Aladi a fiti taki wan Kresten e du san de fanowdu fu sorgu taki ogri no miti en, toku a musu hori ensrefi na den leri fu Bijbel. Bijbel e sori taki a no de wan koni sani fu abi gon noso tra sortu fetisani fu sutu tapu trawan di wani du ogri nanga wi. Luku wan tu sani di kan yepi wi fu teki wan bun bosroiti:

Gi Yehovah, libi na wan santa sani, spesrutu a libi fu wan libisma. A psalm skrifiman David ben sabi taki Yehovah „na a sma di e gi libi” (Ps. 36:9). Sobun, efu wan Kresten e du san de fanowdu fu kibri ensrefi noso den gudu fu en, dan a musu luku bun taki a no kiri wan sma, so taki a no kisi brudu-paiman.​—Deut. 22:8; Ps. 51:14.

A no de fu taki dati iniwan sani di wan sma e gebroiki fu kibri ensrefi kan meki taki a kisi brudu-paiman. Ma a moro makriki fu kiri wan sma nanga wan gon, awansi a no fu espresi. * Boiti dati, wan sma di wani du ogri nanga wan trawan, nofo tron e senwe kaba. Efu a e si taki a trawan abi wan gon, dan a situwâsi kan kon moro ogri èn dede kan fadon.

A lasti neti di Yesus ben de na grontapu, a taigi den bakaman fu en fu bai wan feti-owru. Ma den no ben musu gebroiki a feti-owru fu kibri densrefi (Luk. 22:36, 38). Na presi fu dati, Yesus meki den tyari wan feti-owru kon fu leri den wan sani. Den no ben musu du ogri, awansi sma ben e kon na den  tapu nanga fetisani (Luk. 22:52). Di Petrus gebroiki wan feti-owru fu du ogri nanga a srafu fu a granpriester, dan Yesus taigi en: „Poti yu feti-owru na en presi baka”. Baka dati, Yesus taki wan prenspari sani di e yepi den bakaman fu en te na a dei fu tide. A ben taki: „A sma di e teki a feti-owru, na a feti-owru o kiri en.”​—Mat. 26:51, 52.

Soleki fa Mika 4:3 e sori, dan a pipel fu Gado e „naki den feti-owru kon tron plugu èn den lansri kon tron grasinefi”. A sani disi di tru Kresten e du e kruderi nanga a rai di na apostel Paulus ben gi nanga yepi fu santa yeye. A ben taki: „Te wan sma du unu wan ogri, un no musu du a sma dati ogri baka. . . . Du ala san yu man fu libi bun nanga ala sma” (Rom. 12:17, 18). Furu tesi ben miti Paulus. Ma srefi di ’fufuruman ben suku fu du en ogri’, a ben hori ensrefi na a sani di a ben taki. Noiti a pasa den wet fu Gado soso fu man kibri ensrefi (2 Kor. 11:26). Na presi fu dati, a frutrow tapu Gado èn tapu a koni di de fu feni na ini a Wortu fu en. A koni dati „betre moro fetisani”.​—Preik. 9:18.

Gi Kresten, a libi prenspari moro gudu. „Den sani di [wan man] abi no kan gi en libi” (Luk. 12:15). Sobun, efu wan fufuruman di abi wan gon de nomonomo fu du ogri awansi yu taki switi nanga en, dan yu e du bun fu gi yesi na a sani disi di Yesus ben taki: „No feti nanga wan ogri sma.” Kande yu o abi fu gi a fufuruman den sani di a wani (Mat. 5:39, 40; Luk. 6:29). * A no de fu taki dati a moro bun fu sorgu taki den sani disi no e pasa. Efu wi no e ’prodo nanga den gudu di wi abi’ èn efu den birtisma sabi wi leki Kotoigi fu Yehovah di lobi freide, dan a no o pasa so makriki taki ogrisma o suku fu du ogri nanga wi.​—1 Yoh. 2:16; Odo 18:10.

Kresten e lespeki a konsensi fu trawan (Rom. 14:21). Efu sma kon sabi taki wan sma na ini a gemeente abi wan gon fu kibri ensrefi teige trawan, dan a sani disi kan skreki son brada nanga sisa. Kande den o naki futu srefi. A kan taki lanti e gi wi a reti fu abi wan gon. Ma efu wi lobi wi brada nanga sisa, dan noiti wi o wani du wan sani di kan meki den naki futu.​—1 Kor. 10:32, 33; 13:4, 5.

Kresten wani de wan bun eksempre gi trawan (2 Kor. 4:2; 1 Petr. 5:2, 3). Efu wan Kresten e tan hori wan gon fu kibri ensrefi teige trawan, aladi a kisi rai fu no du dati, dan a no o de wan bun eksempre gi trawan. Dati meki a no o kisi spesrutu frantwortu na ini a gemeente. Na so a de tu nanga wan Kresten di abi wan gon fu di a wroko fu en e aksi dati. Te dati de so, dan a moro bun fu suku wan tra wroko! *

Neleki fa wan Kresten srefi musu bosroiti fa a o kibri ensrefi, en osofamiri, noso den gudu fu en, na so en srefi musu bosroiti sortu wroko a o du. Ma den leri fu Bijbel e sori taki Gado koni èn taki a lobi wi. Fu di lepi Kresten e lespeki den leri dati, meki den no abi wan gon fu kibri densrefi teige tra sma. Den sabi taki a wan-enkri fasi fa sani o waka bun trutru nanga sma, na te den e hori densrefi na den leri fu Bijbel. Na so den e sori taki den e frutrow tapu Gado.​—Ps. 97:10; Odo 1:33; 2:6, 7.