NA INI heri Bijbel, fu Genesis te go miti Openbaring, yu kan leisi sani fu skapuman (Genesis 4:2; Openbaring 2:27). Prenspari man soleki Abraham, Moses, nanga Kownu David ben de skapuman. Na wan heri moi fasi, a psalm skrifiman David fruteri fu den frantwortu nanga den broko-ede fu wan bun skapuman. A psalm skrifiman Asaf ben kari David wan skapuman fu Gado pipel na ini owruten.​—Psalm 78:70-72.

Na a ten di Yesus ben de na grontapu, furu sma ben e wroko ete leki skapuman. Yesus ben kari ensrefi „a moro bun skapuman”. Te a ben wani leri sma prenspari sani, dan nofo tron a ben e taki fu den moi fasi di wan bun skapuman abi (Yohanes 10:2-4, 11). Bijbel e kari na almakti Gado Yehovah srefi „wan skapuman”.​—Yesaya 40:10, 11; Psalm 23:1-4.

Sortu meti wan skapuman ben e luku? Fa a wroko fu en ben de? San wi kan leri fu den man dati di ben e wroko tranga?

Nofo tron den skapuman fu owruten Israel ben abi skapu di ben komoto na Siria. Den skapu disi ben abi wan bradi tere èn furu wiwiri. Soso den manwan ben abi tutu, den umawan no ben abi. Wan sma kan tiri den meti disi makriki. Nofo tron den no man yepi densrefi èn ogri meti kan kisi den makriki.

Den skapuman ben e luku krabita tu di ben blaka noso broin. Den langa yesi fu den di ben anga na den sei-ede ben aka noso priti na den makabusi te den ben e waka e nyan grasi na tapu den bergi.

 A skapuman ben musu leri den skapu nanga den krabita fu gi yesi na en. Disi no ben makriki èn a ben kan teki wan langa pisi ten fosi den meti leri dati. Toku den skapuman ben abi pasensi nanga den meti èn den ben e sorgu den na wan lobi-ati fasi. Den ben e gi den meti nen srefi èn den meti ben sabi den nen fu den.​—Yohanes 10:14, 16.

Na a bigin fu a yari, wan skapuman ben gwenti puru den meti ibri dei na ini wan pen krosibei fu en oso. Dan a ben e tyari den go nyan fatu grasi na den weigron krosibei fu a dorpu fu en. Na a pisi ten disi den skapu nanga krabita ben e meki pikin èn na so na ipi ben e kon moro bigi. Na ini a kowru ten fu a yari den skapu ben e kisi furu deki wiwiri èn na a bigin fu a yari baka dati den skapuman ben e koti den wiwiri fu den skapu. A pisi ten disi ben de wan prisiri ten èn sma ben lobi hori fesa!

Son leisi den sma na ini den dorpu ben abi wan tu skapu nomo èn den ben e yuru wan skapuman fu luku den skapu fu den. A skapuman ben e poti den skapu dati na den wan di a ben e luku kaba. Ma nofo tron a no ben e luku den skapu fu den sma so bun leki en eigi skapu.​—Yohanes 10:12, 13.

Te den sma ben kaba koti nyanyan na den gron krosibei fu den dorpu, pikinso nyanyan ben libi na den gron ete èn nyun grasi ben e bigin gro. Dan den skapuman ben e tyari den skapu fu den go nyan na den gron disi. Te a waran ten fu a yari ben bigin, den skapuman ben e tyari den meti go na den weigron na hei kontren pe a ben de pikinso moro kowru. Na a ten disi fu a yari den skapuman ben e wroko èn sribi na dorosei furu dei langa. Den ben meki den skapu nyan grasi na den skin fu den bergi. Na neti den ben e poti den skapu na ini skapupen di no ben abi daki. Na so den ben e kibri den gi ogri meti nanga fufuruman. Son leisi den skapuman ben e poti den skapu na ini bergi-olo na neti fu kibri den gi sabanadagu nanga busidagu. Efu den skapu ben kon frede te den ben yere a babari fu wan sabanadagu, dan a safri sten fu a skapuman ben o meki den skapu tan tiri.

Ibri neti a skapuman ben e teri den skapu èn a ben e luku efu nowan fu den kisi mankeri. Na mamanten a ben e kari den skapu, dan den ben e waka na en baka go na den weigron (Yohanes 10:3, 4). Twarfu yuru bakadina a ben e tyari den meti go na watra-olo fu dringi watra. Efu den watra-olo no ben abi watra, dan a skapuman ben e tyari den go na wan peti pe a ben e teki watra gi den.

Na a kaba fu dreiten, wan skapuman ben kan tyari den skapu go na a sei fu a se èn na den lagipresi. Te a ben e kon kowru baka èn alen ben e kon, dan a ben e tyari den skapu go na oso baka. Drape den ben o tan a heri kowru ten fu a yari na ini wan skapupen di tapu. Efu a no ben du dati, dan den meti ben kan dede fu di bigi alen èn pisipisi ijs nanga snew ben e fadon na a ten dati. Fu november te go miti bigin fu a tra yari, den  skapuman no ben e tyari den meti go na dorosei fu nyan grasi.

Wan skapuman ben e weri steifi krosi di no ben abi furu pranpran. Son leisi a ben e weri wan dyakti fu kibri gi na alen noso fu kisi waran na wan kowru neti. A dyakti ben de fu skapububa di ben abi wiwiri ete. A sei pe a wiwiri ben de ben drai go na inisei. Na ondro a dyakti a ben e weri wan langa krosi. A ben e weri susu fu no kisi mankeri te a ben e waka na tapu srapu ston noso maka. A ben e tai en ede tu nanga wan pisi krosi di brei fu skapuwiwiri.

Nofo tron wan skapuman ben abi den sani disi: Wan tas fu metibuba (1) pe a ben e poti nyanyan-sani na ini soleki brede, olèif, drei froktu nanga kasi. A ben abi wan kodya fu wán meter so (2). A kodya disi ben abi wan lontu ede nanga srapu pisi ston èn a skapuman ben e gebroiki en leki wan fetisani. A ben abi sosrefi wan nefi (3), wan langa tiki (4) di a ben e gebroiki fu waka noso fu kren na tapu den bergi èn wan sani fu poti watra na ini fu dringi (5). Boiti dati, a ben abi wan lerisaka di ben de leki wan emre (6). A ben kan fow en èn a ben e gebroiki en fu puru watra na ini dipi peti. A ben abi wan slenger (7) tu fu fringi ston go krosibei fu den skapu noso krabita fu yagi den kon baka na a ipi te den ben wani waka gowe. A ben e gebroiki a slenger tu fu yagi ogri meti di ben wani nyan den meti fu en. Nanga wan froiti fu warimbo (8) a ben e prei poku gi ensrefi èn gi den skapu fu meki den firi korostu.

A ben e wroko tranga fu sorgu den meti, ma a ben e kisi wini fu dati tu. A ben kan dringi a merki fu den meti èn a ben kan nyan den. A ben e gebroiki skapuwiwiri nanga skapububa fu meki kroisi èn saka fu poti watrawatra sani na ini. A ben kan kenki skapuwiwiri nanga skapububa gi tra sani di a ben abi fanowdu. Sma ben e meki krosi fu krabitawiwiri èn den ben e gebroiki skapu nanga krabita leki ofrandi tu.

Bun skapuman ben de sma di ben e wroko tranga, di trawan ben kan frutrow èn di ben abi deki-ati. Son leisi den ben kan lasi den libi srefi te den ben musu kibri den meti fu den.​—1 Samuel 17:34-36.

A de krin fu san ede Yesus nanga den disipel fu en ben taki dati den wan di e teki fesi na ini a Kresten gemeente musu de leki skapuman (Yohanes 21:15-17; Tori fu den apostel 20:28). Neleki den bun skapuman fu Bijbel ten, na so den gemeente owruman na ini a ten disi e du muiti fu ’luku den skapu fu Gado di a gi den fu sorgu. Den no e du dati neleki na dwengi sma dwengi den, ma den e du en nanga prisiri. Den no e du en tu fu di den lobi fu kisi wini na wan fasi di no fiti, ma den e du en fu di den e angri fu dini trawan.’​—1 Petrus 5:2.