Ninefei ben de a mamafoto fu a Gran Kownukondre Asiria. A ben de wan makti foto di ben abi bigi kownu-oso nanga tempel, bradi strati, nanga bigi skotu. A profeiti Nahum ben kari en „a foto di e kiri sma”.—Nahum 3:1.

A nen dati ben fiti fu di prenki na tapu den skotu fu a kownu-oso fu Sanherib di de na Ninefei, e sori taki den Asiriasma ben de ogri-ati sma. Tapu wan fu den prenki wan sma e hori wan strafuman na gron aladi wan trawan e hari en tongo puru na ini en mofo. Sani di skrifi na ini ston e taki dati den ben e fasi aka na ini katiboman den noso nanga den mofobuba. Den ben e tai titei na den aka disi, èn na so den ben e meki den katiboman waka. Te den ben teki foto abra, dan den ben koti na ede fu den kownu puru. Den ben e tringi den ede kon na wán èn den ben e anga den leki bigi keti na den neki fu den heihei man di den ben teki leki katiboman.

Archibald Henry Sayce, sabiman fu na historia fu Asiria, e taki fu den ogri-ati sani di ben e pasa te a pipel disi ben teki wan foto abra: „A winiman fu a feti ben e libi ipi-ipi ede fu dedesma na baka. Den ben e bron manpikin nanga umapikin libilibi, noso den ben e du moro ogri sani nanga den. Den ben e anga mansma na postu, den ben e piri den buba puru fu den skin aladi den ben de na libi ete, den ben e breni den, den ben e koti den anu, den futu, den yesi nanga den noso puru.”

Gado ben taigi den Dyu: „Efu yu bow wan nyun oso, yu musu bow wan pikin skotu na tapu a daki, so taki sma no fadon komoto fu a daki. Na so yu no o kisi brudu-paiman” (Deuteronomium 22:8). A sani disi ben prenspari fu di Dyu famiri na ini Bijbel ten ben gwenti du wan lo sani na tapu den daki fu den.

Furu fu den oso fu den Israelsma ben abi wan plata daki. A daki fu na oso ben de wan moi presi pe sma ben kan sidon teki a waran fu a son, pe den ben kan teki winti, noso pe den ben e du oso-wroko. Na ini a waran pisi ten fu a yari, a ben switi fu sribi drape (1 Samuel 9:26). Gronman ben gwenti drei aleisi na tapu a daki, fosi den ben e mara en. Den ben e drei figa nanga korenti drape tu.—Yosua 2:6.

Den Dyu ben e anbegi tu na tapu den daki fu den oso, awansi na tru anbegi noso falsi anbegi (Nehemia 8:16-18; Yeremia 19:13). Na apostel Petrus ben e go na tapu a daki wan bakadina fu begi (Tori fu den apostel 10:9-16). Son leisi sani ben e gro tapu a daki noso sma ben e meki wan pikin afu-daki fu palmbon wiwiri. Te den ben e du dati, dan a ben musu fu switi fu sidon drape.

Wan buku e taki dati den oso fu den Israelsma ben abi wan trapu „na sei na oso” di ben e go na tapu a daki (The Land and the Book). Sobun, wan sma ben kan saka komoto fu a daki sondro taki a ben abi fu go na ini na oso. A sani disi e sori fu san ede Yesus ben warskow sma fu no draidrai fu gowe libi wan foto di ben o kisi pori: „A man di de na tapu a daki fu en oso, no musu saka kon na gron fu teki sani na ini en oso.”—Mateyus 24:17.