Abi bribi neleki den

„Luku! Na uma-srafu fu Yehovah!”

DI WAN man kon na ini na oso fu Maria, dan Maria opo en ede luku a man disi, èn a ben fruwondru fu si en. A man no aksi fu en papa noso en mama. A man ben kon na en! Maria ben de seiker taki a man disi no ben de fu Nasaret. Na ini a pikin foto pe Maria ben e tan, a ben makriki fu sabi efu wan sma ben de fu wan tra presi. Awansi pe a man disi ben o go, a ben o de tra fasi leki iniwan sma. A taki nanga Maria na wan heri tra fasi leki fa sma ben gwenti fu taki nanga en. A man disi ben taki: „Odi, yu di kisi wan bigi grani, Yehovah de nanga yu.”—Lukas 1:28.

Na so Bijbel e bigin taki fu Maria, na umapikin fu Eli, di ben e libi na ini a foto Nasaret, na Galilea. Fu taki en leti, a fosi leisi te Bijbel e taki fu Maria, dan Maria musu teki wan tu prenspari bosroiti. A ben meki mofo fu trow nanga a temreman Yosef. A man disi no ben gudu, ma a ben e dini Gado na wan getrow fasi. Sobun, a ben gersi leki a libi fu Maria ben seti kaba. A ben o tron a wefi fu Yosef, a ben o horibaka gi en, èn a ben o kisi pikin nanga en. Ma wantronso, wan man kon na en fu taigi en taki a Gado fu en ben o gi en wan wroko, noso wan frantwortu di ben o kenki en libi.

Kande a sa fruwondru yu taki Bijbel no e fruteri wi furu fu Maria. Bijbel no e taki furu fu a fasi fa a kweki, a no e taki furu fu den fasi fu en, èn a no e taki srefisrefi fa a ben tan. Ma a no de fu taki dati den sani di Gado Wortu e fruteri wi fu Maria, e yepi wi fu kon sabi en moro bun.

Fu man kon sabi suma Maria ben de trutru, dan wi no musu poti prakseri na den someni difrenti sani di den kerki e leri sma fu en. Sobun, meki wi no luku den someni prenki nanga popki di sma ferfi fu en, noso di sma meki fu en. Meki wi no poti prakseri tu na den frekti kerkileri di e gi na uma disi di abi sakafasi, wan lo kefalek nen. Wan tu fu den nen dati na „Mama fu Gado” nanga „Kownu-uma fu Hemel”. Na presi fu dati, meki wi luku san Bijbel e leri wi trutru fu Maria. Disi sa yepi wi fu kon frustan moro bun o tranga a bribi fu en ben de, èn fa wi kan kon abi a srefi bribi leki a di fu en. Den sani disi na tumusi prenspari sani fu sabi.

Wan engel e kon na Maria

Soleki fa yu sabi, dan a man di ben kon na Maria, no ben de wan libisma. A ben de na engel Gabrièl. Di a kari Maria „yu di kisi wan bigi grani”, dan Maria „skreki srefisrefi”, èn a ben aksi ensrefi fu san ede a man ben taki en odi na a fasi dati (Lukas 1:29). Suma ben gi en bigi grani? Maria no ben e fruwakti taki libisma ben o gi en grani. Na engel ben taki fu a grani di Yehovah Gado ben gi en. Na dati ben prenspari gi Maria. Ma fu di a ben abi sakafasi, meki a no ben prefuru fu denki taki Gado ben feni en bun kaba. Efu wi e meki muiti fu kisi a bun-ati fu Gado, sondro taki wi e prefuru fu denki taki Gado feni wi bun kaba, dan wi sa leri wan prenspari sani di a yongu uma Maria ben e frustan heri bun. Gado no lobi sma di abi heimemre, ma a lobi èn a e yepi den wan di abi sakafasi.—Yakobus 4:6.

Maria ben musu abi a sakafasi dati, fu di na engel ben taigi en taki a ben o kisi wan tumusi bigi grani. A taigi en taki a ben o kisi wan pikin di ben o tron a moro prenspari libisma. Gabrièl ben taki: „Yehovah Gado o gi en a kownusturu fu en papa David; a o tiri fu têgo leki kownu fu a famiri fu Yakob èn en kownukondre no sa kaba” (Lukas 1:32, 33). A no de fu taki dati Maria ben sabi san Gado ben pramisi David moro leki wán  dusun yari na fesi, namku taki wan fu den bakapikin fu en ben o tiri fu têgo (2 Samuel 7:12, 13). Sobun, a manpikin fu en ben o de a Mesias di a pipel fu Gado ben e fruwakti hondrohondro yari langa!

San moro prenspari, na taki na engel taigi Maria taki sma ben o kari a pikin dati „a manpikin fu a Moro Heiwan”. Fa wan libisma ben kan tron a mama fu a Manpikin fu Gado? Fu taki en leti, fa Maria ben o man meki wan manpikin? En nanga Yosef ben meki mofo, ma den no ben trow ete. Fu dati ede, Maria aksi na engel krin: „Fa disi kan, fu di mi no sribi ete nanga wan man?” (Lukas 1:34) Luku taki Maria no ben e syen fu taki dati a no ben abi seks ete nanga wan man. Na presi fu dati, a ben breiti taki a no ben du a sani dati ete. Na ini a ten disi, furu yonguwan e hasti densrefi fu abi seks, èn den lobi fu spotu den wan di wani wakti nanga a sani dati. A no de fu taki, dati sma e denki tra fasi na ini a ten disi. Ma Yehovah no kenki (Maleaki 3:6). Neleki na ini a ten fu Maria, Yehovah lobi den wan di e tan hori densrefi na den markitiki fu en.—Hebrewsma 13:4.

Aladi Maria ben de wan getrow futuboi fu Gado, toku a ben de wan sondu libisma. We dan, fa a ben kan meki wan volmaakti pikin, namku a Manpikin fu Gado? Gabrièl ben taigi en: „Santa yeye sa kon na yu tapu, èn a krakti fu a Moro Heiwan sa tapu yu. Fu dati ede sma o kari a pikin di o gebore, a santawan èn a Manpikin fu Gado” (Lukas 1:35). A wortu santa wani taki „krin”, noso „soifri”. Ala sondu libisma e kisi sondu pikin. Ma disi leisi, Yehovah ben o du wan tumusi aparti wondru. A ben o teki a libi fu en Manpikin na hemel, èn a ben o poti en abra na ini a muru fu Maria. Baka dati, a ben o gebroiki en wroko krakti, noso en santa yeye fu „tapu” Maria, so taki a pikin no ben o kisi nowan sondu. Maria ben bribi a sani di na engel ben taigi en? San Maria taki?

Maria e piki Gabrièl

Sma di e tweifri na a tori disi, sosrefi sonwan fu den kerki leriman fu a Krestenhèit, no man bribi taki wan nyunwenke ben kan meki wan pikin. Aladi den kisi so furu leri, toku den no e frustan wan tru tori di no muilek srefisrefi fu frustan. Soleki fa Gabrièl ben taki, „Gado man du ala san a taki” (Lukas 1:37). Maria ben bribi den sani di Gabrièl ben taigi en, fu di a ben de wan yongu uma di ben abi wan tranga bribi. Ma dati no ben wani taki dati a ben e bribi iniwan sani di sma ben e taigi en. Neleki ala sma di abi frustan, Maria ben abi buweisi fanowdu fu man bribi den sani di a ben yere. Gabrièl ben de klariklari fu gi en moro buweisi. A fruteri en fu Elisabet, a famiriman fu en di ben owru kaba, èn di noiti no ben man meki pikin. Nanga yepi fu wan wondru, Gado meki a kon de nanga bere!

San Maria ben o du now? A ben abi wan wroko fu du, èn a ben abi a dyaranti taki Gado ben o du ala san Gabrièl ben taki. Wi no musu denki taki a grani disi no ben o gi Maria nowan enkri broko-ede noso problema. Wan sani di ben e gi en broko-ede, na taki a ben meki mofo fu trow nanga Yosef. A man disi ben o wani trow ete nanga en te a ben o kon sabi taki a ben de nanga bere? Wan tra sani, na taki kande a ben si a grani  di a ben kisi leki wan hebi frantwortu. A beibi na ini en bere ben o de a moro prenspari libisani di Gado meki, namku en eigi lobi Manpikin! A ben o abi fu sorgu a pikin beibi disi di no ben man du noti gi ensrefi, èn a ben o abi fu kibri en gi na ogri grontapu disi. Iya, dati trutru ben de wan hebi frantwortu!

Bijbel e sori taki srefi tranga man di ben de getrow anbegiman fu Yehovah, ben tweifri fu teki muilek wroko di Gado ben gi den. Moses ben taki dati a no ben o man tron takiman fu Gado, fu di a no ben e taki grati (Exodus 4:10). Yeremia ben feni taki a ben de „wan boi ete”, èn taki a ben yongu tumusi fu teki a wroko di Gado ben gi en (Yeremia 1:6). Èn Yona lon gi a wroko di a ben kisi! (Yona 1:3) Fa a ben de nanga Maria?

A sani di Maria ben taki e sori taki a ben abi sakafasi èn taki a ben e gi yesi na Gado. Srefi baka hondrohondro yari, den wortu dati e naki wi ati ete. A ben piki Gabrièl: „Luku! Na uma-srafu fu Yehovah! Meki sani waka nanga mi soleki fa yu taki” (Lukas 1:38). Wan uma-srafu ben de a moro lagi srafu, fu di na a masra fu en ben e bosroiti fa en libi ben o waka. Na so Maria ben e si en Masra, Yehovah. A ben sabi taki Yehovah ben o meki sani waka bun nanga en, èn taki Yehovah de getrow na den wan di e dini en na wan getrow fasi. Boiti dati, a ben sabi tu taki Yehovah ben o blesi en efu a ben o du ala san a ben man fu tyari a frantwortu di a ben kisi.—Psalm 18:25.

Son leisi Gado kan aksi wi fu du wan sani di wi ben kan si leki wan muilek sani, noso leki wan sani di wi no man du srefisrefi. Ma na ini en Wortu a e gi wi furu reide fu san ede wi kan frutrow na en tapu, soleki fa Maria ben du dati (Odo 3:5, 6). Wi sa du dati? Efu wi e frutrow tapu en, dan a sa blesi wi, èn dati sa gi wi moro reide fu kon abi wan moro tranga bribi.

Maria e go na Elisabet

Den sani di Gabrièl ben taki fu Elisabet ben prenspari srefisrefi gi Maria. Fu taki en leti, nowan tra umasma na grontapu ben o man frustan a situwâsi fu en moro bun. Maria hasti ensrefi fu go na a bergi kontren fu Yuda, èn a kan taki a teki dri noso fo dei fosi a doro na Elisabet. Di a ben e go na ini na oso fu Elisabet nanga a priester Sakaria, dan Yehovah gi Maria moro krin buweisi fu tranga a bribi fu en. Di Maria taki Elisabet odi, dan wantewante a beibi na ini Elisabet en bere dyompo fu prisiri. A santa yeye ben de na Elisabet tapu èn a kari Maria „a mama fu mi Masra”. Gado ben meki Elisabet kon sabi taki a manpikin fu Maria ben o tron en Masra, namku a Mesias. Boiti dati, Gado ben meki a prèise Maria fu di a ben gi yesi na Gado na wan getrow fasi. Elisabet ben taki: „Koloku tu fu na uma di ben e bribi” (Lukas 1:39-45). Iya, ala den sani di Yehovah ben pramisi Maria, kon tru!

Baka dati, Maria bigin taki. Na ini Lukas 1:46-55 wi kan leisi krin san a ben taki. Disi na a wan-enkri presi na ini Bijbel pe Maria e taki so furu sani, èn den wortu disi e yepi wi fu kon sabi furu fu en. Wi e si taki a ben de wan sma di ben abi furu warderi, fu di a ben prèise Yehovah gi a grani di a ben gi en fu tron a mama fu a Mesias. Wi e si tu taki a ben abi wan tranga bribi, fu di a ben taki dati Yehovah lagi den heimemrewan nanga den maktiwan, èn taki a ben yepi den mofinawan nanga den pôtiwan di wani dini en. Wan tra sani di wi kan si, na taki Maria ben sabi Gado Wortu bun. Te yu luku en bun, dan a ben taki fu moro leki 20 difrenti sani di skrifi na ini den Hebrew Buku fu Bijbel!

A de krin taki Maria ben e denki dipi fu den sani di a ben leisi na ini Gado Wortu. Ma toku a ben tan abi sakafasi, fu di a no ben taki san ensrefi ben e denki, ma a ben e taki san skrifi na ini Gado Wortu. Wan dei, a manpikin di ben e gro na ini en bere ben o sori taki a ben abi a srefi denki leki en mama, fu di a ben o taki: „Den sani di mi e leri sma, a no fu misrefi, ma den de fu a sma di seni mi kon” (Yohanes 7:16). A ben o bun fu aksi wisrefi: ’Mi abi a srefi lespeki disi gi a Wortu fu Gado? Noso, mi e tan hori na mi eigi denki èn na den sani di mi leri?’ Wi kan leri furu fu a piki di Maria ben gi.

Maria tan nanga Elisabet dri mun langa, èn a no de fu taki dati den gi makandra furu deki-ati (Lukas 1:56). Den tu uma disi e memre wi o prenspari a de fu abi mati. Efu wi e suku mati di lobi wi Gado Yehovah trutru, dan a no de fu taki dati wi sa kisi wan tranga bribi èn wi sa kon  moro krosibei na en (Odo 13:20). Ma a ten ben doro gi Maria fu drai go baka na oso. San Yosef ben o taki te a ben o kon sabi taki Maria ben de nanga bere?

Maria nanga Yosef

A no de fu taki dati Maria no wakti teleki a bere fu en bigin sori. A ben musu fu taki nanga Yosef. A kan taki a ben broko en ede fa a bun man disi di ben abi frede gi Gado, ben o feni en te a ben o yere san a ben abi fu taigi en. Toku a go na en, èn a fruteri en ala san ben pasa nanga en. Yu kan frustan taki Yosef no ben lobi a tori kwetikweti. A ben wani bribi a meisje disi di a ben lobi, ma a sani di a ben fruteri en noiti no ben pasa ete. Bijbel no e taki san Yosef ben e denki. Ma Bijbel e fruteri wi taki a ben bosroiti fu brokotrow nanga Maria, fu di na a ten dati sma ben e si wan man nanga wan uma di ben meki mofo, leki sma di ben trow. Ma a no ben wani taki Maria ben musu kisi syen noso strafu. Dati meki a bosroiti fu brokotrow nanga en sondro taki sma sabi (Mateyus 1:18, 19). A ben musu fu hati Maria fu si fa a bun man disi ben e broko en ede nanga a sani disi di ben miti en wantronso. Toku, Maria no ben atibron na en tapu.

Aladi Yosef ben feni en moro bun fu brokotrow, toku Yehovah no meki a du dati. Na ini wan dren, na engel fu Gado ben taigi en taki a ben de so trutru taki Maria ben kon de nanga bere nanga yepi fu wan wondru. A sani dati ben musu fu de wan frulekti gi Yosef! Now Yosef du san Maria ben e du kaba na a bigin. A meki Yehovah tiri en. A trow nanga Maria, èn a sreka ensrefi fu teki a tumusi aparti frantwortu na en tapu fu sorgu gi Yehovah en Manpikin.—Mateyus 1:20-24.

Sma di trow, nanga den wan di e prakseri fu trow kan leri wan moi sani fu a yongu trowpaar disi di ben libi sowan 2000 yari pasa. Te Yosef ben e si fa a wefi fu en ben e tyari den frantwortu di a ben abi leki mama, dan a ben musu fu breiti taki a ben meki na engel fu Yehovah tiri en. A ben musu de so taki Yosef ben kon si o prenspari a de fu frutrow tapu Yehovah te a ben e teki prenspari bosroiti (Psalm 37:5; Odo 18:13). A no de fu taki dati a tan sori koni nanga switifasi te a ben e teki bosroiti leki edeman fu na osofamiri.

Ma san wi kan taki fu Maria te wi e luku taki a ben de klariklari fu trow nanga Yosef? Soleki fa wi sabi, dan Yosef no ben man frustan fa Maria ben kon de nanga bere. Toku Maria ben abi a pasensi fu wakti èn fu tan abi frutrow na ini Yosef di ben o tron edeman fu na osofamiri fu den. Dati trutru ben de wan bun sani di a leri, èn Kresten umasma na ini a ten disi musu teki na eksempre fu en. Te fu kaba, den sani disi ben musu fu leri Yosef nanga Maria taki a de prenspari fu taki krin nanga makandra.

A no de fu taki dati a yongu trowpaar dati ben seti a moro bun fondamenti gi a trowlibi. Den ala tu ben lobi Yehovah moro iniwan tra sani, èn leki lobi-ati papa nanga mama den ben angri fu tyari a frantwortu fu den na wan fasi di Gado feni bun. Ma wi sabi taki den ben o kisi moro bigi blesi nanga moro hebi tesi. Den ben o abi fu kweki Yesus, di ben o gro kon tron a moro prenspari sma di oiti ben libi na grontapu.

[Prenki na tapu bladzijde 17]

A moro bun fondamenti gi a trowlibi na te trowpatna abi lobi gi Gado