron sani krinkrin” (Ps. 84:11; Hebr. 12:29). Esekièl ben ferteri taki Yehovah ben de na ini wan fisyun leki brenki gowtu di moksi nanga solfru, a ben sdon na tapu wan kownusturu fu safir-ston, èn wan brenki leti ben de na en lontu di ben gersi wan alenbo (Esek. 1:26-28). Sonwan fu den sani disi kan meki wi ferwondru, noso den kan meki wi firi leki wi no warti noti.

2. San kan meki en muilek gi wi fu kon krosbei na Yehovah?

² Fu di wi no man si Yehovah, meki wi kan feni en muilek fu bribi taki a lobi wi. Kande a tranga gi wi fu bribi taki Yehovah lobi wi, fu di wi ondrofeni takru sani na ini wi libi. Kande wi no firi a lobi fu wan papa. Yehovah e ferstan fa wi e firi èn a sabi fu san ede a kan muilek gi wi fu kon krosbei na en. Nanga yepi fu en Wortu, Bijbel, a e meki wi kon sabi taki a de wan lob’ati Gado.

3. Fu san ede wi musu leri moro fu a lobi fu Yehovah?

³ A wortu di e yepi wi fu ferstan fa Yehovah de, na lobi. Bijbel e taki dati „Gado na lobi” (1 Yoh. 4:8). Ala san a e du na fu di a lobi wi. Gado abi so furu lobi taki a no e sori a lobi dati soso gi den wan di lobi en, ma a e sori en tu gi sma di no lobi en. Boiti dati, a lobi fu en tranga srefisrefi (Mat. 5:44, 45). Ini na artikel disi wi o luku moro fini fa Yehovah de èn fa a e sori lobi. O moro wi e leri sabi wi Gado, o moro wi o lobi en.

 YEHOVAH LOBI WI TRUTRU

4. Fa a lobi fu Yehovah e meki yu firi? (Luku a prenki.)

⁴ „Yehovah lobi sma trutru” (Yak. 5:11). Na ini Bijbel a e agersi ensrefi nanga wan lob’ati mama (Yes. 66:12, 13). Prakseri wan mama di e sorgu en yongu pkin na wan lob’ati fasi. A mama e poti en sdon na tapu en bowtu èn a e taki sani fu trowstu a pkin. Te a pkin e krei noso te a abi pen, dan a mama e sorgu taki a e kisi san a abi fanowdu. Te sani e trobi wi, dan wi kan de seiker taki Yehovah o sori taki a lobi wi. A psalm skrifiman skrifi: „Di den prakseri fu mi di ben e trobi mi, ben kon hebi gi mi, dan na yu ben e trowstu mi, so taki mi ben man prisiri baka.”​—Ps. 94:19.

5. San a lobi fu Yehovah wani taki gi yu?

⁵ Yehovah e tai hori na wi (Ps. 103:8). A no o tapu fu sori lobi gi wi efu wi meki wan fowtu. Someni leisi a pipel fu Israel ben meki Yehovah firi sari. Ma te a pipel fu en ben sori berow, dan a ben gi den a dyaranti taki a lobi den ete. Fu eksempre a ben taigi den: „Fu di mi e si unu leki wan gudu, meki mi e lespeki unu èn mi lobi unu” (Yes. 43:4, 5). Gado abi a srefi lobi gi wi na ini a ten disi. Wi kan de seiker dati a o sori dati gi wi tu. Srefi efu wi meki bigi fowtu, Yehovah no o drai baka gi wi. Efu wi abi berow èn wi e drai go baka na Yehovah, dan wi o si taki a lobi wi ete. A e pramisi taki ’a o gi wi pardon nanga en heri ati’ (Yes. 55:7). Bijbel e taki dati te wi kisi pardon, dan ’Yehovah sa gi wi krakti’.​—Tori 3:19.

6. San Sakaria 2:8 e leri wi fu Yehovah?

⁶ Leisi Sakaria 2:8. Fu di Yehovah lobi wi, meki a man ferstan wantewante fa wi e firi èn a de klarklari fu kibri wi. Te wi e sari, dan a e sari tu. Dati meki wi kan de seiker taki a o piki wi te wi e begi en: „Kibri mi leki a popki fu yu ai” (Ps. 17:8). Den ai fu wi prenspari srefsrefi èn wi man firi wantewante te wan sani de na ini wi ai. Sobun, te Yehovah e agersi wi nanga a popki fu en ai, dan a de neleki a e taki: ’Efu wan sma e du ogri nanga yu, mi pipel, dan a e du ogri nanga wan sani di prenspari gi mi trutru.’

7. Fu san ede wi musu kon abi moro fertrow taki Yehovah lobi wi?

⁷ Yehovah wani taki wi sabi taki a lobi  ibriwan fu wi. Ma a sabi taki sani di yu ben ondrofeni na ini yu libi, kan meki yu aksi yusrefi efu Gado kan lobi wan sma leki yu. Noso kande yu de na ini wan situwâsi now di e meki en muilek gi yu fu bribi taki Yehovah lobi yu. San o yepi wi fu kon abi moro fertrow taki Yehovah lobi wi? Na te yu e kon sabi fa Yehovah e sori lobi gi Yesus, gi den salfuwan, èn gi wi alamala.

A FASI FA YEHOVAH E SORI LOBI

8. Fu san ede Yesus ben sabi seiker taki en Papa lobi en?

⁸ Langa ten fosi Yehovah ben meki tra sani na hemel èn na grontapu, en nanga en Manpkin ben de makandra. Na ini den milyardmilyard yari di den ben de makandra na hemel, den kon abi furu lobi gi makandra. Yehovah ben taki krin dati a lobi Yesus, soleki fa wi kan leisi na Mateyus 17:5. Yehovah ben kan taki gewoon: ’Disi na a wan di mi feni bun.’ Ma fu di a ben wani taki wi sabi o furu a lobi Yesus, meki a kari en „mi Manpikin, a lobiwan”. Yehovah ben breiti srefsrefi nanga Yesus, spesrutu fu di a ben de klarklari fu gi en libi leki lusu-paiman (Ef. 1:7). Èn Yesus no ben e tweifri taki en Papa lobi en. A ben de seiker taki en Papa lobi en èn ibri tron baka den sani di a ben e taki ben e sori taki dati de so trutru.​—Yoh. 3:35; 10:17; 17:24.

9. San e sori taki Yehovah lobi den salfuwan? Ferklari dati. (Romesma 5:5)

⁹ Yehovah e taki tu dati a lobi den salfuwan. (Leisi Romesma 5:5.) Na ini Grikitongo a vers disi e sori taki a lobi fu Yehovah tranga so te taki wi kan agersi en nanga a watra di e lon na ini wan sula. Dati na trutru wan moi agersitori fu sori o furu lobi Gado abi gi den salfuwan. Den salfuwan sabi taki Gado lobi den (Yud. 1). Na apostel Yohanes ferteri fa den ben e firi di a skrifi: „Luku fa a Tata lobi wi! A kari wi pikin fu Gado” (1 Yoh. 3:1). Ma a de so taki Yehovah lobi soso den salfuwan? Nôno, Yehovah sori taki a lobi wi alamala.

10. San na a moro bigi beweisi taki Yehovah lobi yu?

¹⁰ San na a moro bigi beweisi taki Yehovah lobi wi? Dati na a lusu-paiman. Nowan tra sma na hemel noso grontapu sori so furu lobi leki Yehovah! (Yoh. 3:16; Rom. 5:8) Yehovah seni en lobi Manpkin fu dede gi ala libisma so taki wi kan kisi pardon fu den sondu fu wi èn tron mati fu En (1 Yoh. 4:10). Te wi e denki dipi fu san Yehovah nanga Yesus du, dan wi o ferstan moro bun o furu den lobi ibriwan fu wi (Gal. 2:20). Yehovah no meki Yesus pai a lusu-paiman soso fu di a ben wani seti sani kon reti baka. Ma a du dati fu di a lobi wi. Yehovah sori taki a lobi wi trutru di a meki en lobi Manpkin Yesus gi en libi fu a bun fu wi. Fu taki en leti, Yehovah gi pasi taki en Manpkin pina èn dede gi wi.

11. San wi kan leri fu Yeremia 31:3?

¹¹ Soleki fa wi si, dan den sani di Yehovah du gi wi e sori wi krin taki a lobi wi. Ma Yehovah e taigi wi tu o furu a lobi wi. (Leisi Yeremia 31:3.) Yehovah hari wi kon na en fu di a lobi wi. (Luku Deuteronomium 7:7, 8.) Nowan sani èn nowan sma kan prati wi fu a lobi dati (Rom. 8:38, 39). Fa a lobi di Yehovah abi gi yu e meki yu firi? Leisi Psalm 23, dan luku fa a lobi fu Yehovah ben meki David firi èn fa a kan meki yu firi.

FA A LOBI DI YEHOVAH ABI GI YU E MEKI YU FIRI?

12. Ferteri syatu san skrifi na ini Psalm 23.

¹² Leisi Psalm 23:1-6. Na ini Psalm 23 David e sori taki a e bribi taki Yehovah  lobi en èn taki a e sorgu gi en. A e taki fu a lobi di en nanga en Skapuman, Yehovah abi gi makandra. David ben sabi taki ogri no ben o miti en efu a ben meki Yehovah tiri en, èn a ben fertrow dorodoro na En tapu. David ben sabi taki Yehovah ben o sori lobi gi en ibri dei fu en libi. San meki taki a ben bribi dati?

13. Fu san ede David ben de seiker taki Yehovah ben o sorgu gi en?

¹³ „Mi no sa mankeri noti.” David ben feni taki Yehovah ben e sorgu en bun fu di a no ben e mankeri noti. David ben sabi taki Yehovah ben de en mati èn taki Yehovah ben feni en bun. Dati meki a ben de seiker taki awinsi san ben o psa nanga en, Yehovah ben o tan gi en ala san a ben abi fanowdu. Fu di David ben de seiker taki Yehovah lobi en èn taki a ben o sorgu gi en, meki David no ben e broko en ede, ma na presi fu dati a ben de koloku èn tevrede.​—Ps. 16:11.

14. Fa Yehovah kan sorgu na wan lob’ati fasi gi wi?

¹⁴ Yehovah e sorgu na wan lob’ati fasi gi wi, spesrutu te ogri sani e psa na ini wi libi. Claire, a di wroko moro leki 20 yari langa na Betel, no ben sabi fa a ben musu yepi en famiri di den kisi a wan bigi problema baka a trawan. Brudu naki en papa, den brada puru wan fu den sisa fu en fu a gemeente, èn en famiri lasi a pkin bisnis nanga na oso fu den fu di den ben abi moni problema. Fa Yehovah sori lobi gi den? Claire e taki: „Yehovah sorgu taki mi famiri ben kisi san den ben abi fanowdu ibri dei. Ibri leisi baka Yehovah gi wi moro leki san wi ben abi fanowdu srefi. Furu tron mi e prakseri fa Yehovah yepi wi èn noiti  mi o fergiti a lobi di a sori wi na den momenti dati. Fu di mi ben hori den sani disi na prakseri, meki dati yepi mi fu tan dini Yehovah nanga prisiri di mi kisi tra problema na ini mi libi.”

15. San ben yepi David fu kisi krakti baka? (Luku a prenki.)

¹⁵ „A e meki mi kisi krakti baka.” Son leisi den problema nanga tesi di ben e miti David, ben meki a firi brokosaka (Ps. 18:4-6). Ma a kisi krakti baka fu di Yehovah sori lobi gi en èn a sorgu gi en. Yehovah ben tyari en mati go na „wei pe furu grasi e gro” èn na „presi pe furu watra e lon”. Disi yepi David fu kisi krakti baka èn a ben man tan dini Yehovah nanga prisiri.​—Ps. 18:28-32.

16. Fa a lobi fu Yehovah e gi yu krakti baka?

¹⁶ Na so a de tu na ini a ten disi. A lobi fu Yehovah e meki taki wi man hordoro awinsi sortu problema nanga tesi e miti wi (Sari 3:22; Kol. 1:11). Luku na eksempre fu Rachel. A ben brokosaka srefsrefi di en masra gwe libi en nanga Yehovah sosrefi na a pisi ten fu a COVID-19 siki. San Yehovah du gi Rachel? A e taki: „Yehovah sorgu taki mi firi a lobi fu en. A sorgu taki mi ben abi mati di ben e meki ten gi mi, den ben e tyari n’nyan gi mi, den ben e seni moi app nanga Bijbeltekst fu gi mi deki’ati, den ben e lafu nanga mi, èn den ben e tan memre mi taki Yehovah ben e sorgu gi mi. Mi e taki Yehovah tangi doronomo taki a gi mi wan bigi famiri di lobi mi.”

17. Fu san ede David no ben e „frede nowan ogri”?

¹⁷ „Mi no e frede nowan ogri, bika yu de nanga mi.” Nofo tron David ben de na ini situwâsi pe a ben kan lasi en libi èn a ben abi furu feanti di ben tranga srefsrefi. Ma fu di a ben sabi taki Yehovah ben lobi en, meki a ben de seiker taki Yehovah ben o kibri en. David ben firi taki Yehovah ben de nanga en na ini ibri situwâsi èn dati meki a ben firi korostu. Fu dati ede a ben kan singi: „[Yehovah] meki taki mi no ben frede moro” (Ps. 34:4). Son leisi David ben frede srefsrefi, ma fu di a ben sabi taki Yehovah lobi en, meki a no ben frede moro.

18. Fa a lobi fu Yehovah kan gi yu krakti te yu frede?

¹⁸ Fa a lobi fu Yehovah e gi wi krakti te wi e frede? Wan pionier sisa di nen Susi e  ferteri fa en nanga en masra ben e firi di a boi fu den kiri ensrefi: „Te so wan kfalek sari sani e psa na ini yu libi, dan a kan abi so wan bigi krakti na yu tapu taki yu no sabi moro san fu du èn yu kan frede taki moro ogri sani o psa. Ma a lobi fu Yehovah meki wi firi korostu.” Rachel, di wi ben kari kba, e memre ete san ben psa wan neti. A e taki: „Wan neti mi ben e sari srefsrefi. Mi ben e broko mi ede èn mi ben frede, dan mi bari kari Yehovah. Na a srefi momenti dati a trowstu mi, neleki fa wan mama e du nanga en beibi, dan mi fadon na sribi. Noiti mi o fergiti a momenti dati.” Wan owruman di nen Tasos tan fo yari na straf’oso fu di a no ben wani go na ini a legre. Fa Yehovah sori taki a lobi en èn fa a sorgu gi en? A e taki: „Yehovah gi mi moro leki san mi ben abi fanowdu. Disi ben tranga mi bribi taki mi kan fertrow en dorodoro. Straf’oso na wan presi di e meki sma firi sari, ma nanga yepi fu en santa yeye Yehovah meki mi firi prisiri. A sani disi yepi mi fu si taki o moro mi e fertrow na en tapu, o moro mi e firi a lobi fu en. Dati meki mi bigin dini leki gewoon pionier di mi ben de na straf’oso.”

KON KROSBEI NA YU LOB’ATI GADO

19. (a) Fa wi o begi te wi sabi taki Gado lobi wi? (b) San yusrefi feni moi fu a lobi fu Yehovah? (Luku a faki „ Bijbeltekst di e yepi wi fu firi a waran lobi fu Yehovah”.)

¹⁹ Ala den ondrofenitori di wi luku e sori taki Yehovah, „a Gado fu lobi”, de nanga wi! (2 Kor. 13:11) A e broko en ede nanga ibriwan fu wi. Wi de seiker taki Yehovah e ’sori wi bun-ati’ fu di a lobi wi (Ps. 32:10). O moro wi e prakseri fa a sori lobi gi wi, o moro wi e si fa a e broko en ede nanga wi. Disi e hari wi kon moro krosibei na en. Wi kan begi en sondro fu frede èn wi kan ferteri en taki wi abi a lobi fu en tranga fanowdu. Wi kan taki nanga en fu ala sani di e gi wi broko-ede, fu di wi de seiker taki a e frustan wi èn taki a de klarklari fu yepi wi.​—Ps. 145:18, 19.

20. Fa a lobi fu Yehovah e hari wi kon krosbei fu en?

²⁰ Neleki fa wan faya e waran wi skin tapu wan kowru dei, na so a waran lobi fu Yehovah kan trowstu wi te wi kisi problema nanga tesi. Sobun de nanga prisiri fu di Yehovah lobi yu. Èn meki wi alamala bari: „Mi lobi Yehovah”!​—Ps. 116:1.