Leisiman e aksi

Gado e teki pikin-nengre fu tron engel na ini hemel?

Te wan pikin-nengre dede, dan den mati fu a famiri di lasi a pikin, e pruberi fu trowstu a famiri nanga den wortu disi: „Gado ben musu fu abi ete wan engel fanowdu na ini hemel.” Yu denki taki a sani disi kan?

Efu a ben de so taki Gado e meki pikin-nengre dede fu di a abi moro engel fanowdu na ini hemel, dan dati ben o wani taki dati a no abi firi èn taki a abi ogri-ati. Bijbel e taki dati Gado de heri tra fasi (Yob 34:10). Wan lobi-ati papa no ben o teki wan pikin puru na en papa nanga mama wantronso, soso fu di a wani meki en osofamiri kon moro bigi. Fu taki en leti, nowan libisma papa e sori sari-ati moro Yehovah. A moro prenspari fasi fu Gado, na lobi (1 Yohanes 4:8). Noiti a ben o handri na so wan ogri-ati fasi, fu di a abi bigi lobi.

Aksi yusrefi: ’Gado abi moro engel fanowdu na ini hemel?’ Bijbel e taki dati ala den sani di Gado du, bun dorodoro (Deuteronomium 32:4). Di Gado meki milyunmilyun engel, dan a sani dati di a du ben bun dorodoro èn a ben meki nofo engel (Danièl 7:10). A kan de so taki Gado no ben teri bun omeni engel a ben abi fanowdu? Dati no kan kwetikweti! A no de fu taki dati na Almakti Gado noiti no kan meki so wan fowtu. A tru taki Yehovah teki son libisma fu go na hemel fu tiri makandra nanga Yesus Krestes na ini en Kownukondre. Ma den sma disi no ben o de pikin-nengre te den ben o dede.—Openbaring 5:9, 10.

Wan tra reide fu san ede Gado no ben o teki pikin-nengre fu grontapu fu tron engel na hemel, na fu di disi no ben o kruderi nanga san a ben abi na prakseri gi den. Na ini a dyari fu Eden, Gado taigi Adam nanga Eva: „Meki pikin èn kon furu, teleki unu kon lai na grontapu, èn basi ala sani na grontapu” (Genesis 1:28). Pikin na presenti fu Gado. A ben de fanowdu taki libisma meki pikin, so taki a wani fu Gado ben kan kon tru, èn dati na taki grontapu kon furu nanga reti-ati libisma. A no ben wani taki pikin-nengre musu dede èn tron engel. Bijbel e taki krin dati pikin na „wan gudu di e kon fu Yehovah” (Psalm 127:3). A de so taki Yehovah, a Gado fu lobi, ben o teki wan presenti baka di a gi papa nanga mama? Nôno, kwetikweti!

Te wan pikin-nengre dede, dan dati na wan tumusi sari sani. Sortu howpu papa nanga mama di e sari abi? Bijbel e pramisi taki Gado sa gi milyunmilyun sma wan opobaka na ini wan paradijs, leti dyaso na grontapu. Prakseri a tori, pikin-nengre di opo baka nanga wan gosontu skin, e miti baka nanga den lobiwan fu den (Yohanes 5:28, 29). Gado wani taki yonguwan gro kon bigi, taki den nyan bun fu a libi, èn taki den leri sabi en nanga den sani di a o du na grontapu. Sobun, yonguwan di dede no de na ini hemel leki engel, ma den e wakti fu kisi wan opobaka na ini wan paradijs na grontapu. Na a ten dati, te wi lobi-ati Mekiman e sorgu gi wi, dan yonguwan nanga owruwan sa prisiri fu dini Yehovah Gado fu têgo.