Na ini a Bijbel buku Rut, den no kari a nen fu wan man di no ben wani du en wroko neleki fa a wèt fu Moses ben taki, ma den ben kari en „mati” (Rut 4:1-12). Wi kan taki dati na fu di den nen fu son sma no skrifi na ini Bijbel, dan dati wani taki dati den na ogri sma, noso den no de so prenspari?

Nôno. Luku wan tra eksempre. Fu sreka sani gi a lasti Paskafesa, dan Yesus taigi den disipel fu ’go na ini a foto pe den o si wan man [„so wan man” Da Bijbel na ini Sranantongo]’ èn den ben musu sreka sani na ini en oso (Mateyus 26:18). Wi kan taki dati a „man” na ini a tekst disi na wan ogri man, noso taki a nen fu en no de so prenspari? Nôno, a „man” disi ben musu fu de wan disipel fu Yesus. Fu di a nen fu en no ben de prenspari, meki den no skrifi en.

Bijbel e kari den nen tu fu furu ogri sma. A e taki tu fu furu sma di ben tan du a wani fu Gado, ma den nen no skrifi na ini Bijbel. Fu eksempre, furu sma sabi a nen fu a fosi uma Eva. Ma fu di a ben denki ensrefi nomo èn a ben trangayesi Gado, meki Adam ben sondu, èn a tyari takru bakapisi gi wi alamala (Romesma 5:12). Na a tra sei, Bijbel no e kari a nen fu a wefi fu Noa, ma wi kan leri furu fu en fu di a no ben prakseri ensrefi, a ben gi yesi, èn a ben yepi en masra nanga a prenspari wroko fu en. A no fu di Bijbel no kari a nen fu en, dan Gado no feni en bun.

Tra nen de di Bijbel no e kari, aladi den sma ben abi deki-ati trutru fu du a wani fu Yehovah. Prakseri a pikin meisje fu Israel di ben de wan srafu na ini na oso fu Naman, wan legre-edeman fu Siria. A no ben frede fu taki nanga en misi, a wefi fu Naman, fu a profeiti fu Yehovah di ben de na ini Israel. A sani disi meki taki wan bigi wondru pasa (2 Kownu 5:1-14). Na umapikin fu Yefta, wan krutuman na ini Israel, ben de wan bun eksempre tu, fu di a ben abi wan tranga bribi. A ben agri fu no trow èn fu no abi pikin so taki en papa ben kan du san a pramisi Gado (Krutuman 11:30-40). Boiti dati, Bijbel no e kari den nen fu den sma di skrifi moro leki 40 psalm èn fu den profeiti di ben tan du a prenspari wroko di Gado ben gi den.​—1 Kownu 20:37-43.

Kande wan moro moi eksempre na di fu den engel di tan dini Gado. Hondrohondro milyun engel de, ma Bijbel e kari a nen fu tu nomo, Gabrièl nanga Mikael (Danièl 7:10; Lukas 1:19; Yudas 9). Bijbel no e kari den nen fu den tra engel. Fu eksempre, Manowa, a papa fu Simson ben aksi wan engel: „Taigi wi fa yu nen, dan wi kan gi yu grani te sani pasa soleki fa yu taki.” Na engel piki en: „Fu san ede yu wani sabi mi nen?” Na engel ben abi sakafasi fu di a no ben wani kisi a grani di Gado abi reti na tapu.​—Krutuman 13:17, 18.

Bijbel no e taki finifini fu san ede a nen fu son sma kari, èn fu san ede tra nen no kari. Ma wi kan leri furu fu den eksempre fu den wan di dini Gado sondro fu kisi barinen.