Cha, BoFakazi BaJehova abakamelani nekugoma. Sitsatsa kugoma njengesincumo umKhristu ngamunye lokufanele atentele sona. BoFakazi BaJehova labanyenti bakhetsa kugoma.

 Sifuna tekwelapha letisezingeni lelisetulu futsi siyitsatsa njengalebalulekile intfutfuko leyentiwa bososayensi kutekwelapha kuze banciphise kugula lokumatima. Sikubonga kakhulu kutidzela nekutimisela lokwentiwa betemphilo, ikakhulukati ngetikhatsi letimatima.

 BoFakazi BaJehova bayabambisana nebetemphilo. Sibonelo nje, kusukela kwacala i-COVID-19, BoFakazi BaJehova bachubekile basakata tikhumbuto ngetilwimi letinyenti kule-website, bakhutsata bantfu kutsi banake imitsetfo yekuphepha yasendzaweni labahlala kuyo. Lemitsetfo ifaka ekhatsi kubaluleka kwekukhweshelana, kulandzela ticondziso emibutsanweni, kungahlangani nalabanye, kugeza tandla, nekufaka tifonyo kanye naletinye tintfo letidzingekile letishiwo tiphatsimandla.—KubaseRoma 13:1, 2.

 Sekuphele iminyaka leminyenti tincwadzi taBoFakazi BaJehova tigcizelela letimiso letilandzelako:

•   Tindzaba temphilo tisincumo semuntfu ngamunye.​—KubaseGalathiya 6:5.

   “[Lomagazini] awunconoti luhlobo lolutsite lwekulashwa kunalolunye futsi awuniketi teluleko etindzabeni tekwelashwa. Umgomo wawo kubeka emaciniso ebaleni bese ushiyela kumuntfu lowufundzako kutsi atentele sincumo.”​—Awake!, yaFebruary 8, 1987 letfolakala ngesiNgisi.

   “Umbuto wekutsi wena nebantfwana bakho nitawugoma yini, usincumo senu.”​—Awake!, ya-August 22, 1965 letfolakala ngesiNgisi.

•   Sifuna kwelashwa ngobe sitsatsa kuphila njengalokuligugu.​—Imisebenti 17:28.

   “BoFakazi baya kubodokotela kuze belashwe. Bayakutsandza kuphila futsi bafuna kwenta nobe ngabe yini lenengcondvo nalesekelwe eBhayibhelini kuze baphile sikhatsi lesidze.”​—Sicongosekulindza, saJuly 1, 1975 lesitfolakala ngesiNgisi.

   “Ngekutitsandzela, BoFakazi BaJehova bayakwemukela kwelashwa. Bafuna kuba nemphilo lenhle futsi baphile sikhatsi lesidze. Ecinisweni, njengemKhristu wangelikhulu lekucala Lukha, labanye BoFakazi BaJehova babodokotela. . . . BoFakazi BaJehova bayabonga ngemsebenti lomatima nekutidzela kwetisebenti tetemphilo. Baphindze batibonge letisebenti natibasita kutsi babe ncono.”​—Sicongosekulindza, saFebruary 1, 2011, lesitfolakala ngesiZulu.